Read lunyore 1 SAMWELI 22 Bible Online

1 SAMWELI 22 - lunyore bible

1 SAMWELI 22

¹Daudi yelukha okhurula mwitookho lia Gatsi natsia mulwanga oluli ahembi mwitaala lia Adulamu. Olwa abasiani babwe nende abeinyumba yabwe bosi bahul'la mbu ali mulwanga, beyonga khuye.

²Abandu abali okhusandibwa, noho abelikobi nohomba abarayehul'la bulahi batsia khuye, ne bali abandu ahembi tsimia tsine; ne yamala naba omwemeli wabwe.

³Daudi yatsitsachil'la okhurula habwene yaho natsia Misipa musibala sia Moabu, ma nabool'la omuruchi wa Moabu mbu, “Mwatsa ohuchil'le Papa wanje nende mama wanje bamenye n'nawe okhwola olwa nzia okhumanyilisia aka Nyasaye yetsa okhuukhol'la.”

⁴Kho Daudi nalekhela omuruchi wa Moabu abebuli baabe. Nabo bamenya n'naye oluhono lwa Daudi yali nasiebisile mulwanga.

⁵Ma omuroobi wa Nyasaye niyetsa khu Daudi naboola mbu, “Oramenya hano tawe; tsia bwangu musibala sia Yuda.” Kho Daudi yarula natsia mumutsuru kwa Heretsi.

⁶Litukhu lindi Saulo yali nali Gibea, niyekhaye hamusaala omukali okuli khusikulu nali nelifumo mumukhonokwe ne abakhongo babasikari baabe bali nibasinjiyeho, ma nibamufumbiye. Yabool'lwa mbu, Daudi nende abandube banyoolekhele,

⁷ne nabool'la abakhongo babasikaribe mbu, “Hulile inywe abandu bowibulo lwa Benjameni! Mupaalanga Daudi namuhelesie inywe mwesi emikunda nende emikunda chiemisabibu nende emikunda chindi ma amukhole abakhongo babasikaribe?

⁸Yako niko akachilanga nimusiemana? Sialikhwoho kata mulala khwinywe owambool'la mbu omusiani wanje bahambana nende Daudi tawe. Abulaho oumendel'langa nohomba okhumbool'la mbu Daudi, mulala khubasikari banje, luno akhabanga injila yokhunzira khandi mbu omusiani wanje amutsuubanga.”

⁹Doeki owali nasinjiyeho halala nabakhongo babasikari ba Saulo yaboola mbu, “Ndaluutsi Daudi olwa yatsiye khu Ahimeleki omusiani Ahitubu mwitaala lia Nobu.

¹⁰Ahimeleki yareeba OMWAMI aka Daudi akhoya okhukhola ma nahelesia Daudi ebiokhulia nende olukanga olwali lwo Mufilisiti Goliati.”

¹¹Kho omuruchi Saulo yarumana mbu Ahimeleki Omwesaalisi nende abekhobe bosi abali nibali abesaalisi mwitaala lia Nobu balangwe.

¹²Saulo nabool'la Ahimeleki “Hulila, ibe Ahimeleki!” Ahimeleki nakalusia mbu, “Nise uno Omwami wanje.”

¹³Saulo namureeba mbu, “Esichilanga ibe na Daudi nimuloosia okhunzira nisina? Busina nomuhelesia ebiokhulia, olukanga ma nomusaayila khu Nyasaye? Luno ungalukhan'ne ne akhabanga obweyangu okhunzira!”

¹⁴Ahimeleki nakalusia naboola mbu, “Daudi nomusikari omusubilwa khubasikari aboli n'nabo! Ye wateesia omukhaanawo, netswoni yabalindi baabo khandi abandu abali hango haho bamuhelesia oluyali olukali.

¹⁵Yee, tooto mwene ndamusaayiye khu Nyasaye ne siluli nilwo olwokhuranga tawe. Ne khumang'ana kokhukhusiemana mbu wirwe, orambal'lamwo kata nende omwikho wanje wosi tawe. Simanyilekhwo esindu siosi khwing'ana yili tawe.”

¹⁶Omuruchi naboola mbu, “Ahimeleki, ibe halala nabekhobo bosi mulerwa.”

¹⁷Ma nabool'la abalindi abali nibasinjiye aha yali nali mbu, “Mwire abesaalisi bo MWAMI! Baloosia masilisi na Daudi ne sibaimbool'la mbu wilukhile tawe; kata olwa bali nibakamanyile kosi.” Nebutswa abalindi yabo basuula okhwira abesaalisi bo MWAMI.

¹⁸Kho Saulo yamala abool'le Doeki mbu, “Ibe obeere!” Ma Doeki nabeera bosi. Litukhu yilio yeera abesaalisi amakhumi munane nende barano abali nibahuchil'lwa okhuchinga Lisanduku lie Indakano.

¹⁹Khandi Saulo yalaka mbu abandu abamenyanga Nobu litaala liabesaalisi berwe; abasaatsa na bakhasi, abaana bati nende abatoro, tsing'ombe, tsipunda nende amakondi — yibio biosi bierwa.

²⁰Nebutswa Abiatsari mulala khubasiani ba Ahimeleki yahonokokha ma niyeyonga na Daudi.

²¹Abiatsari yabool'la Daudi obwa Saulo yali niyeer're abesaalisi bo MWAMI.

²²Ma Daudi namubool'la mbu, “Olwa ndalola Doeki nali Nobu, ndamanya mbu siahene nabool'le Saulo. Kho nise ochil'le abekho baabo bosi nibeerwa.

²³Omenye n'nase ne oraria tawe. Saulo akhabanga okhwira ibe n'nase, nebutswa ibe olahona noli n'nase.”