Read luo Chakruok 19 Bible Online

Chakruok 19 - luo bible

Chakruok 19

¹Malaika ariyogo nochopo Sodom kar ang’ich welo, moyudo ka Lut obet e dhoranga dalano. Kane onenogi, nodhi mondo oromnigi, mi nogoyo chonge piny e nyimgi, mokulore nyaka e lowo.

²Nowachonigi niya, “Jodongo, yieuru uraw e oda mondo uluok tiendu, kendo unindi. Eka kiny unyalo wuok gokinyi.” To ne gidwoke niya, “Ooyo, wabiro nindo mana e laru ka.”

³To Lut nonano ni nyaka ginind e ode, mi ne giyie. Nolosonigi chiemo, gi makati ma ok ketie thowi, mi gichamo.

⁴To kane pok gidhi nindo, jo-Sodom duto matindo, gi madongo, nolworo odno.

⁵ Ne giluongo Lut, mi giwacho niya, “Eke joma nende obiro e odi ka? Golnwagi oko mondo waterre kodi!”

⁶Kane Lut owinjo kamano, nowuok moloro dhoot.

⁷Eka nowachonigi niya, “Akwayou jowadwa, kik utim gima rach kama.

⁸Winjuru, an kod nyiri ariyo mapok ong’eyo chwo. We agolnugi oko mondo utim kodgi gima uhero. To kik utim marach ni jogi, nikech gin wenda.”

⁹To ne gidwoke niya, “Ayie e nyimwa, jadakni! In ok iromo nyisowa gima onego watim. Aye e nyimwa, nimar dipo ka watimoni marach moloyogi!” Mi ne gidhiro Lut, ka gisudo mondo gimuk dhoot.

¹⁰To ji ariyo ma welogo noywayo Lut, modwoko e ot, mi giloro dhoot.

¹¹ Eka ne gimiyo wang’ jogo duto mane ni oko odinore, mane ok ginyal yudo dhoot.

¹²Welogo nopenjo Lut niya, “Bende in gi jomoko ka kaka yawuoti kata nyigi kata chwo nyigi kata wadu moro amora? Kawgi duto mondo uwuog ka,

¹³nikech wabiro ketho dalani. Ywak man kuom dalani osebedo malich ahinya, omiyo Ruoth Nyasaye oorowa mondo wakethe.”

¹⁴Kuom mano Lut nodhi ir joma ne nywomo nyige, mowachonigi niya, “Ikreuru piyo mondo waa e dalani, nikech Ruoth Nyasaye biro kethe.” To ne giparo ni otugo.

¹⁵Kane piny oru, malaikago norungo Lut mondo owuogi, ka giwachone niya, “Tim piyo! Kaw chiegi gi nyigi ariyo man ka, nono to ibiro tho sa mikethoe dalani.”

¹⁶ To kane gineno ni pod odigni, ne gimako lwete, mi gigole e dalano kaachiel gi chiege kod nyige, nikech Ruoth Nyasaye nokeche.

¹⁷Kane gisegologi kamano, ne giwachonigi niya, “Ringuru utony. Kik ugo machiemo kata kik uchung’ kamoro amora e pap nyaka uchop e gode, nikech dipo ka utho.”

¹⁸Lut nodwokpogi niya, “Ooyo, jodongo!

¹⁹Usetimona ng’wono, kendo kuom herau ureso ngimana. To ok naring machop e gode ka pok masirani ojuka, kendo onega.

²⁰To nitie dala morio matin man machiegni ma anyalo chopoe piyopiyo. En mana dala matin, pomiyo yienauru aring achop kuno mondo ares ngimana.”

²¹Nodwoke niya, “Ayie kwayoni, kendo ok naketh dala miwachono.

²²To mak mana ni ring kunoo piyopiyo, nikech ok anyal timo gimoro ka pok ichopo kuno.” Mano emomiyo dalano ne oluong ni Zoar, (tiende ni matin.)

²³Lut nochopo Zoar ka chieng’ osewuok.

²⁴ Eka Ruoth Nyasaye nooro mach gi kite maliel mowang’o Sodom gi Gomora.

²⁵Kamano Ruoth Nyasaye noketho miego duto kod pawgi, kaachiel gi ji duto manodak kuondego, kod gik moko duto madongo e lowo.

²⁶ To chi Lut nogoyo machiemo, mi nolokore siro mar kado.

²⁷Kinyne Ibrahim nomondo kama nosechung’ie e nyim Ruoth Nyasaye,

²⁸mong’iyo yo sodom gi Gomora kod pap duto moneno iro kadhuolore.

²⁹To Ruoth Nyasaye noseparo Ibrahim ka noketho miego, mi nogolo Lut mondo kik tho e masira ma notieko mier ma odakie.

³⁰To Lut noluoro dak Zoar, oomiyo noa kuno gi nyige ariyo, modhi e gode, kendo ne gidak e rogo.

³¹Chieng’ moro, nyare maduong’ nowacho ni nyamin matin niya, “Wuonwa oseti, to onge ng’ato modong’ e piny ma nyalo kendowa mondo wanywol nyithindo kaka jomoko.

³²Bi wami wuonwa kong’o, to kosemer, to onyalo nindo kodwa mondo wayud nyithindo.”

³³Kuom mano, ne gimero wuon-gi gi kong’o gotienono, mi nyako maduoong’ noriwore gi wuon mare. To Lut nomer ahinya mane ok onyal ng’eyo gima timore.

³⁴Kinyne nyako maduong’ nowacho ni matin niya, “Ne! Nyoro wuonwa onindo koda. Wamere gi kong’o kendo kawuono, mondo idhi onind kodi, nimar dipo ka wanywolo nyithindo kode.”

³⁵Kuom mano ne gichako gimero wuon-gi otienono, mi nyako matin bende nodhi moriwore kode, to Lut ne ok ong’eyo gima timore.

³⁶Kamano nyiri ariyogo nomako ich.

³⁷Nyako maduong’ nonywolo wuowi, mochako nyinge ni Moab. En e kwar jo-Moab.

³⁸Nyako matin bende nonywolo wuowi, mochako nyinge ni Ben-ami. En e kwar jo-Amon.