Read lunyore 1 SAMWELI 20 Bible Online

1 SAMWELI 20 - lunyore bible

1 SAMWELI 20

¹Kho Daudi yelukha okhurula Nayotsi mu Rama natsia aha Yonatsani yali ma nareeba mbu, “Nisina esiakhol'le? Nimang'ana sina amabi okhusila akakhol'le? Nibubi sina obwa kholeye papa uwo obuchilanga niyenya okhunzira?”

²Yonatsani nakalusia mbu, “Sinofwekhwo kata nahati tawe! Papa wanje yambool'langa liosi eliayenya okhukhola, libe elifwana mbwena, ne siyakhambisile yaka tawe. Yako sikanyalikha tawe!”

³Nebutswa Daudi nakalusia naboola mbu, “Papa uwo wamanya bulahi singa obwe ibe wanyanza okhusila, ma ukhalachile mumwoyokwe mbu oramanyakhwo aka aloosianga okhukhola, sichila kakhasaalisia omwoyokwo okhusila. Ndesuhanga khuibe muliira lio MWAMI oli mwoyo mbu ndi butswa khundulo khwolufu!”

⁴Yonatsani naboola mbu, “Nzia okhukhola siosi esia wenya.”

⁵Daudi nakalusia naboola mbu, “Mukamba nelitukhu lielisabo liomwesi omutoro, ne kenyekhanga ndie halala nomuruchi. Nebutswa nololanga nobulahi, nanzie okhwebisa mumukunda okhwola khumukolooba kwelitukhu elilonda mukamba.

⁶Papawo naba narakhandolakhwo khubiokhulia, omubool'le mbu ndaali okhukhureeba obweyangu mbu nzie bwangu ingo Betselehemu sichila nelitukhu liokhuhaana omusango kwa buli muhika khubeinzu yefwe bosi.

⁷Naba niyakhaboola mbu, ‘Kali bulahi,’ kho nambe nomulembe. Nebutswa naba nahambwa nelileko nomanya mbu ali nelichoomo liokhuusaalisia.

⁸Yanza ukhol'le ise omurumikhiliwo ling'ana yili ma ohesie esiesuho esitsienukhu esia wali okhundesuhila. Nebutswa nimba nindi nesikha unzire ibe omwene! Busina umbile khu papawo yanzire?”

⁹Yonatsani nakalusia Daudi naboola mbu, “Ling'ana yilio lirabakhwo mwiwe tawe! Nimba nindakhamanya mbu siahene papa wanje yenyanga okhukhusaalisia, sindakhakhubool'la?”

¹⁰Ma Daudi namureeba mbu, “Niwina owanoumbool'le nikali papawo yakhakhukalusia mwileko?”

¹¹Yonatsani namukalusia mbu, “Chenda khutsie m'mukunda.” Kho nibatsia,

¹²ma Yonatsani nabool'la Daudi mbu, “OMWAMI Nyasaye wa Isiraeli abe omukobokheli wefwe! Khusaa singa yino litukhu liamukamba nende elilondakhwo, nareeba papa wanje. Amakanike khuibe nikali amalahi nakhurumile ling'ana.

¹³Naba napaalanga okhukhusaalisia, OMWAMI yanzire ise nimba nirakhakhuribul'la nende okhukhuha injila yokhukhuhonokosia. OMWAMI abe halala n'nawe singa obwa yabeyenje na papa wanje.

¹⁴Nase nimba nindakhaba mwoyo, mwatsa ohesie esiesuho sisio esitsienukhu ma obe omusubilwa khu ise; nebutswa nimba nindakhafwa,

¹⁵otsilil'le okhumanyia obusubilwabwo khubeinzu yanje inziayo. Ne olwo MWAMI nabe nahinisie abasukubo bosi khusibala,

¹⁶kho esiesuho hakari wanje n'nawe sirakhafwa tawe. Nisiba nisifwa OMWAMI yakhakhuhe esinyasio.”

¹⁷Yonatsani yabool'la Daudi amwesuhile khandi mbu wamuyanza, sichila Yonatsani yali niyayanza Daudi singa obwa yeyanzanga omwene.

¹⁸Ma Yonatsani namubool'la mbu mbu, “Okhubela mbu mukamba nelisabo liomwesi omutoro, nakamanyikhe mbu sioliho tawe sichila indebeyo khubiokhulia nebe ikhaya.

¹⁹Litukhu elilonda eliamukamba nakamanyikhe okhusila mbu sioliho tawe; kho otsie webise habundu aha wali okhwebisakhwo olwokhuranga ma webise inyuma wesifuumi siamachina.

²⁰Nase nandase tsisele tsitaru khusifuumi yisio singa ol'la olasanga khusindu esichomekhe.

²¹Ma narume omurumikhili wanje okhutsia okhutsitoola. Nimba nimubool'la ‘Lola tsisele tsili khulubeka lulwo yilu; tsibukule,’ yaka kamanyianga oli nomulembe kho onyala okhwitsa. Ndesuhanga muliira lio MWAMI oli mwoyo mbu, sinobekhwo musibi siosi tawe.

²²Nebutswa nimba nimubool'la mbu ‘Tsisele tsili khulubeka lulwo lundi,’ kho orule otsie sichila OMWAMI ukhurumile otsie.

²³Ne khwing'ana liesiesuho hakari wanje n'nawe, OMWAMI abe omukobokheli mbu nakhulihesie inziayo.”

²⁴Kho Daudi yebisa m'mukunda. Khwitukhu lielisabo liomwesi omutoro, omuruchi saulo yekhala okhulia ebiokhulia,

²⁵ma niyekhala khundebeye yakhasotso eli ahembi khwisisi. Abineri yekhala hasibafuwe ne Yonatsani niyekhala okhuhengana n'naye. Indebe ya Daudi yali ikhaya,

²⁶nebutswa Saulo siyaralakhwo esindu litukhu yilio tawe, sichila yapaala mbu, “Okhwola esindu siekholekhele khuye ma sali omusiyikhu tawe.”

²⁷Khwitukhu elialondakhwo, litukhu lielisabo liomwesi omutoro nilibir're, indebe yali nesili ikhaya, ma Saulo nareeba Yonatsani, “Busina Daudi naretsa khusiokhulia olwabeeye nende olwaleelo?”

²⁸Yonatsani nakalusia mbu, “Yareebele obweyangu okhutsia Betselehemu.

²⁹Yambooleye mbu, ‘Mwatsa lekha nzie sichila abeinzu yefwe bosi bali nelisabo liokhuhaana omusango mwitaala, ne omusiani wefwe yambooleye mbu okhwola nzieyo. Khe noba noli omulina wanje, yanza umbuchil'le nzie okhulola abekho banje.’ Nisio esichil'le narekhela khundebe yiye khubiokhulia.”

³⁰Saulo yali noburima obukali khu Yonatsani ma namubool'la mbu, “Ibe omusiani womukhasi omubi khandi owendiri! Luno manyile mbu oli khulubeka lwa Daudi ma wesimbianga omurwe omwene nende mamawo!

³¹Ibe siomanyile mbu oluhono lwa Daudi asili mwoyo, siwakhabekhwo omuruchi wesibala sino tawe? Kho tsia omuleere hano; okhwola afwe!”

³²Yonatsani namukalusia mbu, “Esichila afwe nisina? Akhol'le sina esibi?”

³³Ma nilwo olwa Saulo yalasa lifumo khu Yonatsani mbu limwire, ma Yonatsani namanya mbu samwana yali nachoomele okhwira Daudi.

³⁴Yonatsani yarula khumesa mwirima ma siyaliakhwo esindu litukhu yilio tawe. Nalio liali litukhu liakhabili khwisabo liomwesi omutoro. Yabeelela mumwoyo okhusila khulwa Daudi sichila Saulo yali namunyekele.

³⁵Litukhu elialondakhwo mukamba tsuli Yonatsani yatsia okhulola Daudi singa bali nibalakan'ne. Yatsia halala nomusiani omubuukha

³⁶ma namubool'la mbu, “Wilukhe otsie okhutoola olusele olwa nzia okhulasa.” Omusiani tsana yelukha ne Yonatsani nalasa tsisele imbeliwe.

³⁷Olwomusiani uyo yoola aholusele olwali nilulasilwe, Yonatsani yamubool'la nomwoyo omukali, “Olusele luli hambeli okhusila!

³⁸Orasinjila butswa yaho tawe! Tsia bwangu!” Omusiani uyo natoola olusele nakalusisia omwamiwe.

³⁹Nebutswa omusiani uyo siyali okhumanya esifune siako tawe. Yonatsani nende Daudi bonyene nibo abamanya esifune siako.

⁴⁰Yonatsani nahelesia omusiani uyo ebilasan'no bibie namubool'la abikalusie mwitaala.

⁴¹Olwomusiani yali natsiye, Daudi yarula inyuma wesifuuma siamachina aha yali niyebisile, nasikama ma niyenama hasi hali khataru. Yonatsani halala na Daudi balakaya olwa bali nibatsunzunananga; esibeela sia Daudi siali esikali okhuyomba esia Yonatsani.

⁴²Ma Yonatsani nabool'la Daudi mbu, “Nyasaye abe halala n'nawe. OMWAMI nalole mbu ibe n'nase, nende abolwibulolwo nende olwanje bakhahesie esiesuho esitsienukhu esie ibe n'nase khwalakana.” Daudi narula natsia ne Yonatsani nakalukha mwitaala.