Read luo Chakruok 2 Bible Online

Chakruok 2 - luo bible

Chakruok 2

¹Kamano Ruoth Nyasaye notieko chueyo polo gi piny kod gik moko duto mantie.

² Chieng’ mar auchiel Nyasaye notieko gik moko duto mane otimo, eka noweyo tijene duto mi oyueyo chieng’ mar abiriyo.

³Noguedho chieng’ mar abiriyo, kendo nowale mondo obed maler, nikech chieng’no ema noyueyoe bang’ chueyo gik moko duto.

⁴Mano e kaka nochue polo gi piny. E kinde mane Ruoth Nyasaye chueyo polo gi piny,

⁵ne onge buya kata yien motwi e lowo, nikech ne pok ooro koth e piny, to bende ne onge dhano mane nyalo pure.

⁶To kata obedo ni koth ne onge kamano, pi ne wuok e lowo, kendo ne miyo piny bedo mangich.

⁷ Eka Ruoth Nyasaye nokawo lowo monywaso, kendo ochweyogo dhano. Nokudho much ngima e um dhano, mi dhano nobedo gi ngima.

⁸Bang’e Ruoth Nyasaye noloso puodho e Eden, yo wuokchieng’, mi oketoe dhano mane osechueyo.

⁹ Nomiyo yien mopogore opogore odongo e puodhono, ma moko lombo wang’, kendo moko nyago olemo michamo. To yath manyago olemb ngima, kod mago manyago olemo ma nyiso ber gi rach, noke toe e dier puodho.

¹⁰Aora moro ne mol e puodhono, kawuok Eden, mondo omiye ng’ich, kendo bang’ wuok e puodho nopogore, mobedo aore ang’wen.

¹¹Aora mokwongo iluongo ni, Pishon. En e aora molworo piny Havila,

¹²kuma dhahabu maber kod duogo miluongo ni bedelium, gi kite ma nengogi tek miluongo ni oniks, yudoree.

¹³Aora mar ariyo iluongo ni Gihon, mamol kolworo piny Kush duto.

¹⁴Aora mar adek iluongo ni Tigris, mamol yo wuokchieng’ mar Asuria. Aora mar ang’wen to iluongo ni Yufrate.

¹⁵Eka Ruoth Nyasaye nokawo dhano, moketo e puoth Eden mondo opure kendo orite.

¹⁶Nowachone niya, “Oyieni chamo olemb yien duto manie puodho

¹⁷mak mana olemo manyiso ber gi rach ema kik icham, nikech chieng’ michame to initho.”

¹⁸Ruoth Nyasaye nowacho niya, “Ok ber ka dhano obet kende. Omiyo abiro miye ng’ama konye.”

¹⁹Kuom mano, nokawo lowo, mochueyogo le mae thim kod winy duto, mi nokelogi ni dhano mondo ochakgi nying’, kendo nying’ mane dhano omiyo moro ka moro ema nobedo nyinge.

²⁰Kamano Adam nomiyo jamni gi le mae thim kod winy duto nyinggi, to ne pod onge ng’ama konye kata madak kode.

²¹Kuom mano, Ruoth Nyasaye nomiyo nindo matut otero Adam, kendo kane onindo, Nyasaye nogolo ng’etne achiel, mi nochako odino kama nogoloe ng’edno.

²²Eka noloso dhako gi ng’edno, mokele ir Adam.

²³Mi Adam nowacho niya, “Thoo! ma e kita, chogo moa kuom choka, ringruok moa kuom ringra. Ibiro luonge ni ‘Dhako’, nikech noa kuom dhano.”

²⁴ Ma e momiyo ng’ato weyo wuon gi min, to padore kuom chiege, kendo gidoko ringruok achiel.

²⁵Giduto ne gin duge, to kata kamano ne ok gineno ka gin gi wichkuot.