Read luo Chakruok 20 Bible Online

Chakruok 20 - luo bible

Chakruok 20

¹Ibrahim noa Mamre e piny Kanaan, kawuotho matintin nyaka nochopo milambo mar pinyno, modak Gerar e kind Kadesh gi Shur.

² Nowuondo jo-Gerar ni Sara machiege en nyamin mare, omiyo Abimalek ruodh Gerar nooro joote moomone Sara.

³To Nyasaye nofwenyore ni Abimelek e lek gatieno, mowachone niya, “Ibiro tho, nikech dhako misekawono en chi ng’ato.”

⁴Mano noyudo ka Abimelek pok oriwore gi Sara, omiyo nopenjo Nyasaye niya, “Ruoth, bende dineg ji maonge gi ketho?

⁵Donge Ibrahim owuon ema nonyisowa ni Sara en nyamin mare, to Sara bende nosire kowacho ni en owadgi? Omiyo natime ratiro kakia gima rachie.”

⁶Nyasaye nodwoke niya, “Ee, ang’eyo ni isetimo kamano kikia. Kuom mano ne ok ayie mondo iriwri kode, mi iketh e nyima.

⁷Koro dwok dhakono ni chwore. Chworeno en janabi, omiyo obiro lemoni mondo kik itho. To ka ok idwoke, to ibiro tho gi joodi duto!”

⁸Kinyne gokinyi Abimelek noluongo jotichne duto monyisogi wachno, mi ne gibwok ahinya.

⁹Eka noluongo Ibrahim, mopenje niya, “Ang’o momiyo isetimonwa marach kama? Ere gima rach ma asetimoni, momiyo isekelo richo maduong’ kama kuoma, kendo kuom pinya?

¹⁰Ang’o momiyo isetimo gima ok onego ng’ato tim?”

¹¹Ibrahim nodwoke niya, “Naparo ni onge joma oluoro Nyasaye e pinyni, omiyo nagalo ni ginyalo nega mondo gikaw chiega.

¹²To adier, kata obedo ni nakendo Sara, to en nyamera, nimar en nyar wuora, to minewa ema opogore.

¹³Kuom mano kane Nyasaye ochika mondo awuog e dala wuora, kendo awuoth e pinje mamoko, nakwayo Sara niya, ‘Adwaro mondo itimna ng’wono kama. Kuonde duto ma wadhiye, to iwachie ni an owadu.’ ”

¹⁴Kane Abimelek owinjo kamano, nodwoko Sara ni Ibrahim, kendo nomiye rombe gi dhok kod wasumbini,

¹⁵kowachone niya, “Pinyni duto en mara; inyalo dak kamoro amora mihero.”

¹⁶Nonyiso Sara bende niya, “Asemiyo owadu fedha alufu achiel mondo obed ranyisi ni jou duto ni ionge gi ketho, kendo mondo ging’e ni ok isetimo gimoro marach.”

¹⁷To noyudo ka Ruoth Nyasaye osetamo mon duto mane ni e dala Abimelek nywol nikech gima nosetimore ni Sara chi Ibrahim. To kane Ibrahim olamo Nyasaye, Abimelek gi chiege kod mon ma wasumbe nochango, mi ne gichako nywolo nyithindo kendo.