Read lunyore 1 SAMWELI 18 Bible Online

1 SAMWELI 18 - lunyore bible

1 SAMWELI 18

¹Saulo nende Daudi bamala obutwakani bwabwe. Inyuma we yako omusiani wa Saulo Yonatsani yali okhwonyonywa nende Daudi okhusila ma namuyanza singa obwa yeyanzanga omwene.

²Saulo yamenyia Daudi hangohe okhuchiaka litukhu yilio ne siyamuhuchil'la okhukalukha owabwe tawe.

³Yonatsani yalomba indakano na Daudi sichila yamuyanza singa yeyanzanga omwene.

⁴Yonatsani yahinia ekanzo eyayali niyebikhile nahelesia Daudi halala nebiesingobie ma khandi namuha olukanga, nobuhingo, nende olukhoba lwomus'sienje.

⁵Daudi yahesianga kosi aka Saulo yamurumanga okhukhola. Khulwako Saulo yamukhola mulala khubakhongo babasikaribe. Yaka kayanzisia abakhongo ba Saulo nende abandube bosi.

⁶Olwa Daudi yali nachelelanga namal'le okhwira Goliati khandi olwa abasikari bali nibachelelanga ingo, abakhasi musie litaala musibala sia Isiraeli betsa okhwakan'na omuruchi Saulo. Bembanga tsinyembo tsiobusangali nibasina nibakhupanga esikuti nende obukhana.

⁷Mumwekhoyo kwabwe abakhasi yabo bembanga nibaboola mbu, “Saulo wir're etsielefu ne Daudi wir're etsielefu amakhumi.”

⁸Amang'ana yaka sikayanzisia Saulo tawe, kho lirima liamuhamba. Yamala aboole mbu, “Babaliye Daudi etsielefu amakhumi nase bambaliye butswa etsielefu. Elilondakhwo betsa okhumukhola omuruchi.”

⁹Okhurula litukhu yilio, Saulo yasiendekhela Daudi ma naba nahonzoni n'naye.

¹⁰Litukhu elialondakhwo, omwoyo omubi okwarumwa na Nyasaye kwetsa khu Saulo nachaaka okhuhanzukha munzumwe singa omulalu. Daudi yali nakhupanga obukhana bubwe singa yakholanga sielitukhu ne Saulo yali natil'le lifumo m'mukhonokwe.

¹¹Ma Saulo naboola mumwoyo kukwe mbu, “Nzia okhumufumir'ra khwisisi.” Ma namulasila lifumo esiakhabili; nebutswa Daudi naliebelenga.

¹²Saulo yali noburi khu Daudi sichila OMWAMI yali halala na Daudi nebutswa yali narul'le khu Saulo.

¹³Kho Saulo namukhunga ma namukhola okhusinjil'la abasikari elefu ndala. Daudi yemel'la abandu baabe mwihe,

¹⁴ne yanyoolanga obulechi mubulwanibwe bwosi sichila OMWAMI yali halala n'naye.

¹⁵Olwa Saulo yalola mbu Daudi yanyoola obulechi mubulwanibwe bwosi yali noburi obukali khuye.

¹⁶Nebutswa abandu bosi mu Isiraeli nende mu Yuda bayanza Daudi sichila yali omwemeli omulahi.

¹⁷Ma Saulo nabool'la Daudi mbu, “Omukhaana wanje omukhulundu Merabu ngwoyo. Nzia okhumuhaana khuibe abe omukhasi uwo oluhono lwa urumikhila singa omusikari wolutswoni khandi omusubilwa ma olwane obulwani bwo MWAMI.” Okhuba Saulo yapaala mbu munjila yiyi Abafilisiti nabeere Daudi nebutswa ye mwene sinamwire tawe.

¹⁸Daudi nakalusia naboola mbu, “Ise khali naliira sina, kata abeinyumba yefwe bali nabukhala sina mu Isiraeli? Khe ndakhaba mbwena omusaatsa womukhaana womuruchi?”

¹⁹Nebutswa olwa inyinga yokhuhaana Merabu khu Daudi yoola Merabu yamala nahanwa khumusaatsa undi olangwanga Adirieli okhurula Mehola.

²⁰Kata mbwo omukhaana wa Saulo olangwangwa Mikali yayanza Daudi okhusila ne olwa Saulo yakahul'la yasangala.

²¹Saulo naboola mumwoyokwe mbu, “Nambane Mikali khu Daudi owanobe singa esireko khuye ma nayeerwe nende Abafilisiti.” Kho yilwo nduba olwakhabili Saulo okhubool'la Daudi mbu, “Nobe omusaatsa womukhaana wanje.”

²²Yabool'la abakhongo baabe babool'le Daudi masilisi mbu “Omuruchi uyanzisibubwe n'nawe khandi abakhongo baabe bakhwekhoyelanga; luno neinyinga indahi khuibe okhuteesia omukhaana uwe.”

²³Kho babool'la Daudi amang'ana yaka ma naye nakalusia naboola mbu, “Noluyali olukali okhuteesia omukhaana womuruchi. Noluyali olukali okhusila khumundu omutakha khandi oramanyikhan'ne singa ise.”

²⁴Abakhongo yabo babool'la Saulo aka Daudi yali nabooye,

²⁵ma Saulo nababool'la batsie okhubool'la Daudi mbu, “Esiomuruchi yenyanga okhurula khuibe singa ikhwe namakhoba akasebelwe khu Bafilisiti emia ndala abafwiye, singa es'sialia khubasukube.” Nimbwo Saulo yaloosia singa Daudi anyala okhwirwa na Bafilisiti.

²⁶Abakhongo yabo babool'la Daudi aka Saulo yali nabooye ne Daudi yayanzisibwa neling'ana liokhuteesia omukhaana womuruchi. Litukhu lies'selelo ndisili okhwola,

²⁷Daudi halala nabasikari baabe batsia ma nibeera Abafilisiti tsimia tsibili. Yabukula amakhoba kasebwa khu Bafilisiti aba yali niyeer're ma nahil'la Saulo. Nakabasia kosi imbeliwe kho abe onyaala khuteesia omukhaanawe. Kho Saulo yahaana omukhaana uwe Mikali okhuteekhela Daudi.

²⁸Saulo yamanyilisia bulahi mbu OMWAMI yali halala na Daudi khandi mbu omukhaanawe Mikali yamuyanza.

²⁹Kho yamala abe noburi khu Daudi ma naba omusukuwe oluhono lwa yali nasimenyele.

³⁰Abasikari ba Bafilisiti betsanga okhulwana ne mubulwani bwosi Daudi yalinji nobulechi okhuyomba abakhongo ba Saulo bandi bosi. Khulwako Daudi yamanyikha okhusila.