Read lunyore 1 SAMWELI 9 Bible Online

1 SAMWELI 9 - lunyore bible

1 SAMWELI 9

¹Yaliho omundu omuhinda khandi oweifuma ingali owalangwanga Kishi owomulwibulo lwa Benjameni. Yali omusiani wa Abieli omwitsukhulu wa Serori ne yali oweinyumba ya Bekorati owomulwibulo lwa Afia.

²Yali nomusiani owalangwanga Saulo owelikondo lilahi mububuukha bubwe. Mubandu ba Isiraeli bosi abulaho owali nelikondo lilahi okhumuyomba, khandi abandu bandi bosi bamuhel'langa mumabeka sichila yali omurambi okhusila.

³Tsindala khutsipunda tsia Kishi tsiali nitsikor're, kho Kishi yabool'la Saulo mbu, “Bukula mulala khubarumikhili yaba ma mutsie okhuruna etsipunda.”

⁴Batsia nibabir'ra musibala siebikulu sia Efuraimu nende esibala sia Shalisha, nebutswa sibatsinyoola tawe. Kho batsia niboola musibala sia Shalimu nebutswa etsipunda sitsianyoolekhayo tawe. Ma nibabir'ra musibala sia Benjameni nebutswa khandi sibatsinyoola tawe.

⁵Olwa boola musibala sia Sufu, Saulo yabool'la omurumikhili uwe mbu, “Chenda khukalukhe ingo, okhuba papa yetsa okhulekha okhupaala khuketsipunda ma achiake okhuhenda omwoyo khulwe ifwe.”

⁶Omurumikhili uyo yamukalusia naboola mbu, “Lola, aliho omundu wa Nyasaye mwitaala lino, ali noluyali olukali ne kosi aka aboolanga kekholekhanga. Chenda khutsie khuye luno. Haundi yetsa okhukhubool'la ahakhunyala okhunyoola etsipunda.”

⁷Saulo namureeba mbu, “Nikhutsia khuye, nakhumuhelesie sina? Ebiokhulia bihweye mumitata chiefwe ne sikhulikhwo nesihanwa esia khunyala okhuhil'la omundu wa Nyasaye tawe. Nisina esia khulikhwo n'nasio?”

⁸Omurumikhili uyo namubool'la mbu, “Ndikhwo nende amapesa mati. Nzia okhumuhelesia akene yako, ma naye anyala okhukhubool'la ahakhunyala okhunyoola etsipunda.”

⁹(Mumatukhu yako omuroobi yalangwanga omuloli, ma kho olwa omundu wosi yenyanga okhurunilisia ling'ana liosi khu Nyasaye, yaboolanga, “Chenda khutsie okhulola omuloli.”)

¹⁰Saulo nakalusia naboola mbu, “Iyio neinganakani indahi, chenda khutsie.” Kho batsia mwitaala aha omundu wa Nyasaye yamenyanga.

¹¹Olwa bali nibanichilanga okhutsia khwitaala tsana, babukaana nende abaana nibatsitsanga okhwenda amaatsi. Nibareeba abakhaana yabo, “Omuloli ali mwitaala muno?”

¹²Abakhaana yabo nibabakalusia mbu, “Yee tooto alimwo. Kata ali hambeli wenywe. Nimuyuchil'la mulamunyoola. Olwa mwitsa okhuba nimwakhenjila mwitaala mwitsa okhumunyoola. Yetsela mwitaala olwaleelo sichila abandu beetsa okhuhaana omusango khulusambwa oluli khusikulu.

¹³Olwa mwitsa okhuba nimwinjilanga mwitaala, mwitsa okhumunyoola nasili okhutsia khusikulu okhulia. Abandu abalanjilwe sibetsa okhuchaaka okhulia nasili okhwolaho tawe, sichila okhwola alaame ikhabi khumusango yikwo mbelio. Nimutsia luno mulamunyoola.”

¹⁴Kho Saulo nende omurumikhiliwe nibatsia mwitaala. Ne olwa bali nibenjilangamwo balola Samweli niyetsanga aha bali natsitsanga habundu hokhwekayakayila.

¹⁵Nilisikaye litukhu elala Saulo nasili okhwola, OMWAMI yali nabooleye Samweli mbu,

¹⁶“Litukhu liamukamba khusaa singa yino nakhurumile omundu owomwibulo lwa Benjameni. Omutsukhil'lekhwo amafura kokhumwemekha okhuba omuruchi wabandu banje Abaisiraeli ne yakhabasoole okhurula khumukhono kwa Bafilisiti. Mal'le okhulola okhusaalila khwabandu banje khandi mbuliye okhulakaya khwabwe nibenyanga obukhonyi.”

¹⁷Olwa Samweli yalola Saulo, OMWAMI yamubool'la mbu, “Uyu niye omundu owandakhubooleye. Nayamihe abandu banje.”

¹⁸Kho Saulo natsia aha Samweli yali nali ahembi musilibwa ma namureeba, “Mbool'la, omuloli amenyanga hena?”

¹⁹Samweli nakalusia naboola, “Nise omuloli tsana. Tsia uranjil'le okhwola habundu hokhwekayakaya. Inywe mwombi mwitsa okhulia ebiokhulia halala n'nase olwaleelo. Mukamba tsuli nakhubool'le kosi okorunanga, ma nakhusebule notsie ingo.

²⁰Ne khuketsipunda etsiabeye nitsikor're amatukhu kataru akabir're, oratsihendela tawe; tsinyoolekhele. Ne niwina owa abandu ba Isiraeli bekombanga okhusila? Niwe — ibe nende abeinyumba ya papa uwo.”

²¹Saulo nakalusia naboola mbu, “Ise ndi owolwibulo lwa Benjameni; nalwo nolwibulo olutititi mu Isiraeli, ne inyumba yefwe neyindututu mulwibulo lwa Benjameni. Busina nawe ol'lomanga yaka khu ise?”

²²Ma Samweli nabukula Saulo nende omurumikhiliwe nabenjisia munyumba nabekhasia khumesa imbeli ahabacheni amakhumi kataru bali nibekhaye.

²³Samweli nabool'la omuteekhi mbu, “Nder'ra esipande sieinyama esiandali okhukhuhelesia nikhubool'la esibiikhe sibeka.”

²⁴Kho omuteekhi naleera esipande sieinyama yokhwirango ma nasira imbeli wa Saulo. Ma Samweli naboola, “Lola, sino nesipande esia wali okhubiikhilwa osilie. Ndali okhukhubiikhila osilie esaa yino halala nabacheni abandali okhulanga.” Kho Saulo yalia ebiokhulia halala na Samweli litukhu yilio.

²⁵Olwa barula habundu hokhwekayakayila ma nibeinjila mwitookho, balombela Saulo habundu hokhukona mukorofa.

²⁶Kho Saulo yakona habwene yaho. Mumabwebwe, nibusietsanga, Samweli yatsia okhubusia Saulo okhurula mukorofa naboola, “Buukha, nase nzia okhukhusebula.” Saulo nabuukha, ne ye halala na Samweli nibatsia khumuhanda halala.

²⁷Olwa boola khundulo welitaala, Samweli yabool'la Saulo mbu, “Bool'la omurumikhili yemele imbeli wefwe.” Omurumikhili yarula natsia imbeli ma Samweli nameeta okhuboola mbu, “Sinjilakhwo hano hati, nase nzia okhukhubool'la aka Nyasaye abooye.”