Read luo Chakruok 22 Bible Online

Chakruok 22 - luo bible

Chakruok 22

¹ Chieng’ moro Nyasaye nomiyo Ibrahim tem. Noluonge niya, “Ibrahim! Ibrahim!” En to nodwoke ni, “Antie.”

² Eka Nyasaye nowachone niya, “Kaw Isaka, wuodi ma miderma kendo mihero, mondo udhigo e piny Moria. Kuchopo kuno to chiwe ka misango e wi got moro ma abiro nyisi.”

³Kuom mano Ibrahim nochiew gokinyi mang’ich. Nogawo kanje, kendo nobaro yien ma nodhi wang’ogo misango. Eka nowuok gi Isaka wuode, kod jotichne ariyo, ka gichomo kuma Nyasaye nosewachone.

⁴Bang’ ndalo adek, Ibrahim noting’o wang’e, moneno kanyono gi kuma bor, mi nowacho ni joge niya,

⁵“Dong’uru kaa gi kanyna, kwadhi kucha gi wuoda. Kwaselemo kuno, to wabiro duogo iru.”

⁶Ibrahim nomiyo Isaka yiend wang’o misango mondo oting’, to en owuon noting’o mach kod pala, mi jariyogo nochako wuoth kanyakla.

⁷Eka Isaka noluongo Ibrahim niya, “Wuora!” Mi Ibrahim nopenje ni, “En ang’o wuoda?” Isaka nowachone niya, “Wan gi mach kod yien, to ere rombo mwabiro timogo misango?”

⁸Ibrahim nodwoke ni, “Wuoda, Nyasaye owuon ema biro miyowa rombo.” Bang’ mano ne gidhi nyime gi wuodhgi kanyakla.

⁹ Kane gichopo kama Nyasaye nosenyise, Ibrahim nogero kendo-mar-misango, kendo nochanoe yien. Bang’ mano notweyo wuode, moketo e wi yien ma nosechano e kendogo.

¹⁰Eka nokawo pala mondo oneggo wuode,

¹¹to malaika mar Ruoth Nyasaye noluonge gi e polo niya, “Ibrahim! Ibrahim!” Mi Ibrahim nodwoke ni, “Antie.”

¹²Eka malaikano nokwere ni, “Kik ineg wuodi, kata kik itimne gimoro marach, nikech koro ang’eyo ni in ng’at moluoro Nyasaye, nimar ok isetama e wuodi ma miderma.”

¹³Ibrahim noting’o wang’e mopo koneno im momoko gi tungene e bungu. Nokawo imno motimogo misango ni Ruoth Nyasaye kar wuode.

¹⁴Ibrahim nochako kanyo ni Jehova-jire (Tiende ni Ruoth Nyasaye e jachiwo). Pod iwacho nyaka chil kawuono ni “God Ruoth Nyasaye ema nochiwee.”

¹⁵Malaika mar Ruoth Nyasaye nochak oluongo Ibrahim gie polo mowachone niya,

¹⁶ “Ruoth Nyasaye owacho kama:

¹⁷ Akuong’ora gi nyinga awuon ni kaka ok isetama e wuodi ma miderma, abiro guedhi moloyo, mi ami nyikwayi bed mang’eny ka sulue, kendo ka kuoyo mae dho nam. Nyikwayi nolo wasikgi,

¹⁸ kendo ogendini duto mae piny nokwaya mondo aguedhgi kaka aseguedho nyikwayi. Magi duto notimre nikech iserito chikna.”

¹⁹Ibrahim nodok ir jotichne, mi giduto ne giduogo Beer-sheba kuma nodakie.

²⁰Bang’e Ibrahim noyudo wach ni Milka osenywolo ni Nahor owadgi yawuowi.

²¹Wuowi makayo ne nyinge Huz, to jalupne ne Buz, to owetene mamoko ne Kemwel wuon Aram,

²²kod Kezed gi Hazo gi Pildash gi Jedlaf kod Bethuel.

²³To Bethuel nonywolo nyako ma nyinge Rebeka. Yawuowi aborogo e mane Milka onywolo ni Nahor owadgi Ibrahim.

²⁴To Reuma chi Nahor machielo bende nonywolo yawuowi moko, ma nyinggi Teba gi Gaham gi Tahash kod Maaka.