Read lunyore 1 SAMWELI 7 Bible Online

1 SAMWELI 7 - lunyore bible

1 SAMWELI 7

¹Kho abandu ba Kiriatsi Yearimu babukula Lisanduku lie Indakano ya Nyasaye nibalihila munyumba yomundu owalangwanga Abinadabu owamenyanga khusikulu. Ma nibahula Eliasa omusiani wa Abinadabu okhulinda Lisanduku lie Indakano ya Nyasaye.

²Lisanduku lie Indakano ya Nyasaye liamenya Kiriatsi Yearimu oluhono olurambi ahembi emihika amakhumi kabili. Amatukhu kene yako, Abaisiraeli bamulakayila OMWAMI nibenya obukhonyi okhurula khuye.

³Kho Samweli yabool'la abandu ba Isiraeli mbu, “Nimuba nimukalukha khu MWAMI nemioyo chienywe chiosi, okhwola muhinie hakari wenywe abanyasaye abacheni bosi nende ebifwanani bianyasaye mukhasi olangwanga Asitarete. Muhaane emioyo chienywe khu MWAMI ma mumwekayakaye yenyene, naye alamusoola okhurula mumakhono ka Bafilisiti.”

⁴Kho Abaisiraeli bahiinia hakari wabwe ebifwanani bia Baali nende ebia Ashitoretsi ma nibamwekayakaya OMWAMI yenyene.

⁵Ma Samweli nalanga Abaisiraeli bosi okhubukhan'na habundu ahalangwanga Misipa, naboola mbu, “Namusaayile khu MWAMI ebwene yila.”

⁶Kho bosi bebunjikha Misipa. Bataha amaatsi ma nibakatsukha singa omusango khu MWAMI ma nibahonga okhulia litukhu liene yilio liosi. Baboola mbu, “Khwayonela OMWAMI.” Misipa niho aha Samweli yayaal'langa emise chia Baisiraeli.

⁷Olwa Bafilisiti bahul'la mbu Abaisiraeli bali nibebunjikhile Misipa, abaruchi ba Bafilisiti barano barula nabandu babwe okhutsia okhuseera Abaisiraeli. Olwa Baisiraeli bakahulila bahambwa noburi,

⁸ma nibabool'la Samweli mbu, “Otsilil'le okhusaaya khu MWAMI Nyasaye wefwe akhusoole okhurula khumukhono kwa Bafilisiti.”

⁹Samweli yeera Esimeme Sielikondi nasisamba siosi singa omusango khu MWAMI. Ma namusaaya mbu asoole Isiraeli. Ne OMWAMI yakalusia amasaayo kaake.

¹⁰Olwa Samweli yali nahaananga omusango khu MWAMI, Abafilisiti beetsa okhuseera Isiraeli, nebutswa olwene yilwo OMWAMI yabahukumila okhurula mwikulu. Bali neingoyani ingali ma nibelukha muburi.

¹¹Abaisiraeli barula Misipa ma nibalondel'la Abafilisiti nibaboosia ahembi Betsika, nibaber'ranga khunjila.

¹²Samweli nabukula lichina, nalira hakari wa Misipa nende Sheni, naboola mbu, “OMWAMI ukhukhonyele okhwola leelo.” Ma nalilanga mbu, “Ebenesa.”[3]

¹³Kho Abafilisiti balekwa ne OMWAMI yabekal'la mbu barenjil'la esibala sia Isiraeli oluhono lwa Samweli asili mwoyo tawe.

¹⁴Amatookho kosi aka Bafilisiti bali nibanuula Isiraeli okhurula Ekironi okhwola Gatsi, kakabusibwa khu Isiraeli. Ma kho Isiraeli yakalusibubwa tsisoma tsiasio tsiosi. Ne khwaliho nomulembe hakari wa Baisiraeli nende Abakanaani.

¹⁵Samweli yamiha Isiraeli oluhono olwa yali nasili mwoyo.

¹⁶Buli muhika yatsitsanga Betseli, Giligali nende Misipa ne mumataala yaka kosi yakhalachilanga Abaisiraeli emise.

¹⁷Ma yakalukhanga Rama aha yalinji singa omukhalachi wa Isiraeli. Ebwene yiyo yombokhela OMWAMI olusambwa.