Read luo Chakruok 12 Bible Online

Chakruok 12 - luo bible

Chakruok 12

¹ Ruoth Nyasaye nowacho ni Abram niya, “Dar iwe pinyu gi wedeni kod dhoodu, mondo idhi e piny moro ma abiro nyisi.

²Analoki oganda maduong’; anaguedhi, kendo anami nyingi obed gi huma, mi ji nokonyre gi nyingi kuom gueth.

³ “Anaguedh jogo ma guedhi, to nakuong’ jogo ma kuong’i, kendo ogendini duto mae piny nokwaya mondo aguedhgi kaka aseguedhi.”

⁴Omiyo Abram nochako wuoth kaka Ruoth Nyasaye nochike mi ne gidhi gi Lut. Ne en jahigni piero abiriyo gabich kane odar Harran.

⁵Nokawo Sarai chiege, gi Lut wuod owadgi, kaachiel gi mwandu duto kod wasumbni duto mane gin go Harran, eka ne gichako wuoth madhi e piny Kanaan. Kane gisechopo Kanaan,

⁶Abram nowuotho e pinyno nyaka nochopo kar lemo man Shekem, e tiend yath mar More. E ndalogo jo-Kanaan ne pod odak e pinyno.

⁷ Ruoth Nyasaye nofwenyore ni Abram kanyo, mowachone niya, “Ma e piny ma nami nyikwayi.” Mi Abram nogero kendo-mar-misango kanyono ni Ruoth Nyasaye ma nofwenyorene.

⁸Bang’e nodar kanyo modhi yo milambo e piny gode man yo wuok chieng’ mar Bethel, moguro hembe e kind Bethel gi Ai, ka Bethel ni yo podho chieng’ to Ai ni yo wuok chieng’. Kanyo bende nogeroe kendo-mar-misango ni Ruoth Nyasaye.

⁹Bang’ mano nowuotho matintin, kobworo e wuodhe mochiko piny Kanaan ma milambo.

¹⁰To kech maduong’ nowuok e pinyno, omiyo Abram nodhi nyaka Misri, mondo odag kuno mondi.

¹¹Kane ochiegni chopo Misri, nowacho ni Sarai chiege niya, “Ng’eni in dhako ma jaber,

¹²omiyo ka jo-Misri oneni to gibiro wacho ni in chiega, kendo gibiro nega mondo idong’nigi.

¹³ Emomiyo yie inyisgi ni in nyamera, mondo kik ginega to gitimna maber nikech in.”

¹⁴Kamano, kane Abram ochopo Misri, jo-Misri noneno ni chiege nigi chia miwuoro.

¹⁵Jodong Farao, ruodh Misri, noneno Sarai, mi ne giwuoro berne ni Farao. Eka ne gitere e od ruoth.

¹⁶Farao norito Abram maber nikech Sarai, kendo nomiye rombe gi diek gi dhok gi kenje gi wasumbini kod ngamia.

¹⁷To Ruoth Nyasaye nosando Farao gi joode gi tuoche madongo nikech osekawo Sarai chi Abram.

¹⁸Kuom mano Farao noluongo Abram, mopenje niya, “Ang’o momiyo isetimona kama? Ere gima omiyo ne ok inyisa ni Sarai en chiegi?

¹⁹Mar ang’o niwuonda ni en nyameru, mi akawe mondo obed chiega? Chiegi eri! Kawe mondo udhi!”

²⁰Eka Farao nochiko joge mondo oriemb Abram gi chiege e pinye kaachiel gi joge duto.