Read lunyore 1 SAMWELI 8 Bible Online

1 SAMWELI 8 - lunyore bible

1 SAMWELI 8

¹Olwa Samweli yali nasaakhuye yakhola abasiani baabe okhuba abakhalachi mu Isiraeli.

²Omusiani wokhuranga yalangwa mbu Yoeli ne omutu yalangwa mbu Abiya. Bali abakhalachi mu Berisheba.

³Nebutswa sibalonda ifwo ya samwana tawe; bayanza amapesa amenji kho bahuchil'la ebihetso nibasiamia obukhalachi bwahabwene.

⁴Kho abemeli ba Isiraeli bosi bebunjikha halala nibatsia Rama okhulola Samweli,

⁵ma nibamubool'la mbu, “Lola osaakhulanga ne abasiani baabo sibalondanga ifwo yiyo tawe. Kho okhwahul'le omuruchi owanokhwamihe singa amahanga kandi kosi.”

⁶Nebutswa yako sikayanzisia Samweli olwa bamureeba mbu abahul'le omuruchi tawe, kho yasaaya khu MWAMI.

⁷Ne OMWAMI yamubool'la mbu, “Ohuyie amang'ana kosi akabandu bakhubool'langa. Soli niwe owabasuulanga tawe; nise owabasuuye singa omuruchi wabwe.

⁸Okhurula nimbahinia Emisiri baikhupa omukongo ne nibekayakaya abanyasaye bandi. Ne luno bakhol'langa ibe singa obwa baakhol'langa khasotso.

⁹Khwelwe yako ohul'le akababoolanga, nebutswa abachetsiyie butinyu ma obenoosie obwa abaruchi babwe bakhabakhol'le.”

¹⁰Samweli yabool'la abandu abali nibamureebanga omuruchi kosi ako MWAMI yali namubooleye.

¹¹Samweli nababool'la mbu, “Yaka niko akomuruchi wenywe namukhol'le; nabukule abaana benywe ma nabakhole okhuba abasikari; abalala khubo bakhalwane mumahe kamakaari ne abandi mumahe ketsisululi ne abandi bakhachende imbeli wamakaarike.

¹²Abalala yakhabakhole abakhongo babasikari elefu ndala ne abandi abakhongo babasikari amakhumi karano. Abasiani benywe bakhalime emikunda chichie, nibamuchesela obuswachebwe. Khandi bakhamulombele amakaari nende ebilasan'nwe bibie.

¹³Abakhaana benywe nabo bakhamulombele amafura kokhwebakha nibamutekhela ebiokhulia.

¹⁴Yakhamunuule emikunda chienywe emilahi nende emikunda chiemisabibu nende echiemiseituni nachihaana khubemeli babandube.

¹⁵Nabukule esielikhumi siamachese kenywe nahelesia abakhalachi bemise nende abemeli bandi.

¹⁶Nabukule abakholi benywe nende tsing'ombe chienywe tsikhomefu halala netsipunda tsienywe okhumukhol'la emilimo.

¹⁷Yakhabukule esielikhumi siemiruko tsienywe. Khandi nenywe mwakhabe abasumba baabe.

¹⁸Olwa matukhu kene yako kakhoole, mwakhekaane butinyu omuruchi wenywe owabene mwali khwahula, nebutswa OMWAMI siyakhahuyie khumekaano kenywe tawe.”

¹⁹Abandu sibabukulakhwo obuha mumang'ana ka Samweli tawe. Nebutswa baboola mbu, “Tawe, khwenyanga omuruchi,

²⁰kho khubekhwo singa amahanga kandi, khube nomuruchi okhurula mwifwe abene owanokhwamihe nakhwemel'la okhulwana lihe.”

²¹Samweli yahulila kosi akababoola ma natsia nabool'la OMWAMI.

²²OMWAMI yakalusia naboola mbu, “Obakhol'le akabenyanga ma obahelesie Omuruchi.” Ma Samweli nabool'la abandu bosi ba Isiraeli bakalukhe mutsingo tsiabwe.