Read lunyore 1 SAMWELI 5 Bible Online

1 SAMWELI 5 - lunyore bible

1 SAMWELI 5

¹Olwa Abafilisiti bali nibabukuye Lisanduku lie Indakano, balichinga okhurula Ebenesa nibalihila mwitookho liabwe elilangwanga Ashitoti.

²Ma Abafilisiti nibalihila muhekalu yanyasaye wabwe olangwanga Dakoni nibalibiikha ahembi nende esifwanani sia Dakoni.

³Litukhu elialondakhwo mukamba tsuli abandu ba Ashitoti balola esifwanani sia Dakoni siali nisikwiye mafung'ama imbeli we Lisanduku lie Indakano yo MWAMI. Kho nibasisinjisia ma nibasikalusia mubukono bwasio.

⁴Khandi omukamba kwalondakhwo, balola mbu esifwanani yisio siali nisikwiye imbeli we Lisanduku lie Indakano. Olwene yilu omurwe kwasio, namakhono kasio kabili biali nibimekukhilekhwo ne biali hasi mumuliango; ma Dakoni nasikala esimutu.

⁵Nisio esichila kata naleelo abesaalisi ba Dakoni nende abasiekayakayanga mu Ashitoti basiilanga habundu yaho ne sibaseenanga ebilenje biabwe khumusinji tawe.

⁶OMWAMI yahelesia abandu ba Ashitoti esinyasio esikali ma nabarisia okhusila. Yabaha esinyasio halala nabandu abali mutsisoma etsili ahembi khubo khulwokhubakhuya nobulwaye bwelibumba.

⁷Olwa balola akali nikekholanga, baboola mbu, “Nyasaye wa Isiraeli akhuhelesianga esinyasio ifwe halala nende nyasaye wefwe Dakoni. Sikhulahuchil'la Lisanduku lie Indakano ya Nyasaye litsilil'la okhuba n'nefwe tawe.”

⁸Kho baruma abarume batsie okhulanga abaruchi barano ba Filisiti ma nibabareeba mbu, “Khunyala okhukhol'la sina Lisanduku lie Indakano ya Nyasaye wa Isiraeli?” Nabo nibabakalusia mbu, “Mulikalusie Gatsi.” Kho balihila Gatsi litookho lindi elili mu Filisiti.

⁹Nebutswa olwa boola Gatsi OMWAMI yahaana esinyasio khwitookho yilio khandi ma nabarisia okhusila. Yabakhuya nobulwaye bwelibumba obwasalaana mubandu bosi abomwitookho yilio, abaana bati nende abandu bakhulundu.

¹⁰Kho bahila Lisanduku lie Indakano mwitookho lia Filisiti lindi elilangwanga Ekironi. Nebutswa olwa liolayo, abandu baboola nomwoyo omukali mbu, “Baleer're Lisanduku lie Indakano ya Nyasaye wa Isiraeli kho bakhwire fwesi!”

¹¹Kho khandi balanga abaruchi ba Filisiti bosi ma nibababool'la mbu, “Kalusie Lisanduku lie Indakano ya Baisiraeli aha liarula kho libule okhukhwiira nende abetsinyumba tsiefwe.” Bwaliho oburi obukali mwitookho liosi sichila Nyasaye yali nabahetsanga esinyasio esikali.

¹²Kata yabo abarafwa, bahambwa nobulwaye bwelibumba ne abandu balakayila abanyasaye babwe babakhonye.