Read lunyore 1 SAMWELI 2 Bible Online

1 SAMWELI 2 - lunyore bible

1 SAMWELI 2

¹Hana yasaaya naboola mbu: “OMWAMI witsusisie obusangali mumwoyo kwanje; mako obwa sangaye khuko MWAMI yakholeye! Nzekhel'langa abasuku banje, mako obwasangaye sichila OMWAMI umbabin'ne.

²“Abulaho omutsienukhu singa OMWAMI, abulaho oli singa ye. Abulaho omusooli singa Nyasaye wefwe.

³Mulekhe okhwepaaka khwenywe okhweikulu, mubune mumang'ana kenywe komwekhonyo; Okhuba OMWAMI ni Nyasaye omanyilisianga, ne akhalachilanga emilimo chiosi echiabandu bakholanga.

⁴Obuyingo bwabasikari betsingufu bufunakwanga, nebutswa abatekhele bakufuhalanga okhusila.

⁵Abandu abali nibekura luno batiyilanga abandu khulwo okhunyoola ebiokhulia, nebutswa abalinji neinzala sibasili neinzala tawe. Omukhasi omukumba wibuye abaana bane nabataru ne omukhasi wabaana abenji usikaye butswa.

⁶OMWAMI yeeranga khandi akalusia obulamu, ahilanga abandu Emakombe khandi abalumusia.

⁷Akholanga abandu abalala okhuba abatakha ne abandi okhuba abahinda; atutuyianga abandi ne abandi nabakalihia.

⁸Achinguulanga abamanani okhurula mubumanani bwabwe, nahinia abatakha musibi siabwe. Abakholanga okhuba abalina babaruchi, nababikha habundu holuyali. Emise chiesibala nechio MWAMI, khuchio wayombokhakhwo esibala.

⁹“Asoolanga obulamu bwabandube abasubilwa, nebutswa ababi bakor'ranga musiilima. Omundu sanyoolanga tsikhabi khulwe tsingufutsie omwene tawe.

¹⁰Abasuku bo MWAMI bakhamumwe; yakhabahukumile okhurula mwikulu. OMWAMI yakhakhalachile abandu bosi musibala. Yakhahaane obunyali khumuruchi uwe, yakhahe omuruchiwe omwelwa obulechi.”

¹¹Ma Elikana nakalukha ingowe Rama nebutswa omusiani Samweli namenya Shilo narumikhila OMWAMI hasi homwesaalisi Eli.

¹²Abasiani ba Eli bali abasiamu. Sibahelesia OMWAMI oluyali tawe.

¹³Khandi sibalonda amalako akebaalanga khusitonye siomusango esiomwesaalisi akwananga okhunyoola okhurula khubandu tawe. Nebutswa olwomundu yahaananga omusangokwe, omurumikhi womwesaalisi yetsanga nende ehuma yameno kataru. Olwe inyama yali nesitekhwa,

¹⁴yafumiranga mundabu eyatekhelwangamwo ne esiehuma yafumirangakhwo sialinji esiomwesaalisi. Abaisiraeli bosi abetsanga Shilo okhuhaana omusango kwabwe bakholwanga mbwo.

¹⁵Okhumeetakhwo, kata amafura nikasili okhuhiinibwa khunyama mbu kasambwe, omurumikhi womwesaalisi yetsanga nabool'la omundu ohaananga omusango mbu, “Umbekhwo inyama eyokhusambila omwesaalisi. Siyetsa okhuhuchil'la inyama imbisi tawe.”

¹⁶Omundu uyo niyakhaboola mbu, “Lekha khukhole akali habwene ma khusambe amafura mbelio ma obukulekhwo eya wenyanga”, ne omurumikhi womwesaalisi naboola mbu, “Tawe! Umbelesie luno! Norambelesia, nzia okhuchibukula mutsingufu!”

¹⁷Tsimbi tsiabasiani ba Eli yitsi tsiali tsingali okhusila imbeli wo MWAMI, sichila sibahelesia omusango kwo MWAMI oluyali tawe.

¹⁸Olwene yilwo omusiani Samweli yatsilil'la okhufulukhan'na OMWAMI niyebikhile efoti[2] eyalombwa khukatani.

¹⁹Buli muhika mamawe Hana yamunabilanga ekanzo indititi ma amuhil'la olwa yatsitsanga nomusaatsawe okhuhaana omusango kwa buli muhika.

²⁰Kho Eli yalaamilanga Elikana nende Hana tsikhabi nabool'la Elikana mbu, “OMWAMI akhuhelesia abaana bandi m'mukhasi uyo bakalukhe musilenje siomwana owa mwahaana khu MWAMI.” Ma inyuma weyako bakalukhanga ingo wabwe.

²¹OMWAMI yahelesia Hana ikhabi ma nanyoola abaana bandi abasiani bataru nende abakhaana babili. Omusiani Samweli yakhula narumikhilanga OMWAMI.

²²Luno Eli yali nali omusakhulu okhusila. Yatsilil'la okhuhul'la kosi akabasianibe bakhol'langa Abaisiraeli, kata bakonanga nende abakhasi abakholanga emilimo hamuliangokwe Liheema liokhubaho khwo MWAMI.

²³Kho yababool'la mbu, “Busina mukholanga amang'ana yaka? Abandu bosi bambool'langa amang'ana mabi akamukholanga.

²⁴Mukalekhe, abaana banje. Yaka namang'ana amabi akabandu bo MWAMI bal'lomangakhwo.

²⁵Omundu naba nakhol'la owasie obubi, OMWAMI alamusoola. Nebutswa niwina owakhasoola omundu wosi oba niyonela OMWAMI?” Nebutswa sibahulila samwana tawe okhuba OMWAMI yali nachoomele okhubeera.

²⁶Omusiani Samweli yatsilil'la okhukhula mumubili nayanzisia OMWAMI khandi nende abandu.

²⁷Omuroobi yetsa khu Eli namang'anana yaka okhurula khu MWAMI, “Olwa kukawo nende abeinyumbaye bali abasumba bomuruchi we Misiri, ndalolekhela Haruni.

²⁸Ndeela abeinyumba yiye okhuba abesaalisi banje okhurula mutsinzibulo tsiosi tsia Baisiraeli, okhuurumikhila halusambwa, okhusamba obwali nende okhwebiikha efoti imbeli wanje. Khandi ndabahuchil'la okhubukula esitonye khumisango echiasambilwanga khulusambwa.

²⁹Kho nisina esichilanga nimulangukhila ebihanwa nende emisango echia ndalaka abandu banje okhumbelesia? Nisina esichilanga ibe Eli nohelesia abaanabo oluyali okhuyomba ise olwobalekhanga nibakhomela khulwo okhulia inyama inolu khubuli musango okwabandu banje bamban'nanga?

³⁰Ise OMWAMI Nyasaye wa Isiraeli ndasubisia mumatukhu akabira mbu abeinyumbayo nende abesilibwasio bakharumikhe imbeli wanje singa abesaalisi inziayo. Nebutswa luno mboolanga mbu, sinambahuchil'le khandi tawe. Harali ndakhahaane oluyali khu yabo abambetsanga oluyali, ne ndakhabachaaye yabo abanjaayanga.

³¹Hulile, inyinga yitsanga olwa ndakheere ababuukha bosi mubeinyumbayo nende mubesilibwasio, kho abuleho khubeinyumbayo owakhamenye okhwola mubusakhulu.

³²Nobe musibi ne wakhasiendekhele tsikhabi tsiosi etsia ndakhahelesie abandu ba Isiraeli bandi, nebutswa abulaho khubeinyumbayo owakhamenye okhwola mubusakhulu.

³³Harali ndakhalekhe mulala khubolwibulo lulwo okhuba mwoyo, naye yakhaarumikhile singa omwesaalisi. Nebutswa yakhakwe omubofu nakosia obunaayi bubwe bwosi, ne abolwibulo lulwo bandi bosi bakhafwile mwihe.

³⁴Olwa abasianibo babili, Hofuni nende Fenihasi bakhafwe khwitukhu elala, akene yaka nakakhumanyie mbu kosi akambooye kakhekhole.

³⁵Nanzahule omwesaalisi oli omusubilwa khu ise, owakhakhole kosi akanyenyanga akhole. Ndakhamuhelesie abetsukhulu abakharumikhenje imbeli womuruchi omwelwa khasotso.

³⁶Omundu wosi khubolwibulolwo owakhabule okhufwa yakhatsie khumwesaalisi uyo namureeba amuhelesie amapesa nende ebiokhulia, ne yakhareebe mbu ahuchil'lwe okhukhonyel'la abesaalisi omulimo kho abe onyala okhunyoola esialia.”