Read lunyore 1 SAMWELI 26 Bible Online

1 SAMWELI 26 - lunyore bible

1 SAMWELI 26

¹Abandu nalebe okhurula Sifu betsa khu Saulo nali Gibea nibamubool'la mbu Daudi webisile khusikulu sia Hakila ahembi nende esitsiimi sie Buyahudi.

²Saulo yatsia bwangu halala nabasikari abalulu etsielefu tsitaru okhurula mu Isiraeli nibatsia musitsiimi sia Sifu okhukhaaba Daudi.

³Bakhupa ekambi yabwe ahembi khumuhanda okuli khusikulu sia Hakila. Daudi yali nasili musitsiimi. Ne olwa yahul'la mbu Saulo yali niyetselemwo okhumukhaaba,

⁴yaruma abalambuuli ba masilisi, ne nibanyoola mbu nakatooto mbu siahene Saulo yali niyetselemwo.

⁵Yatsia bwangu ma nalola habundu ha Saulo yali nakon'ne halala nende Abineri omusiani wa Neri, omukhongo wamaheke. Saulo yakona mukambi mukari ne abandube nibakhoma amaheema okhumubotokhana.

⁶Ma Daudi nareeba Ahimeleki Omuhiti, nende Abisai omusiani wanga Yoabu (mama wabwe yali Seluya) mbu, “Niwina khwinywe babili owananzie n'naye mukambi ya Saulo?” Abisai nakalusia mbu “Ise nanzie n'nawe.”

⁷Kho obutukhu yibwo Daudi halala nende Abisai benjila mukambi ya Saulo nibamunyoola nakonanga hakari wekambi ne lifumo lilie nilifumir'rwe hasi hamurwe kukwe. Abineri nende abasikari ba Saulo bali nibakonanga nibamufumbiye.

⁸Abisai nabool'la Daudi mbu, “Nyasaye umal'le okhura omusuku uwo mumakhono kaako obutukhu bwolwaleelo. Luno lekha mufumire nelifumo lilie putu okhwola hasi l'lala lwonyene, sindafumira khabili tawe!”

⁹Nebutswa Daudi nabool'la Abisai mbu, “Oramusaalisia tawe! OMWAMI alahaana esinyasio khu uyo owakhasaalisia omuruchi owa yeela.”

¹⁰Daudi nameeta okhuboola mbu, “Khu Nyasaye oli mwoyo, manyile mbu OMWAMI mwene nayeere Saulo inyinga yiye yokhufwa niyol'le nohomba nafwile mwihe.

¹¹OMWAMI yambele mbu rateema okhusaalisia uyo owo MWAMI yeela okhuba omuruchi tawe! Chenda khubukule lifumo lilie nende isongoye eyamaatsi ma khutsie.”

¹²Kho Daudi yabukula lifumo nende isongo yamaatsi okhurula hamurwe kwa Saulo ma ye nende Abisai nibarulaho. Abulaho owabalola nohomba owamanya akali nikekhol'le kata owabuukhakhwo tawe. Bosi tsindoolo tsiali nitsibalekele sichila Nyasaye yali nabahelesisie tsindoolo tsinyinji.

¹³Ma Daudi nakhalania okhutsia oluchelekha lundi lwe libanda ma natsia khubutenje bwesikulu olurambukho olurambi okhurula ha Saulo yali nali,

¹⁴ma nalanjisia abasikari ba Saulo nende Abineri mbu, “Abineri naboola! Oli onyala okhumbulila?” Abineri nareeba mbu, “Niwina uyo okhupanga liyoka nabuusia omuruchi?”

¹⁵Daudi nakalusia mbu, “Abineri, soli niwe omusaatsa omukhongo mu Isiraeli? Kho busina oralindanga omwami uwo omuruchi? Esaa tsa yino omundu yetsele mukambi okhwira omwami uwo.

¹⁶Sohesisie omulimo kukwo tawe. Ndesuhanga khu MWAMI oli mwoyo mbu inywe mwesi mukhoyele okhufwa sichila simulinde omwami wenywe owo MWAMI yeela okhuba omuruchi tawe. Lole! Lifumo liomuruchi lili hena? Isongo yamaatsi eyali hamurwekwe eli hena?”

¹⁷Saulo yamanyilisia omwoyo kwa Daudi ma nareeba mbu, “Daudi, niwe uyo omwana wanje?” Daudi namukalusia mbu, “Yee omwami wanje.”

¹⁸Ma nameeta okhuboola mbu, “Omwami, nisina esichilanga niunondel'la ise omurumikhili uwo? Nisina esiakhol'le? Nibubi sina obwa khol'le?

¹⁹Omwami wanje, ohuyie akanzia okhuboola. Naba nali OMWAMI okhurumanga mbu unondel'le, okhuhaana omusango khuye khulachila akalukhanie amakani kaake, nebutswa nibaba nibali abandu abakhurumanga, esilaamo sio MWAMI sibakwile. Okhuba bakhungania okhurula musibala sio MWAMI okhutsia musibala sindi ahanyala okhwekayakaya abanyasaye bandi.

²⁰Oralekha nzir'rwe musibala esicheni ehale okhurula khu MWAMI tawe. Nisina esiakhachila omuruchi wa Isiraeli yetse okhwira esikilimboto singa ise? Busina ahimanga ise singa linyonyi liomubulimo?”

²¹Saulo nakalusia mbu, “Khol'le obubi. Hamba ingo Daudi omusiani wanje! Sinakhusaalisiekhwo khandi tawe sichila siwali okhunzira obutukhu bwan'nondi tawe. Ndakhol'le akobusilu! Ndali okhukhola ling'ana liibi okhusila!”

²²Daudi nakalusia naboola mbu, “Omwami, lifumolio ndieli, ruma mulala khubasikaribo yetse okhulibukula.

²³OMWAMI ahaananga omukabwa khuyabo abali abasubilwa nende abalunji. Olwaleelo yali okhukhura mumakhono kanje, nebutswa sikhusaalisisie, ibe owo MWAMI yeela okhuba omuruchi tawe.

²⁴Singa butswa obwa ndaali okhubelel'la obulamubwo olwaleelo, OMWAMI yakhol'le singa mbwo ma yambinie mumanyakhano kosi!”

²⁵Saulo nabool'la Daudi mbu, “Nyasaye akhulaamile ikhabi omusiani wanje! Nobetsenje neikhabi indahi mukosi akanokholenje!” Kho Daudi yatsia injilaye ne Saulo nachelela ingowe.