Read luo Chakruok 15 Bible Online

Chakruok 15 - luo bible

Chakruok 15

¹Bang’ wechego Ruoth Nyasaye nofwenyore ni Abram, mowacho ne niya, “Abram, kik iluor! An okumbani, kendo pokni nobed maduong.”

²To Abram nodwoke niya, “A Ruoth Nyasaye, en ang’o minyalo miya, kapod asiko ma onge nyathi, kendo Eliezer ja-Damaski ma misumbana ema ochung’ ka jacham mwanduna?

³Kaka ok isemiya nyithindo, omiya achiel kuom wasumba ema nocham mwanduna.”

⁴Eka nochako owinjo dwond Ruoth Nyasaye, kawachone niya, “Ng’atno ok nocham mwanduni, to wuodi minywolo ema nochamgi.”

⁵ Bang’e Ruoth Nyasaye nogole oko mowachone niya, “Ng’i malo, kendo kwan sulwe kinyalo.” Eka nomedo wachone ni, “Nyikwayi bende nobed mang’eny ka suluego.”

⁶ Abram noyie kuom Ruoth Nyasaye, omiyo Ruoth Nyasaye nokwano yieneno ka tim makare,

⁷mi nowachone niya, “An e Ruoth Nyasaye mane ogoli Ur e piny Kaldea mondo omiyi pinyni idagie.”

⁸To Abram nopenje niya, “A Ruoth Nyasaye, ere kaka anyalo ng’eyo ni pinyni nobed mara?”

⁹Ruoth Nyasaye nodwoke niya, “Kelna roya ma hike adek, gi diel ma hike adek, gi im ma hike adek, kod akuch odungla gi akuch obondo.”

¹⁰Abram nokelloni Ruoth Nyasaye gigo duto, kendo nopogo moro ka moro sirunde ariyo. Nochano sirundego e laini ariyo, ka moro ka moro omanyore gi wadgi. Winy to ne ok opogo.

¹¹Achudhe nobiro mondo ochamgi, to noriembogi.

¹² Kane chieng’ podho, nindo matut notero Abram, kendo lworo maduong’ nomake.

¹³ Eka Ruoth Nyasaye nowachone niya, “Nyikwayi nobed jodak e piny ma ok margi. Ginibed wasumbini kuno, kendo nosandgi kuom higni mia ang’wen.

¹⁴ To nakum jopiny ma notimnigi kamano, kendo bang’e ginia kuno gi mwandu mogundho.

¹⁵To in, nidag aming’a, kendo nitho gi kue, kiluwo kwereni.

¹⁶Tieng’ mar ang’wen mar nyikwayi nodwog ka nikech ndalogo ema noyud ka richo jo-Amor osemedore moromo kum.”

¹⁷Kane chieng’ osepodho kendo piny olil, tak mach nodum iro, kod chuk mach maliel nothinyore, mokadho e kind sirunde kande.

¹⁸ Chieng’no Ruoth Nyasaye nosingore ni Abram kowacho ne niya, “Pinyni amiyo nyikwayi, chakre aora man e tong’ Misri nyaka aora maduong’ mar Yufrate,

¹⁹moting’o pinje mag jo-Keni gi jo-Kenizi gi jo-Kadmon

²⁰gi jo-Hiti gi jo-Perizi, gi jo-Refaim

²¹gi jo-Amor gi jo-Kanaan gi jo-Girgash kod jo-Jebus.”