Read luo Chakruok 16 Bible Online

Chakruok 16 - luo bible

Chakruok 16

¹Sarai chi Abram ne onge nyathi, to ne en gi jatich ot ma nyar Misri, ma nyinge Hagar.

²Sarai nowacho ni Abram niya, “Ruoth Nyasaye osetama e nywol. Kaw jatichnani, dipo ka onywolona nyathi.”

³Kuom mano Sarai nomiyo Abram Hagar jatichne ma nyar Misri. Mano noyudo ka Abram osedak e piny Kanaan kuom higni apar.

⁴Abram noriwore gi Hagar, mi Hagar nomako ich. To kane Hagar ofwenyo ni osemako ich,, sunga nomake, mojaro Sarai.

⁵Eka Sarai nowacho ni Abram niya, “In ema imiyo Hagar jara! Namiyi jatichna, to ka noneno ni osemako ich, to ochako jara. Ruoth Nyasaye mondo ong’ad burani e kinda kodi.”

⁶Abram nodwoke niya, “Jatichnino nie lweti. Inyalo timone gima ihero.” Omiyo Sarai nothago Hagar, nyaka Hagar noringo moa.

⁷To malaika mar Ruoth Nyasaye noyudo Hagar e thim e soko manie yo madhi Shur.

⁸Nopenje niya, “Hagar jatich Sarai, ia kure, to idhi kanye?” Nodwoke niya, “Aringo Sarai ma atiyone.”

⁹Malaika nomedo wachone niya, “Dog ir Sarai, kendo yie gi thagruok momiyi.”

¹⁰Eka malaika nowachone kendo niya, “Anamiyi nyikwayo mang’eny ma ok nyal kwan.

¹¹“In gi ich, kendo ibiro nywolo nyathi ma wuowi. Inichak nyinge ni Ishmael, tiende ni, ‘Nyasaye winjo’, nikech Ruoth Nyasaye osewinjo chandruokni.

¹²To wuodino nochal gi le mae thim. Nobed mamon gi ji duto, kendo ji duto nobed mamon kode, bende nodag mabor giwedene duto.”

¹³Hagar nowacho niya, “Bende en adier ni aseneno Nyasaye, to pod angima?” Omiyo noluongo Ruoth Nyasaye ma noyudo wuoyo kode ni El-roi, tiende ni, ‘Nyasaye ma neno.’

¹⁴Mano emomiyo iluongo soko manie kind Kadesh gi Bered ni, ‘Beer-lahai-roi’, tiende ni, ‘Soko mar Nyasaye mangima ma neno’.

¹⁵ Bang’e Hagar nonywolo ni Abram nyathi ma wuowi, kendo nochako nyinge ni Ishmael.

¹⁶Abram ne jahigni piero aboro gauchiel kane Hagar onywolo Ishmael.