Read lunyore 1 SAMWELI 30 Bible Online

1 SAMWELI 30 - lunyore bible

1 SAMWELI 30

¹Inyuma wamatukhu kabili Daudi nabandube bachelela Sikilaki. Abaamaleki bali nibaser're enandete wa Yuda nende Sikilaki. Bali nibasambile litaala

²ma nibatiil'le abakhasi bosi; sibali nibeer'rekhwo omundu wosi tawe, nebutswa bali nibabukuye abandu bosi nibatsiye n'nabo.

³Olwa Daudi nende abandube boolayo, banyoola litaala liabwe ndisambilwe khandi abakhasi babwe nende abaana babwe abasiani nabakhaana bali nibahil'lwe.

⁴Daudi nende abandu baabe bachiaka okhulakaya ne sibabunakhwo tawe okhwola olwa bachonya.

⁵Kata abakhasi ba Daudi babili Ahinoamu nende Abigaeli bali nibahil'lwe.

⁶Yaho Daudi yali musibi esikali sichila abandube bali nibasinyikhile okhusila khulwa okhunulwa abaana babwe, ne baboola mbu betsa okhumulasa namachina; nebutswa OMWAMI Nyasayewe yamuha ikholo nyomu.

⁷Daudi nabool'la omwesaalisi Abiatsari omusiani wa Ahimeleki mbu, “Ndeer'ra Lisanduku lie Indakano.” Abiatsari namuleer'ra.

⁸Daudi nareeba OMWAMI mbu, “Nyala okhulondel'la abanuuli yabo? Ne ndakhabanyoola noho?” OMWAMI namukalusia mbu, “Balondel'le; witsa okhubanyoola ma osoole bosi abatil'lwe.”

⁹Kho Daudi nende abasikaribe etsimia tsisasaba nibachaaka okhubalondel'la, ne olwa boola hamuchela kwa Besori abalala khubo basikalaho.

¹⁰Daudi natsilil'la okhutsia nende abandu etsimia tsine; abandi etsimia tsibili bali nibachonyele ne sibaali abanyala okhwambukha omuchela tawe, kho basikala inyuma.

¹¹Abandu abali nende Daudi banyoola omusiani Omumisiri nachendanga mubulimo nibamuleera khu Daudi. Bamuhelesia ebiokhulia nende amaatsi,

¹²amakhuyu amomu, nende ebibukara bibili biemisabibu. Olwa yali naliye, tsingufutsie nitsikalukha, siyali naliyekhwo esindu siosi kata okhunywakhwo esindu khulwa amatukhu amalamba kataru tawe.

¹³Daudi namureeba mbu, “Omwami uwo niwina ne orulanga musibala sina?” Omusiani nakalusia mbu, “Ise ndi Omumisiri, omusumba wo Omumaleki. Omwami wanje yaindekhele inyuma amatukhu kataru akahweye sichila ndabeye nindwala.

¹⁴Khwabeye nikhuyaakile esibala sia Keretsi esili enandete wa Yuda nende esibala siabandu ba Kalebu, khandi nikhusamba Sikilaki.”

¹⁵Daudi namureeba mbu, “Wakhambila owabanuuli yabo bali.” Naye nakalusia, “Ndi onyala noba niundesuhila muliira lia Nyasaye mbu sinaunzire nohomba sinaungalusie khu mwami wanje tawe.”

¹⁶Ma nahila Daudi aha bali. Abanuuli yabo bali nibasalan'ne habundu hosi nibalitsanga ne nibanywa nibasangal'langa ebindu ebinji ebia babeye nibayaakile okhurula Filisiti nende Yuda.

¹⁷Mumabwebwe litukhu elialondakhwo Daudi yabaseera ma nabalwana okhwola mukolooba. Omundu wosi khubo siyahonokokhakhwo tawe nibarali abasiani tsimia tsine abali nibanin'ne khutsingamia ma nibelukha.

¹⁸Daudi yakalusia abandu bosi nende ebindu biosi ebia Bamaleki bali nibayaakila, halala nabakhasibe babili.

¹⁹Sibulakhwoho esiali nisikor're. Daudi yakalusia abaana abasiani nende abakhaana babasikari baabe nende emianduchiosi echiali nichiyaakilwe na Bamaleki.

²⁰Khandi yakalusia ebiayo biosi biamakondi nende tsing'ombe, ne abandube babikhoma nibaboola mbu, “Yibi nebindu bia Daudi!”

²¹Ma Daudi nakalukha khubandu etsimia tsibili abali nibaramilwe okhutsia n'naye ma nibasikaye hamuchela kwa Besori. Betsa okhubukan'na Daudi nende abandu baabe, ne Daudi niyesunda aha bali nabasiesia nobusangali.

²²Nebutswa abandu bandi abemani nende abaranyala esindu abali nibatsiye nende Daudi nibaboola mbu, “Sibatsiye n'nefwe tawe. Khulwe yako sikhwitsa okhubahelesiakhwo esindu siosi esiakhuyaakile tawe. Banyala butswa okhubukula abakhasi babwe nende abaana babwe ma balole ahabatsia.”

²³Nebutswa Daudi naboola mbu, “Abaana befwe, simunyala okhukhola mbwo khubindu ebio MWAMI akhuheye tawe! Ye yakhulind'e bulahi ma nakhuhelesia obulechi khubasuku befwe.

²⁴Abulaho onyala okhuhuchil'la akamuboolanga! Fwesi okhwola khusange khumukabwa yikwo okhuhelana; wosi osikalanga nalinda ebiokhulia anyoolanga omukabwa okuhelana nende okwe uyo otsiye okhulwana.”

²⁵Daudi yalomba yili okhuba lilako ne lirumikhanga mu Isiraeli okhurula olwene yilwo.

²⁶Olwa Daudi yachelela Sikilaki, yaruma esitonye khumiandu echia yali nayaakile khubalina baabe, abali abemeli ba Yuda nababool'langa, “Sino nesihanwa khwinywe okhurula khumiandu echia khwayaakile okhurula khubasuku bo MWAMI.”

²⁷Yabiruma khubandu ba Betseli, nokhubandu abali mu Rama enandete wesibala sia Yuda nende khubandu abali mumataala ka Yatiri,

²⁸Aroeri, Sifumotsi, Eshitemoa,

²⁹nende Rakali; nende khulwibulo lwa Yerahimeli, nende khu Bakeni,

³⁰khandi khubandu abali mumataala ka Horima, Borashani, Atsachi,

³¹nende Heburoni. Yabiruma khubuli habundu aha ye nende abandu baabe bali nibabiriyeho.