Read lunyore 1 SAMWELI 19 Bible Online

1 SAMWELI 19 - lunyore bible

1 SAMWELI 19

¹Saulo yabool'la omusianiwe Yonatsani nende abakhongo baabe bosi mbu aloosianga okhwira Daudi. Nebutswa Yonatsani yali niyayanza Daudi.

²Kho Yonatsani yabool'la Daudi mbu, “Papa wanje ateemanga okhukhwiira. Khulwe yako oyanze welinde omwene mukamba tsuli; webise habundu hamambiswi ma obeho.

³Nanzie okhusinjila imbeli wa papa mumukanda okwa nobe niwebisilemwo, ma namubool'le amang'ana kaako. Nindakhanyoola ling'ana liosi nakhumanyie.”

⁴Yonatsani yitsoomia Daudi khu Saulo naboola mbu, “Omwami, orakhol'la omurumikhiliwo Daudi obubi tawe. Asili okhukhukhol'lakhwo liibi liosi; harali kosi aka yakhola nakobukhonyi khuibe.

⁵Yara obulamubwe mubutinyu olwa yeera Goliati; ne OMWAMI yanyool'la Isiraeli obulechi obukali. Olwa wakalola wasangala, kho busina luno wenyanga okhukhol'la omundu orali nesikha obubi ma wire Daudi sila esifune siosi?”

⁶Saulo yahuchil'la aka Yonatsani yaboola ma neyesuha muliira lio MWAMI mbu sinayeerekhwo Daudi tawe.

⁷Kho Yonatsani yalanga Daudi namubool'la kosi aka bali nibabooye; ma namuhila khu Saulo, ne Daudi yarumikhila omuruchi singa obwa yamurumikhilanga olwokhuranga.

⁸Lihe hakari wa Baisiraeli nende Abafilisiti liabuukha, Daudi yabaseera ma nabaleka kupu ma nibelukha.

⁹Litukhu elala omwoyo omubi okwarula khu MWAMI kwetsa khu Saulo. Yali niyekhaye munyumba nali nelifumolie mumukhono ne Daudi yali nalimwo namukhupilanga obukhana.

¹⁰Saulo yateema okhufumir'ra Daudi khwisisi nelifumo nebutswa Daudi yebelenga, ne lifumo nilihanda mwisisi. Daudi yelukha ma nahonokokha.

¹¹Obutukhu bwene yibwo Saulo yaruma abandu nalebe okhuhichil'la Daudi hanyumbaye ma bamwire omukamba okulondakhwo. Mikali omukhasi wa Daudi yamuchetsiyia naboola mbu, “Noba norelukha obutukhu bwan'nondi, mukamba nawirwe.”

¹²Kho Mikali yamala amwisisie mwitilisa ma Daudi niyelukha ma nahonokokha.

¹³Ma Mikali nabukula esifwanani siomundu nasikonia khusitanda, nabiikha omuto kwobwoya bweimbusi hamurwe kwesifwanani yisio ma nasifuunikha.

¹⁴Olwa abasikari ba Saulo betsa okhutiila Daudi, Mikali yababool'la mbu Daudi nomulwaye okhusila.

¹⁵Nebutswa Saulo yabaruma bakalukhe okhulolakhwo Daudi netsimoni tsiabwe. Yababool'la mbu, “Mumuchinjile khusitandasie, nase nzia okhumwira.”

¹⁶Benjila munyumba mukari ma nibanyoola esifwanani nisikon'ne khusitanda ne omuto kwobwoya bweimbusi nikuli hamurwe wasio.

¹⁷Saulo nareeba Mikali, “Nisina esichil'le niungaata mbu, ma nolekha omusuku wanje niyelukha?” Mikali namukalusia naboola mbu, “Yambooleye yetsa okhunzira nirakhamukhonya okhwilukha.”

¹⁸Daudi yelukha natsia Rama aha Samweli yali ma namubool'la kosi aka Saulo yali namukholeye. Ma ye halala na Samweli nibatsia Nayotsi nibamenyayo.

¹⁹Saulo yabool'lwa mbu Daudi ali Nayotsi mwitaala lia Rama,

²⁰kho yaruma abandu batsie okhumutiila. Balola omukanda kwabaroobi nikuroobanga ne Samweli nakusinjiliye singa omwemeli wakwo. Ma omwoyo wa Nyasaye niyenjila mubandu ba Saulo nabo nibachaaka okhurooba.

²¹Olwa Saulo yakahul'la, yaruma abandu bandi, nabo khandi nibachaaka okhurooba. Khandi yamala naruma abarume bwakhataru, khandi nikekholekha khubo singa abokhuranga.

²²Khe ye omwene natsia Rama. Olwa yoola hasitaho esikali esili Seku, yareeba aha Samweli nende Daudi bali nibali, ne nabool'lwa bali Nayotsi.

²³Olwa yali natsitsangayo, Omwoyo wa Nyasaye yenjila muye nachaaka okhurooba okhwola olwa yoola Nayotsi mwitaala lia Rama.

²⁴Yenabula tsingubotsie ma narooba imbeli wa Samweli, ma nakona hasi esihechenye om'basu yikwo kwosi nende obutukhu bwosi. Nilwo olwa kachaaka okhuboolwa, “Saulo naye khandi akhakwiye omuroobi noho?”