Read lunyore 1 SAMWELI 21 Bible Online

1 SAMWELI 21 - lunyore bible

1 SAMWELI 21

¹Daudi yatsia khumwesaalisi olangwanga Ahimeleki mwitaala lia Nobu. Ahimeleki yetsa okhumwakan'na natechelanga ma namureeba mbu, “Witsile yino wenyene busina?”

²Daudi namukalusia naboola mbu, “Ndi hano khumulimo kwomuruchi. Yambooleye rabool'lakhwo omundu esia yarumile okhukhola tawe. Nebutswa abandu banje mbabooleye khwakan'ne habundu nalebe.

³Nisina esiolikhwo n'nasio? Mbelesia emihayila chiemikaati chirano nohomba siosi siosi esiolikhwo n'nasio.”

⁴Omwesaalisi namubool'la mbu, “Sindikhwo nomukaati kwosi okhwokhuhelesia abandu tawe, ndi butswa nende omukaati kwo mu Hekalu. Onyala okhukulia nikakhaba abasikaribo sibabeyekhwo nabakhasi babwe ahembi yaha tawe.”

⁵Daudi nakalusia naboola mbu, “Manyile sibabeyekhwo nabakhasi babwe tawe. Abasikari banje babetsanga abasiiyikhu khasotso kata olwa batsitsanga khumulimo okurali omuchomekhe. Kho sibakhaba abatsienukhu khumulimo omuchomekhe yiku!”

⁶Kho omwesaalisi uyo nahelesia Daudi omukaati kwo mu Hekalu sichila emikaati echia yali n'nachio nemihayila echiali nichihan'nwe khu Nyasaye echiali nichihinibubwe khumesa yo MWAMI ne echindi emiyia nichireywekhwo.

⁷Omukhongo wabarumikhili ba Saulo olangwanga Doeki okhurula Edomu, yali nali mu Hekalu litukhu yilio sichila bamutakha okhuhesia omulukha kwo MWAMI.

⁸Daudi nabool'la Ahimeleki mbu, “Olikhwo nende lifumo nohomba olukanga olwonyala okhumbelesia? Lilako liomuruchi lichil'le nirula bwangu ma kata nimbula esaa yokhubukula olukanga nohomba esilasan'nwe habundu hosi.”

⁹Ahimeleki namukalusia naboola mbu, “Ndi butswa nolukanga lwo Omufilisiti Goliati owawer'ra mwibanda lia Ela. Luli inyuma weingubo ya efoti ne lubohelwe musitambaya. Noba nolwenya olubukule, nilwo olwa ndi n'nalwo.” Daudi naboola mbu, “Mbelesia okhuba lubulaho olundi ol'lahi habundu undi hosi!”

¹⁰Kho Daudi yelukha okhurula imbeli wa Saulo natsia khumuruchi Akishi wa Gatsi.

¹¹Abakhongo bomuruchi nibabool'la Akishi mbu, “Uyu sali Daudi omuruchi wesibala siabwe? Uyu niye owabakhasi bemba olwa basina nibaboola mbu, ‘Saulo wir're etsielefu nebutswa Daudi wir're etsielefu amakhumi!’ ”

¹²Amang'ana kabwe kasaalisia omwoyo kwa Daudi okhusila ma naba noburi obukali khumuruchi Akishi.

¹³Olwa balinji n'naye, Daudi yekholanga omusilu ma akhola ebindu biobulalu, olwa bateemanga okhumutiila yakhwarulanga amasanda khubilibwa biomwitookho naronyia amare, khusilefu sisie.

¹⁴Kho Akishi nabool'la abakhongobe mbu, “Lole, omundu uyu nomulalu! Mumul'ler're khu ise busina?

¹⁵Ise sindi nabalalu abambel'le? Busina munder'ranga oundi wokhuumeta lileko khulwo okhukhola ebindu bioluhingwa munzu yanje omwene?”