Read lunyore 1 SAMWELI 31 Bible Online

1 SAMWELI 31 - lunyore bible

1 SAMWELI 31

¹Abafilisiti balwana lihe nende Abaisiraeli khusikulu sia Kiliboa. Abaisiraeli abenji beerwa mwihe yilio, ne abandi khubo halala nende Saulo nabasianibe belukha.

²Abafilisiti babalonda ma nibabatiila nibeera bataru khubasiani ba Saulo, Yonatsani, Aminadabu, nende Malikishua.

³Obulwani bwali obululu aha Saulo yali ma Saulo yalaswa nobuyingo bwabasuku ma nibumusaalisia obubi.

⁴Yabool'la omubuukha owachinganga ebilasan'nwebie mbu, “Tsomola olukanga lulwo ma unzire, kho Abafilisiti abanasibala balekhe okhukhol'lakhwo inzekhelesi ma banzire.” Nebutswa omubuukha yali noburi obukali khulwo khukhola mbwo. Kho Saulo yabukula olukanga lulwe omwene ma niyeyira n'nalwo.

⁵Olwo omubuukha uyo yalola mbu Saulo ufwiye, naye khandi yeyira nolukanga lulwe ma nafwa halala nende Saulo.

⁶Nimbwo Saulo nende abasianibe bataru halala nomubuukha uyo bafwa; abasikari ba Saulo bosi beerwa litukhu yilio.

⁷Olwa Baisiraeli abali khuluchelekha lundi lwe Libanda lia Yesereli nende abali ebukwe womuchela kwa Yorodani bahul'la mbu abasikari ba Isiraeli bali nibelukhile, khandi Saulo nende abasianibe bali nibeer'rwe, barula mumataala kabwe nibelukha. Abafilisiti nibeetsa ma nibamenya mumataala tsana.

⁸Litukhu elialondakhwo Abafilisiti batsia okhuyaaka ebindu biabandu abali nibafwiye ne banyoola emibili chia Saulo nende abasiani baabe bataru nichilambiye khusikulu sia Kiliboa.

⁹Bakhalaka omurwe kwa Saulo ma nibamunabula ebilasan'nwebie ma nibaruma abandu n'nabio musibala sia Filisiti siosi okhulandia amang'ana amalahi khubiniini biabanyasaye nende khubandu babwe.

¹⁰Ma nibabiikha ebilasan'nwe bia Saulo mu hekalu yomunyasaye omukhasi olangwanga Asitarete, ma nibakhomela omubili kukwe khwisisi mwitookho lia Betsi Shani.

¹¹Olwa abandu ba Yabeshi mu Gileadi bahul'la aka Bafilisiti bali nibakhol'le khu Saulo,

¹²abasaatsa beikholo barula nibachenda obutukhu bwosi okhutsia Betsi Shani. Babukula omubili kwa Saulo nende echiabasiani baabe okhurula khwisisi nibachikalusia Yabeshi ma nibachisambilayo.

¹³Ma nibabukula amakumba kabwe nibakayabila hasi homusaala omukali ma nibahonga okhulia khulwa amatukhu kane nakataru.