Read lunyore 1 SAMWELI 27 Bible Online

1 SAMWELI 27 - lunyore bible

1 SAMWELI 27

¹Daudi yaboola mumwoyo kukwe mbu, “Litukhu elala Saulo nayanzire. Eliakhabakhwo lilahi khuise nokhwilukhila musibala sia Filisiti. Kho Saulo nahiniekhwo omwoyo okhuukhaaba mu Isiraeli nase ndakhaba mumulembe.”

²Kho Daudi halala nabandube tsimia tsisasaba barula nibatsia khu Akishi omusiani wa Maoki, omuruchi wa Gatsi.

³Daudi halala nabandu baabe nende abetsinyumba tsiabwe bamenya musibala sia Gatsi. Daudi yatsia halala nabakhasibe babili, Ahinoamu okhurula Yesereli, nende Abigaeli omukhasi sika Nabali, okhurula Karimeli.

⁴Olwa Saulo yahul'la mbu Daudi wilukhiye musibala sia Gatsi yahiniakhwo omwoyo okhumukhaaba.

⁵Daudi nabool'la Akishi mbu, “Noba noli omulina wanje yanza umbelesie litaala lititi menyemwo. Omwami, sibulaho esiakhachila ise menye n'nawe mwitookho likali.”

⁶Kho Akishi yamuha litaala lia Sikilaki ne khulwe esifune yisio Sikilaki libetsanga litala liabaruchi ba Yuda okhurula olwene yilwo.

⁷Daudi yamenya Filisiti khuluhono lwomuhika mulala nemiesi chine.

⁸Mumatukhu yako Daudi nende abandu baabe baseeranga abandu ba Keshuru, Kirisi nende Amaleki, abali nibamenya musibala yisio khulwo oluhono olurambi. Yaseeranga esibala siosi okhwola Suru nende Emisiri,

⁹ne yeeranga abasaatsa nabakhasi bosi nayaaka amakondi, tsing'ombe, etsipunda, tsingamia, kata nende tsingubo. Ma akalukha khumuruchi Akishi,

¹⁰owamureebanga mbu, “Nihena ohotsiye khuseera olwaleelo?” Ne Daudi yamubool'langa mbu yali okhutsia elubeka lwe enandete wa Yuda nohomba musibala siolwibulo lwa Yerahimeli nohomba musibala esia Abakeni bamenyanga mwo.

¹¹Daudi yeeranga abandu bosi, abasaatsa nende abakhasi, kho omundu wosi arakhasikalakhwo owakhakalukha Gatsi okhuboola aka Daudi nende abandube bakhol'le tawe. Yaka niko aka Daudi yakholanga amatukhu kosi akayamenyanga Filisiti.

¹²Nebutswa Akishi yasubila Daudi ma naboola mumwoyokwe mbu, “Daudi wasuulwa okhusila nende abandu baabe Abaisiraeli khulwe yako nabetsenje omurumikhili wanje khasotso.”