Read luo Chakruok 24 Bible Online

Chakruok 24 - luo bible

Chakruok 24

¹Ibrahim koro nosedoko moti ahinya, kendo Ruoth Nyasaye noseguedhe e yorene duto.

²Nowacho ni jatichne maduong’ mane rito mwandune duto niya, “Ket lweti e kind ema.

³Adwaro ni mondo ikuong’rina e nyim Ruoth Nyasaye ma Nyasach polo gi piny ni ok ninywom ni wuoda nyar piny Kanaan madakieni,

⁴to nyaka idog thurwa ir joodwa mondo iyudie nyako ni Isaka wuoda.”

⁵Jatichneno nopenje ni, “Datim ang’o ka nyakono ok oyie biro koda e pinyni? Daduok wuodi thuru kuma niayeno?”

⁶To Ibrahim nodwoke niya, “Ngang’! Kik idwok wuoda kuno!

⁷Ruoth Nyasaye ma Nyasach polo gi piny ma nogola thurwa e dala wuora, kendo nosingorena ni nomi nyikwaya pinyni ema noor malaikane nyimi mondo iyud ni wuoda nyako kuno.

⁸To ka nyakono otamore biro kodi e pinyni, muma mitimo kodani ok nomaki. To kik idwok wuoda kuno, kata da ni ang’o ema timore!”

⁹Kuom mano ng’atno noketo lwete e kind em Ibrahim ruodhe, mokwong’ore ni notim kamano.

¹⁰Eka nokawo ngamia apar mag ruodhe, kod chiwo mang’eny mabeyo, mi nomako yo modhi Nahor e piny Mesopotamia.

¹¹Nochopo godhiambo e sa ma mon dhiye kulo. Nomiyo ngamiago ogoyo chonggi piny e dho soko mane ni but dalano.

¹²Eka nowacho niya, “A Ruoth Nyasaye ma Nyasach Ibrahim ruodha, guedha tinendeni mondo wuodhani obed maber, kendo ichop singruok ma nitimo ni ruodha.

¹³Eri, achung’ e dho sokoni, kama nyi dalani biro umboe.

¹⁴Abiro kwayo nyako moro mondo oket dapige piny, amodhie, to ka odwoka ni, ‘Modhi; ngamia magi bende abiro miyo pi’, to en ema mondo obed nyako ma iseyiero ni Isaka jatichni. Kamano anang’e ni isechopo singruok mane itimo ni ruodha.”

¹⁵Kane pok otieko lemo, Rebeka nyar Bethuel ma wuod Milka chi Nahor ma owadgi Ibrahim nochopo, koting’o dapi e goke.

¹⁶Ne en nyako silili ma jaber, mapok ong’eyo dichwo. Nolor e soko, motwomo pi, eka oduogo.

¹⁷Jatich Ibrahim noreto kadhi ire, mowachone niya, “Yie imiyae pi mondo amodhi,”

¹⁸Mi nyakono noloro dapige piyopiyo, moting’o e lwete, kowachone niya, “Modhi, jaduong’.”

¹⁹Kane osetieko modho, Rebeka nowachone niya, “Koro adhi omo pi ni ngamia magi mondo omodh kaka gidwaro.”

²⁰Piyopiyo nono, noolo pi ma nodong’ e dapige e mbero mane jamni modhoe. Eka noreto e soko koomo pi nyaka ngamiago duto notieko modho.

²¹Ng’atno nobedo ka range ling’ling’ mondo one ane ka Ruoth Nyasaye oseguedho wuodhe.

²²Kane Rebeka osetieko omo pi ni ngamia, ng’atno nokawo tere mar um ma nengone tek, moketo e um Rebeka, kaachiel gi bangli ariyo mag dhahabu ma pekgi oromo achiel kuom apar mar kilo, moketo e bade.

²³Eka nopenje niya, “In nyar ng’a? Yie inyisa. Bende dwayudie kar nindo e dalau?”

²⁴Nodwoke niya, “An nyar Bethuel ma wuod Nahor gi Milka,

²⁵kendo wan gi chiemb ngamia kod lum mang’eny ma ginyalo nindoe, kaachiel gi ot bende ma unyalo nindoe.”

²⁶Kane ng’atno owinjo kamano, nogoyo chonge piny molamo Ruoth Nyasaye,

²⁷kowacho niya, “Apako Ruoth Nyasaye ma Nyasach Ibrahim ruodha, moserito singruok ma notimo ni ruodha, kendo osekela mana dala owadgi ruodha.”

²⁸Rebeka noringo nyaka od min mare, monyiso joodgi gik mosetimore.

²⁹Ne en gi owadgi ma nyinge Laban.

³⁰Laban noneno tere e um nyamin mare, kod bangli e bade, kendo nowinjo ka onyisogi gima ne ng’at cha owachone. Omiyo noringo nyaka e soko, moyudo ng’atno ka pod ochung’ but ngamia.

³¹Nowachone niya, “Donji, in ng’at ma Ruoth Nyasaye oseguedho. Ere gimomiyo pod ichung’ oko? Aseikoni ot, kendo nitie kama ngamia nyalo betie.”

³²Mi ng’atno nodonjo e ot, to Laban nogonyo gik mane ngamia oting’o kendo nopedho ni ngamia lum, momiyogi chiembgi. Eka nokelo pi mondo jatich Ibrahim gi joge olwokgo tiendegi.

³³Nokelnigi chiemo, to ng’atno nowacho niya, “Ok anyal chiemo ka pok ahulo gimomiyo abiro ka.” Omiyo Laban nowachone ni, “Ara wachi.”

³⁴Eka ng’atno nowacho niya, “An jatich Ibrahim.”

³⁵Ruoth Nyasaye oseguedho ruodha ahinya, mi osedoko ng’ama duong’. Osemiye rombe gi diek kod dhok mang’eny, kod fedha gi dhahabu, kaachiel gi wasumbni machwo gi mamon, kod ngamia gi kanje.

³⁶Bende Sara chi ruodha nonywolone wuowi koseti, kendo wuodeno ema osemiyo mwandune duto.

³⁷To ruodha nowachona niya, ‘Kuong’rina ni ok ninywom ni wuoda nyar jo-Kanaan ma adak e pinygini.

³⁸To dhiyo dalawa ir owetena, mondo iyudie nyako ni wuoda.’

³⁹Mano nomiyo apenjo ruodha niya, ‘To datim ang’o kapo ni nyakono odagi biro koda?’

⁴⁰Nodwoka niya, ‘Ruoth Nyasaye ma arito chikne pile biro oro malaikane kodi mondo oguedh wuodhi. Inikaw nyar owadwa moro e dalawa mondo obed chi wuoda.

⁴¹Kitimo kamano to muma mitimoni ok nomaki. To bende kidhi ir owetenago, mi gitamore ni ok nyargi bi kodi, to kuong’ruokni ok nomaki.’

⁴²Omiyo ka nende achopo e soko, to nalamo Ruoth Nyasaye niya, ‘A Nyasach Ibrahim ruodha, yie iguedh wuodhani.

⁴³Eri achung’ e dho sokoni. Ka nyako moro obiro umbo pi, abiro wachone niya, “Yie imiyae pi amodhi.”

⁴⁴To kodwoka ni, “Modhi, kendo abiro omo pi ni ngamia magi bende,” To en ema mondo obed nyako ma iseyiero ni wuod ruodha.’

⁴⁵Kane pok atieko lemo, Rebeka nobiro koting’o dapi e goke, molor e soko mondo otwom pi. Nawachone niya, “Yie imiyae pi amodhi.”

⁴⁶Mi nogolo dapige e goke piyopiyo, mowachona niya, ‘Modhi; ngamia magi bende abiro miyo pi.’ Kamano namodho, kendo ngamia bende noomonigi pi.

⁴⁷Bang’e napenje niya, ‘In nyar ng’a?’ Nodwoka ni, ‘An nyar Bethuel, wuod Nahor gi Milka.’ Eka naketo tere e ume, kod bangli e bade,

⁴⁸kendo nagoyo chonga piny makulora kalamo Ruoth Nyasaye. Napako Ruoth Nyasaye ma Nyasach Ibrahim ruodha mosetelona maber mondo ayud nyar owadgi ruodha ni wuode.

⁴⁹Koro nyisauru kuyie timo ng’wono ni ruodha. To ka ok uyie, bende nyisauru, mondo ang’e gima atimo.”

⁵⁰Laban gi Bethuel ne jodwoke niya, “Kaka wachni oa mana kuom Ruoth Nyasaye ok wanyal wachoe gimoro.

⁵¹Rebeka eri, kawe udhi kode mondo obed chi wuod ruodhi kaka Ruoth Nyasaye osechano.”

⁵²Kane jatich Ibrahim owinjo kamano, nogoyo chonge piny, mokulore, kolamo Ruoth Nyasaye.

⁵³Eka nomiyo Rebeka gik moko mag fedha gi mag dhahabu, kaachiel gi lewni. Owadgi Rebeka kod min-gi bende nomiyo chiwo moko ma nengogi tek.

⁵⁴Bang’e nochiemo kaachiel gi joge, mi ne ginindo kanyo. Kane gichiew gokinyi, ng’atno nowacho niya, “Weuru adog ir ruodha.”

⁵⁵To owadgi nyako kod min-gi nodwoke niya, “We nyarwa obed kodwa mondi kata kuom ndalo apar, eka bang’e udhi.”

⁵⁶To ng’atno nokwayogi ni, “Kik uriwa, to yieuru adog ir ruodha, nikech Ruoth Nyasaye oseguedho wuodhani.”

⁵⁷Mi ne giwachone niya, “We waluong nyako, mondo wawinj dhoge.”

⁵⁸Omiyo ne giluongo Rebeka, mi gipenje ni, “Iyie dhi gi ng’atni?” Nodwokogi niya, “Ee, ayie dhi kode.”

⁵⁹Kuom mano ne giyie mondo Rebeka gi dhako ma nopire jodhi gi jotich Ibrahim kod joge.

⁶⁰Ne giguedho Rebeka ka giwachone niya, “Nyathiwa, bed min ji gana gi gana, kendo nyikwayi mondo olo wasikgi.”

⁶¹Eka Rebeka kod nyige ma jotich noikore, moidho ngamia mondo gidhi gi ng’at cha. Kamano ng’atno nokawe modhi kode.

⁶²Noyudo Isaka koro osedar modak Beer-lahai-roi, e piny Kanaan ma milambo.

⁶³Kane owuotho e pap godhiambo, nopo koneno ngamia moko kabiro.

⁶⁴Rebeka bende noneno Isaka, mi nolor oa e ngamia,

⁶⁵mopenjo jatich Ibrahim niya, “Macha ng’a, mawuotho e pap ka biro romonwa cha?” Ng’atno nodwoke ni, “Macha ruodha.” Kane Rebeka owinjo kamano, nokawo nanga, moumogo wang’e.

⁶⁶Ng’atno nonyiso Isaka gik moko duto ma nosetimore.

⁶⁷Eka Isaka notero Rebeka e hembe, mokende. Isaka nohero rebeka, mi chunye koro noa kuom wach tho min mare.