Read luo Chakruok 11 Bible Online

Chakruok 11 - luo bible

Chakruok 11

¹E kinde mokwongo ji duto mae piny ne wacho mana dhok achiel, kendo ne gikonyore gi weche machal.

²Kane giwuotho e yo wuok chieng’, ne gichopo e pap manie piny Shinar, mi ne gidak kuno.

³Bang’e ne giporo wach niya, “Walosuru matafari kendo wawang’gi mochiek.” Ne gikonyore gi matafari kar kite, kendo lam kar simit kuom gedo.

⁴Bang’e ne giwacho niya, “Koro wageruru dala maduong’ man gi gorofa mabor mochopo nyaka e polo, mondo walos nyingwa, kik wabed ji moke e kor piny.”

⁵Eka Ruoth Nyasaye nolor piny mondo one dala kod gorofa mabor mane dhano osegero,

⁶mi nowacho niya, “Dhano en oganda achiel mawacho mana dhok achiel, kendo gima osechako timoni nyiso ni onge gimoro amora ma notame timo.

⁷Omiyo wadhi wapog dhogi, mondo ng’ato ka ng’ato kik winj dho wadgi.”

⁸Kamano Ruoth Nyasaye nokeyogi e piny duto, mi ne giweyo gero dalano.

⁹Mano emomiyo iluongo dalano ni Babel, nikech kanyo ema Ruoth Nyasaye nopogoe dho ogendini, kendo okeyogi e piny duto.

¹⁰Koro magi e nyikwa Shem: Higni ariyo bang’ ataro, Shem nonywolo Arpaksad wuode, ka en jahigni mia achiel.

¹¹Bang’e nochako odak kuom higni mia abich, kendo nomedo nywolo nyithindo moko.

¹²Arpaksad ne jahigni piero adek gabich kane onywolo Shela wuode.

¹³Bang’e nochako odak kuom higni mia ang’wen gabich, kendo nomedo nywolo nyithindo moko.

¹⁴Shela ne jahigni piero adek kane onywolo Eber wuode.

¹⁵Bang’e nochako odak kuom higni mia ang’wen gadek, kendo nomedo nywolo nyithindo moko.

¹⁶Eber ne jahigni piero adek gang’wen kane onywolo Peleg wuode.

¹⁷Bang’e nochako odak kuom higni mia ang’wen gi piero adek kendo nomedo nywolo nyithindo moko.

¹⁸Peleg ne jahigni piero adek kane onywolo Reu wuode.

¹⁹Bang’e nochako odak kuom higni mia ariyo gochiko, kendo nomedo nywolo nyithindo moko.

²⁰Reu ne jahigni piero adek gariyo kane onywolo Serug wuode.

²¹Bang’e nochako odak kuom higni mia ariyo gabiriyo, kendo nomedo nywolo nyithindo moko.

²²Serug ne jahigni piero adek kane onywolo Nahor wuode.

²³Bang’e nochako odak kuom higni mia ariyo, kendo nomedo nywolo nyithindo moko.

²⁴Nahor ne jahigni piero ariyo gochiko kane onywolo Tera wuode.

²⁵Bang’e nochako odak kuom higni mia achiel gi apar gochiko kendo nomedo nywolo nyithindo moko.

²⁶Kane Tera osedoko jahigni piero abiriyo, nonywolo Abram gi Nahor kod Haran.

²⁷Koro magi e joka Tera: Tera nonywolo Abram gi Nahor kod Haran, to Haran nonywolo Lut.

²⁸Haran notho e dalagi miluongo ni Hur manie piny Kaldea, kane Tera wuon mare pod ngima.

²⁹Abram nokendo Sarai, to Nahor nokendo Milka nyar Haran ma wuon Iska.

³⁰Sarai to ne migumba.

³¹Tera nokawo Abram wuode gi Lut nyakware maka wuode Haran, kod Sarai chi Abram, mi ne giwuok Ur e piny Kaldea mondo gidhi e piny Kanaan. To kane gichopo Haran, ne gidak kuno.

³²Bang’e Tera notho Haran ka en jahigni mia ariyo gabich.