Read lunyore 1 SAMWELI 29 Bible Online

1 SAMWELI 29 - lunyore bible

1 SAMWELI 29

¹Abafilisiti baleera abasikari babwe okhwebunjikha Afeki, olwa Abaisiraeli bali nibebunjikhile hasitaho esili Mwibanda lia Yesereli.

²Abaruchi barano abesibala sia Filisiti barula nemikanda chiabwe chiabasikari emia ndala nende echielefu ndala. Daudi nabandu baabe babalonda inyuma nibali nende ouruchi Akishi.

³Abakhongo babasikari ba Filisiti babalola ma nibareeba “Abaheburania yaba bakholanga sina hano?” Akishi nakalusia naboola mbu, “Uyu ni Daudi omukhongo wabasikari ba Saulo omuruchi wa Isiraeli. Yamenyelenje n'nase khulwa amatukhu amenji. Okhurula niyetsa khu ise ranyoolakhwo esikha muye tawe.”

⁴Nebutswa Abakhongo babasikari ba Filisiti bali nelirima nende Akishi ma nibamubool'la mbu, “Kalusia omundu uyo mwitaala liawamuhelesia. Oralekha atsie mwihe halala n'nefwe tawe; anyala okhukhukalukhana mwihe ma akhulwane. Ninjila sina indahi eyayakhayanzisisiamwo omwami uwe nikhurali okhwira abandu befwe?

⁵Kata mbwo uyu ni Daudi owabakhasi bembanga nibasina ne nibaboola mbu, ‘Saulo wir're etsielefu nebutswa Daudi wir're etsielefu amakhumi.’ ”

⁶Akishi yalanga Daudi namubool'la mbu, “Khwesuyilanga khu Nyasaye wa Isiraeli oli mwoyo mbu wabeyenje omusubilwa khu ise; ne ndakhayanzisibwa okhutsia n'nawe okhulwana mwihe yili. Ranyoolakhwo esikha mwibe okhurula olwa wetsa khu ise. Nebutswa abaruchi bandi sibakhuhuchiliye tawe.

⁷Khulwe yako kalukha ingo mumulembe ne orakholakhwo esindu siosi esiakhabasinyisia tawe.”

⁸Daudi nakalusia mbu, “Omwami nisina esiakhol'le esibi? Nikaba nikali singa oboolanga mbu osili okhunyoolakhwo esikha siosi mu ise okhurula olwa ndachiaka okhukhurumikhila, khulwa sina mbule okhutsia n'nawe okhulwana abasuku baabo, ibe omwami wanje khandi omuruchi wanje?”

⁹Akishi nakalusia naboola mbu, “Mbuchil'langa akoboolanga. Khubalanga okhuba omusubilwa singa om'malaika ali omusubilwa khu Nyasaye. Nebutswa abaruchi bandi babooye mbu oratsia n'nefwe mwihe tawe.

¹⁰Kho luno Daudi, halala nende bosi abarula khu Saulo nimwitsa khu ise, mukamba namubuukhe mumabwebwe ma namurule isi niyakhalaba.”

¹¹Kho Daudi nende abasikari baabe barula mumabwebwe omukamba kwalondakhwo nibakalukha Filisiti, ne Abafilisiti nibatsia Yesereli.