Read lunyore 1 SAMWELI 6 Bible Online

1 SAMWELI 6 - lunyore bible

1 SAMWELI 6

¹Lisanduku lie Indakano ya Nyasaye liamenya musibala sia Filisiti khulwe emiesi chine nachitaru.

²Kho abandu balanga abesaalisi nende abafumu ma nibabareeba mbu, “Khunyala okhukhol'la sina Lisanduku lie Indakano ya Nyasaye? Nikhuba nikhukalusia haliarula nakhulihile nasina?”

³Nabo nibakalusia nibaboola mbu, “Nimuba nimukalusia Lisanduku lie Indakano wa Nyasaye wa Isiraeli, okhwola mulihile nesihanwa esiokhurunga khulwe tsimbi tsienywe. Lisanduku lie Indakano silinyala okhukalusibwa sila esihanwa tawe. Munjila yiyi namuhone obulwaye bwenywe khandi namumanye esichilanga Nyasaye namuhelesia esinyasio buli khase.”

⁴Abandu nibareeba mbu, “Nisihaanwa sina esiakhunyala okhumuhil'la?” Nabo nibakalusia nibaboola mbu, “Ebifwanani birano biamabumba ketsahabu nende ebifwanani birano bietsimbeba tsietsahabu okhuhelana namabalo kabaruchi ba Bafilisiti, sichila obulwaye bwamabumba bwetsa khwinywe mwesi nende khubaruchi barano.

⁵Okhwola mulombe ebifwanani biamabumba kenywe nende ebifwanani bietsimbeba tsienywe etsiononianga esibala sienywe khandi okhwola muhelesie Nyasaye wa Isiraeli oluyali. Haundi nalekhe okhumuhelesia esinyasio, inywe halala nabanyasaye benywe nende khusibala sienywe.

⁶Busina mwikale amarwi singa omuruchi we Misiri nende Abaamisiri? Murebil'la singa Nyasaye yabakhola ebihingwa okhwola olwa bahuchil'la'la Abaisiraeli okhurula Emisiri.

⁷Murechekhe likaari liyia nende tsing'ombe tsibili etsiselwanga etsisili okhureebwa khwikokolo ma muchibohe khwikaari tsana nebutswa mukalusie ebimoosi biatsio ingo.

⁸Mubukule Lisanduku lie Indakano ya Nyasaye mulire khwikaari ma mure mwisanduku elili ahembi n'nalio ebifwanani bietsahabu ebiamumurumilanga singa ebihanwa ebiokhurunga khulwe tsimbi tsienywe. Musukume likaari ma mulekhe lilukhe eliene.

⁹Ma mulekhe litsie; nimulola nilitsitsanga mwitaala lia Betsi Shemeshi, yako kalamanyia mbu Nyasaye wa Baisiraeli niye owakhukhupisienje esibi yisi. Nebutswa niliratsiayo ne khulamanya mbu siali niye orumile likhupako yili tawe. Kabeye amarabba butswa akakhukwiliye.”

¹⁰Abandu yabo bakhola singa babool'lwa; babukula tsing'ombe tsibili etsiselwanga nibatsiboha khwikaari ma nibekal'la ebimoosi biatsio hango.

¹¹Babiikha Lisanduku lie Indakano mwikaari halala nende lisanduku eliebifwanani bietsimbeba bietsahabu nende ebifwanani biamabumba ketsahabu.

¹²Tsing'ombe tsiachiaka okhutsia Betsi Shemeshi nitsichoomele mwitaala tsana nitsireberakhwo khunjila yindi tawe. Tsiananga olwa tsiali nitsitsanga. Abaruchi ba Filisiti barano bachilonda okhwola helitaala lia Betsi Shemeshi lichiachilanga.

¹³Abandu ba Betsi Shemeshi bali nibachesanga ingano mwibanda. Olwa bahenga ma nibalola Lisanduku lie Indakano; bali nobusangali obukali okhulilola.

¹⁴Likaari lietsa m'mukunda kwomundu olangwanga Yoshwa owamenyanga Betsi Shemeshi ma nilisinjila ahembi nelichina likali. Abandu baasaka likaari lietsimbabo nibeera tsing'ombe ma nibatsihaana khu MWAMI singa omusango kwokhusambwa.

¹⁵Abalawi babukula Lisanduku lie Indakano ya Nyasaye halala nende lisanduku liamwo nende omwebifwanani bietsahabu biali ma nibakara khwichina yilio. Abandu ba Betsi Shemeshi bamala nibahaana emisango chiokhusambwa nende ebihanwa bindi khu MWAMI.

¹⁶Abaruchi ba Filisiti barano yabo balola kosi akabandu yabo bakhola ma nibakalukha Ekironi litukhu liene yilio.

¹⁷Abafilisiti bahila ebifwanani bietsahabu birano bielibumba okhuhaana singa esihanwa siokhurunga khulwe tsimbi tsiabwe; buli silala khumatookho kano; Ashitoti, Gasa, Ashikeloni, Gatsi, nende Ekironi.

¹⁸Khandi baruma ebifwanani bietsahabu bietsimbeba tsirano sisilala khubuli litookho elirukwanga nende mulala khubaruchi ba Filisiti barano khumataala akasirwa nende amasisi nende akarasirwa. Lichina likali elili m'mukunda kwa Yoshwa eliababiikhakhwo Lisanduku lie Indakano lisiliho okhwola leelo singa obukobokheli khu yako akekholekha.

¹⁹OMWAMI yeera abasaatsa amakhumi kane nakataru abomwitaala lia Betsi Shemeshi sichila bahenjel'la mu Lisanduku lie Indakano. Abandu bekhula sichila OMWAMI yali niyeer're abandu abenji hakari wabwe.

²⁰Kho abandu ba Betsi Shemeshi baboola mbu, “Niwina onyala okhusinjila imbeli wo MWAMI Nyasaye Omutsienukhu uyu? Khwakhamuhila hena kho abe ehale khu ifwe?”

²¹Kho nibaruma abarume khubandu ba Kiriatsi Yearimu nibaboola mbu, “Abafilisiti bakalusisie Lisanduku lie Indakano ya Nyasaye. Mwitse mulibukule.”