Read luo Chakruok 18 Bible Online

Chakruok 18 - luo bible

Chakruok 18

¹Ruoth Nyasaye nofwenyore ni Ibrahim but yien milemoe mag Mamre. Noyudo oyueyo e dho hembe, ka chieng’ kech.

² To kane oting’o wang’e nopo koneno ji adek mochung’ e nyime. Noringo kodhi romonigi, kendo nogoyo chonge piny, mokulore nyaka e lowo.

³Eka nowacho niya, “Ruoth, kiyie koda, to kik ikadh mak irawo kuoma.

⁴Weuru aomnu pi mondo uluokgo tiendu, kendo uyue e tiend yadhni.

⁵Abiro kelonu chiemo mondo omedu teko, eka unyalo dhi nyime gi wuodhu mosekelou irani.” Ne gidwoke niya, “Mano ber, tim kamano.”

⁶Kuom mano Ibrahim noreto kodhi ir Sara e hema, mowachone niya, “Kaw mogo moromo aditni adek mondo itedgo kuon piyopiyo.”

⁷Eka noringo odhi e kund dhok moyiero nyarwath mopugno. Nomiye jatichne moro moyang’e, kendo olose piyopiyo.

⁸Eka Ibrahim nokawo adila gi chiewo kod ring’o ma nolosono, moketo e nyim jogo. Kane gichiemo, nochung’ e tiend yath koritogi.

⁹Bang’e ne gipenjo Ibrahim niya, “Ere Sara chiegi?” Nodwokogi ni, “En e hema ka”.

¹⁰ Wendono nowachone niya, “Anaduog iri e kinde makama higa mabiro, kendo nanwang’ ka sara chiegi osenywolo nyathi mawuowi.” To kara Sara nowinjo wachno kobet e dho hema e ng’e wendo.

¹¹Ibrahim gi Sara ne josedoko moti, kendo ndalo Sara mag nywol nosekadho.

¹² Kuom mano, Sara nonyiero e chunye kawacho niya, “Bende danywol nyathi ka aseti kama, to chwora bende osedoko moti?”

¹³Eka Ruoth Nyasaye nopenjo Ibrahim niya, “Ang’o momiyo Sara nyiero, kawacho ni, ‘Bende danywol nyathi kasedoko moti kama?’ ”

¹⁴ Ruoth Nyasaye nomedo penje niya, “Bende nitie gimoro manyalo tama? Abiro duogo iri e kinde makama higa mabiro, kendo nanwang’ ka Sara osenywolo nyathi mawuowi kaka asewacho.”

¹⁵Sara noluor ahinya, omiyo nokwer ni ok onyiero. To Ruoth Nyasaye nowachone niya, “Ooyo, ne inyiero!”

¹⁶Bang’e jogo nowuok, ka Ibrahim kowogi, kendo ne gichopo kuma ne ginyalo nenogo Sodom.

¹⁷Ruoth Nyasaye nowacho e chunye niya, “Bende dapand Ibrahim gima adwaro timo?

¹⁸Nyikwaye nodok oganda maduong’ kendo maratego, mi ogendini duto mae piny nokwaya mondo aguedhgi kaka aseguedho Ibrahim.

¹⁹Aseyiere mondo ochik nyithinde kod nyikwaye oluw yorena ka gitimo timbe mabeyo kendo makare. Kamano natimne gik moko duto ma nasesingorane.”

²⁰Omiyo Ruoth Nyasaye nowacho niya, “Nitie ywak mang’eny nikech richo madongo ma jo-Sodom gi jo-Gomora osetimo.

²¹Kuom mano, nyaka adhi ane ka ywak ma asewinjono en adier, ni mar nyaka ang’e adiera!”

²²Jogo nowuok, ma omako yo madhi Sodom, to Ibrahim nodong’ kochung’ e nyim Ruoth Nyasaye.

²³Nosudo machiegni, mopenjo Ruoth Nyasaye niya, “Ibiro tieko joma onge ketho kaachiel gi joma nigi ketho koso?

²⁴Ka nitie ji piero abich makare e dala, diketh dalano, koso diweye mondo ires ngima ji piero abich makarego?

²⁵Adier, ok dineg jomaonge ketho kaachiel gi joma nigi ketho. Ok inyal timo kamano, nikech kapo ni itimo kamano, to jomaonge ketho diyud mana kum maromre gi joma nigi ketho. To mano ok nyalre, nikech Jang’ad Bura mar piny ngima nyaka ng’ad bura kare.”

²⁶Ruoth Nyasaye nodwoke niya, “Kayudo ji piero abich maonge ketho e Sodom, to ok naketh dalano, nikech joma onge kethogo.”

²⁷Ibrahim nomedo wacho ni Ruoth Nyasaye niya, “Yie ing’wonna kuom wuoyo kodi kamano, nikech ann mana dhano adhana ma ok owinjore wacho gimoro.

²⁸Kapo ni iyudo mana ji piero ang’wen gabich kende kuom ji piero abich, diketh dalano duto nikech ji abich moremgo?” Ruoth Nyasaye nodwoke niya, “Kanyalo yudo ji piero ang’wen gabich ma onge ketho, to ok naketh dalano.”

²⁹Ibrahim nodhi nyime kawacho niya, “Kiyudo mana ji piero ang’wen kende to?” Ruoth Nyasaye nodwoke niya “Ok naketh dalano kayudo ji piero ang’wen-go.”

³⁰Ibrahim nokwayo kendo niya, “A Ruoth Nyasaye, yie kik isin koda kapenji kendo. Kapo ni iyudo mana ji piero adek kende to?” Nodwoke ni, “Ok nakethe nikech ji piero adekgo.”

³¹Ibrahim nochako owachone niya, “Ruoth Nyasaye, yie ing’wonna kuom penji wach kendo. Ka ji piero ariyo kende ema iyudo to?” Ruoth Nyasaye nodwoke niya, “Ok nakethe kayudo ji piero ariyo.”

³²Eka nowacho ni Ruoth Nyasaye kendo niya, “Yie kik isin koda, Ruoth Nyasaye, kapenji wach mogik. Bende diketh dalano kapo ni iyudo mana ji apar kende?” Ruoth Nyasaye nodwoke niya, “Ok nakethe kanyalo yudo ji apargo.”

³³Kane Ruoth Nyasaye osetieko loso gi Ibrahim noa, mi Ibrahim bende nodok e hembe.