Read luo Chakruok 17 Bible Online

Chakruok 17 - luo bible

Chakruok 17

¹Kane Abram ja higni piero ochiko, Ruoth Nyasaye nofwenyorene, mowachone niya, “An Nyasaye Manyalo Gik Moko Duto. Bed ng’ama odimbore kendo maonge ketho e nyima ndalo duto,

²eka anatim kodi singruok, kendo nami nyikwayi bed mogundho.”

³Abram nogoyo chonge piny, mokulore nyaka e lowo, mi Nyasaye nowachone niya,

⁴“Singruok ma atimo kodi e ma: Inibed wuon ogendini mang’eny.

⁵ Nyingi ok nochak oluong ni Abram, to noluonge ni Ibrahim. Mano koro e nyingi, nikech aseloki wuon ogendini mang’eny.

⁶Anamiyi nyikwayo mathoth, mi ginidok ogendini madongo, kendo jomoko kuomgi nobed ruodhi.

⁷ “Anarit singruok ma asetimo kodi kendo gi nyikwayi e tienge mabiro, mi anabed Nyasachi kendo Nyasach nyikwayi nyaka chieng’.

⁸ Anamiyi piny Kanaan duto ma koro inie jadakni, mi enobed mari gi nyikwayi nyaka chieng’ kendo anabed Nyasachgi.”

⁹Nyasaye nomedo wacho ni Ibrahim niya, “To bende in kaachiel gi tienge duto mag nyikwayi unurit singruokna.

¹⁰ Koro ma e kaka onego umak singruoknani: ng’ato ka ng’ato ma dichwo kuomu nyaka ter nyangu.

¹¹Chakre kawuono, nyaka uter nyathi ka nyathi mawuowi nyangu ka en gi ndalo aboro, kata en nyathiu, kata nyathi misumba mong’iew kuom oganda moro. Mano biro nyiso ni nitie singruok e kinda kodu.

¹³Ng’ato ka ng’ato nyaka ter nyangu, kendo mano nobed ranyisi e ringreu ma nyiso ni singruok masetimo koduni osiko.

¹⁴To dichwo ma ok oter nyangu noriemb kuom jowetene, nikech ok oserito singruokna.”

¹⁵Eka Nyasaye nowacho ni Ibrahim kendo niya, “Kik ichak iluong chiegi ni Sarai, nikech koro nyinge Sara.

¹⁶Abiro guedhe kendo abiro miyi nyathi ma wuowi kode. Anaguedh Sara, mi nobed min ogendini mang’eny, kendo nyikwaye moko nobed ruodhi.”

¹⁷Ibrahim nogoyo chonge piny, mokulore nyaka e lowo, to nochako nyiero, koparo ni, “Bende ng’ato dinywol nyathi ka en jahigni mia achiel? Koso sara nyalo nywol ka en jahigni piero ochiko?”

¹⁸Omiyo nowacho ni Nyasaye niya, “Akwayi ni mondo irit Ishmael, obed mangima.”

¹⁹To Nyasaye nodwoke niya, “Ooyo, Sara chiegi ema biro nywoloni wuowi, kendo inichak nyinge ni Isaka. Anachop singruok ma asetimo kode, kaachiel gi nyikwaye bende, nikech en singruok mosiko.

²⁰To bende abiro rito Ishmael kaka isekwaya. Abiro guedhe, kendo abiro miye nyithindo gi nyikwayo mang’eny. Enobed wuon jodongo apar gariyo, kendo anami nyikwaye bedo oganda maduong’.

²¹To anarit singruok ma asetimo kod Isaka wuodi ma Sara biro nywolo e kinde makama e higa mabiro.”

²²Kane Nyasaye osewuoyo gi Ibrahim, nowuok moweyo Ibrahim kanyo.

²³Odiechieng’ono ema Ibrahim notimoe gima Nyasaye nochike. Notero Ishmael wuode nyangu, kaachiel gi joma chwo duto monywol e dalane, kod wasumbini duto.

²⁴Ibrahim ne oter nyangu ka jahigni piero ochiko gochiko.

²⁵Ishmael wuode to ne jahigni apar gadek.

²⁶Kamano Ibrahim gi Ishmael wuode,

²⁷kaachiel gi wasumbe duto noter nyangu odiechieng’ achiel.