Read luo Chakruok 14 Bible Online

Chakruok 14 - luo bible

Chakruok 14

¹Amrafel ruodh Shinar, gi Ariok ruodh Elasar, gi Kedor-laomer ruodh Elam, kod Tidal ruodh Goyim,

²nodhi kedo kod Bera ruodh Sodom gi Birsha ruodh Gomora, gi Shinab ruodh Adma, gi Shemeber ruodh Zeboim, kod ruodh Bela. (Dala mar Bela iluongo bende ni Zoar)

³Ruodhi abichgo nosechoko jolwenjgi kanyakla e holo Sidim, ma tinde pi Nam Kado oimo.

⁴Ne gisebedo e bwo loch Kedor-laomer kuom higni apar gariyo, to e higa mar apar gadek ne ging’anyo, mi giweyo bedo e bwo lochne.

⁵E higa mar apar gang’wen, Kedor-laomer kod ruodhi mane oriwore kode nobiro gi jolwenjgi, kendo ne giloyo jo-Refaim e Ashteroth-karnaim, gi jo-Zuzim e Ham, gi jo-Emim e paw Kiriathaim,

⁶kod jo-Hor e gode mag Seir nyaka El-paran man but thim.

⁷Eka ne giduogo chien nyaka En-mishpat, ma tinde iluongo ni Kadesh, mi gikawo piny jo-Amalek duto, kod piny jo-Amor ma nodak Hazazon-tamar.

⁸Bang’e ruodhi mag Sodom gi Gomora gi Adma gi Zeboim kod Bela nowuok moriedo jolwenjgi e holo Sidim

⁹mondo giked gi Kedor-laomer ruodh Elam, gi Tidal ruodh Goyim, gi Amrafel ruodh Shinar, kod Ariok ruodh Alasar. Kamano ruodhi ang’wen nokedo gi ruodhi abich.

¹⁰To ne nitie buche mang’eny motimo chuodho e holo Sidim kendo ruodhi mag Sodom gi Gomora nonyumore e buchego kane gitemo ringo lweny. Ruodhi mamoko to noringo motony e gode.

¹¹Ruodhi ang’wen-go nopeyo jamb jo-Sodom gi mag jo-Gomora duto, kendo ne giyako gimoro amora mane giyudo kuno.

¹²Lut wuod owad gi Abram, ma nodak Sodom, bende ne gimako, mi gidhigo kaachiel gi jambe duto.

¹³To ng’at moro mane otony e lwenyno nobiro ir Abram ja-Hibrania monyise gima osetimore. E ndalogo, Abram nodak but yiend Mamre ja Amor. Mamreno ne omin Eshkol kod Aner mane osiepe Abram.

¹⁴Kane Abram owinjo ni oseter Lut wuod owadgi e twech, nolwongo joge mia adek gapar gaboro, kendo nolawo ruodhigo nyaka Dan.

¹⁵Ne gimonjo wasigugo gotieno, kendo ne giriembogi nyaka Hoba yo nyandwat mar Damaski.

¹⁶Eka Abram nodwogo jamni duto, kaachiel gi Lut ma wuod owadgi gi jambe duto, kod mon gi jomoko duto ma noyudo oter e twech.

¹⁷Kane Abram oduogo bang riembo Kedor-laomer kod ruodh mane oriwore kode, ruodh Sodom nobiro mondo oromne e holo Shave ma tinde iluongo ni holo Ruoth.

¹⁸ To Melkizedek mane ruodh Salem kendo jadolo mar Nyasaye Maduong’ Moloyo nokeloni Abram chiemo gi divai kendo noguedhe,

¹⁹kowacho niya, “Abram! Nyasaye Maduong’ Moloyo, mane ochueyo polo gi piny, mondo oguedhi.

²⁰Wapako Nyasaye maduong’ moloyo, mosechiwo wasiki e lweti.” Eka Abram nomiyo Melkizedek achiel kuom apar mag gik moko duto ma noyako.

²¹Ruodh Sodom nowacho ni Abram niya, “Duogna joga kende, to idong’ gi gik moko duto mane iseyako.”

²²To Abram nodwoke niya, “Akuong’ora gi nying Ruoth Nyasaye, ma Nyasaye Maduong’ Moloyo, kendo ma Jachuech polo gi piny,

²³ni ok nakaw giri kata achiel, ni mar dipo ka chieng’ moro iwacho ni, ‘An ema namiyo Abram obedo jamoko.’

²⁴Omiyo ok nakaw gimoro, to mak mana gigo ma joga osechamo, kaachiel gi pok ma osiepena ma Aner gi Eshkol kod Mamre onego yudi.”