Read luo Chakruok 1 Bible Online

Chakruok 1 - luo bible

Chakruok 1

¹Kar chakruok, Nyasaye nochueyo polo gi piny.

²Piny ne onge kido, kendo gimoro ne onge e iye. Mudho mandiwa noimo ataro mang’ongo, kendo Roho mar Nyasaye ne wuotho ewi ataro.

³ Eka Nyasaye nowacho niya, “Ler mondo obedie.” Mi ler nobetie.

⁴Nyasaye noneno ni ler ber, mi ne opoge oa kuom mudho.

⁵Nochako ler ni, Odiechieng’, to mudho nochako ni Otieno. Piny noyuso kendo noru, mi mano nodoko chieng’ mokwongo.

⁶ Eka Nyasaye nowacho niya, “Gima pogo pi diriyo mondo obedie.”

⁷Kuom mano, Nyasaye nochweyo gima nopogo pi mamalo gi pi mapiny, mi nobedo kamano.

⁸Gima nopogo pino nochako ni, Polo. Piny noyuso kendo noru, mi mano nodoko odiechieng’ mar ariyo.

⁹Bang’ mano, Nyasaye nowacho niya, “Pi manie bwo polo mondo ochokre kanyachiel, mondo lowo motwo onen.” Mi nobedo kamano.

¹⁰Nochako lowo motwo ni, Piny, to pi mane ochokore ne ochako ni, Nam, noneno ni gima nosetimo ber.

¹¹Eka nowacho niya, “Gik moko kaka buya gi cham kod kit yien duto ma nyago olemo, mondo otwi e lowo.” Kamano

¹²gik moko kaka cham kod kit yien duto manyago olemo notwi e lowo, mi Nyasaye noneno ni gima nosetimo ber.

¹³Piny noyuso kendo noru, mi mano nodoko chieng’ mar adek.

¹⁴Bang’e Nyasaye nowacho niya, “Gik marieny mondo obed e polo, mondo opog odiechieng’ gi otieno, mondo onyis ndalo mitimoe sewni, kod chakruok chwiri gi opon kod higni.

¹⁵Ginirieny e kor polo, mondo gikel ler e piny.” Kamano,

¹⁶Nyasaye nochweyo gik marieny ariyo madongo mondo orit odiechieng’, kod otieno. Mane rito odiechieng’ ne duong’ moloyo mane rito otieno. Sulue bende nochueyo.

¹⁷Noketo gik marieny e polo mondo okel ler ni piny,

¹⁸kendo mondo orit odiechieng’ kod otieno, ka gipogo ler kuom mudho. Nyasaye noneno ni gima nosetimo ber.

¹⁹Piny noyuso kendo noru, mi mano nodoko chieng’ mar ang’wen.

²⁰Bang’e Nyasaye nowacho niya, “Gik mangima mopogore opogore mondo obed mang’eny e pi, to winy mondo ohu e kor polo.”

²¹Kuom mano Nyasaye nochueyo rech madongo mae nam, gi gimoro amora modak e pi, kod kit winy duto, mi noneno ni gima nosetimo ber.

²²Eka noguedhogi kowacho niya, “Gik moko duto manie pi mondo onywolre, kendo opong’ nam. Winy bende mondo omedre.”

²³Piny noyuso kendo noru, mi mano nodoko chieng’ mar abich.

²⁴Bang’e Nyasaye nowacho niya, “Gik mangima kaka jamni gi le kod gik mamol, mondo onywolre e piny.” Mi nobedo kamano.

²⁵Mano e kaka nochueyo jamni kod gik mamol duto. Mi noneno ni gima nosetimo ber.

²⁶ Eka Nyasaye nowacho niya, “Koro wachue dhano e kido machal kodwa. Enobed gi teko kuom rech gi winy gi jamni kod gik mamol duto.”

²⁷ Kamano Nyasaye nochueyo dhano e kido machal kode. Nochueyogi dichwo gi dhako,

²⁸mi noguedhogi, kowachonigi niya, “Beduru gi nyithindo mang’eny, kendo upong’ piny.”

²⁹Nyasaye nomedo wacho ni dhano niya, “In amiyi cham kod olembe duto mondo obed chiembi,

³⁰to le gi winy kod gik mamol duto, to amiyo oboke mondo ocham.” Mi nobedo kamano.

³¹Eka Nyasaye nong’iyo gik moko duto mane osechueyo, kendo noneno ni gibeyo ahinya. Piny noyuso kendo noru, mi mano nodoko chieng’ mar auchiel.