Read luo Chakruok 27 Bible Online

Chakruok 27 - luo bible

Chakruok 27

¹Kane Isaka oseti modoko muofu, noluongo Esau wuode makayo, ni “Wuoda!” Esau nodwoke ni, “Antie.”

²Eka Isaka nowachone niya, “Asedoko moti kendo ok ang’eyo sa thona.

³Omiyo kaw atung’ gi asere mondo idhi e thim, inegna le.

⁴Bang’e itedna ring’o mamit kaka ahero cha, mondo ikelna acham. Eka abiro guedhi kapok atho.”

⁵To Rebeka nowinjo ka Isaka wuoyo gi Esau wuode. Omiyo kane Esau osedhi e thim dwaro le,

⁶noluongo Jakobo wuode, mowachone niya, “Asewinjo ka wuoru wacho ni Esau owadu ni,

⁷‘Negna le mondo itedna ring’o mamit acham, eka aguedhi e nyim Ruoth Nyasaye kapok atho.’

⁸Kuom mano, nyathina, yie iwinj gima awachoni.

⁹Dhiyo e jamni mondo ikelna nyidiek ariyo mopugno, atedni wuoru kaka oherocha,

¹⁰mondo iterne ocham, kendo oguedhi kapok otho.”

¹¹To Jakobo nowacho ni min mare niya, “Ing’eyo ni Esau en ng’ama rayier, to an denda poth.

¹²Kamoro wuora nyalo mula, mofweny ni awuonde, mi dayud mana kuong’ kar gueth.”

¹³To min mare nodwoke niya, “We mondo kuong’no omaka, nyathina, to in yie iomna nyidiego mana kaka awachoni.”

¹⁴Omiyo Jakobo nodhi mokelo nyidiek, mi min mare notedo ring’o mamit kaka Isaka nohero.

¹⁵Eka Rebeka nokawo lep Esau mabeyo ma nokano, mi orwakogo Jakobo.

¹⁶Nokawo bende piende diego moumogo bede Jakobo kod ng’ute kama onge yier.

¹⁷Eka nomiye ring’o ma noseloso mamitno, gi kuon ma nosetedo.

¹⁸Jakobo nodhi ir wuon mare, moluonge ni, “Wuora!” Mi wuon nodwoke ni, “Antie wuoda. To in ng’a?”

¹⁹Jakobo nodwoke ni, “An Esau wuodi maduong’. Eri asetimo kaka ninyisa. Koro chungi mondo icham ring’o ma asekeloni, eka mondo iguedha.”

²⁰Isaka nopenjo wuode niya, “To iyude piyopiyo kamano nadi?” Jakobo nodwoke ni, “Ruoth Nyasaye ma Nyasachi ema osekonya mayude.”

²¹Eka Isaka nowacho ni Jakobo niya, “Sud machiegni amuli, eka mondo ang’e ka in Esau wuoda adier.”

²²Jakobo nosudo machiegni gi wuon, mi wuon nomule, mowachone ni, “Duondi chalo gi duond Jakobo, lweti to chalo gi lwet Esau.”

²³To ne ok ofwenyo ni en Jakobo, nikech bedene notimo yier ka mag Esau, kendo mano emomiyo noyie guedhe.

²⁴Kata kamano nomedo penje niya, “In Esau wuoda adier.” Jakobo nodwoke niya, “Ee, an.”

²⁵Isaka nowachone niya, “Ara koro miya ring’o mondo acham eka aguedhi.” Eka Jakobo nomiye ring’o mochamo, kod divai omadho.

²⁶Eka wuon mare nowachone niya, “Sud machiegni wuoda, mondo inyodha.”

²⁷ Omiyo nosudo machiegni monyodhe. Kane Isaka owinjo tik lepe, noguedhe kowacho kama: “Tik wuoda madum mamitni chalo gi tik puodho ma Ruoth Nyasaye oseguedho.

²⁸Nyasaye mondo okelni koth moa e polo, mondo puotheni obed momew kendo iyud cham gi divai mogundho.

²⁹ Ogendini duto mondo otini kendo okulreni. Bed ruodh oweteni, kendo nyikwa meru mondo okulreni. Okuong’ joma kuong’i’ to oguedh jogo maguedhi.”

³⁰Kane Isaka osetieko guedho Jakobo kamano, Jakobo nowuok. To gikanyono, Esau owadgi noduogo koa dwar.

³¹En bende notedo chiemo mamit, motero ni wuon mare. Nowachone niya, “Wuora, yie ichung’ mondo icham ring’o ma asekeloni, eka iguedha.”

³²Isaka nopenje niya, “In to, in ng’a?” Nodwoke ni, “An Esau wuodi maduong’.”

³³Isaka nobwok kendo okirni ahinya, mopenje niya, “To kara macha nende ng’a, mane onego le, mokelona, nende achamo ring’ono kapok ibiro, mi aguedho ng’atno, kendo guethno osiko.”

³⁴Kane Esau owinji kamano noywak malit ahinya, mowacho niya, “Wuora, an bende guedha!”

³⁵Isaka nodwoke niya, “Owadu nobiro mowuonda, kendo koro osekawo guethni.”

³⁶ Eka esau nowacho niya, “Ne onyal chake ni Jakobo, nikech koro osewuonda diriyo, mokwongo nokawo duong’na mar nywol, kendo koro osemaya gueth. To donge ikanonae gueth moro?”

³⁷Isaka nodwoko Esau niya, “Aseloke ruodhi, kendo aseloko owetene duto mondo obed jotichne. Aseguedhe gi cham gi divai, koro wuoda ere gima odong’ ma datimni?”

³⁸ To Esau nomedo penjo wuon niya, “Wuora, ne in mana gi gueth achiel kende, yie iguedha an bende.” Mi noywak malit.

³⁹ Eka Isaka nowachone niya, “Inidag e piny motimo ongoro kendo puotheni ok noyud koth moa e polo.

⁴⁰ To liganglani ema nomiyi chiemo, kendo inibed jatich owadu. To kinde nobi ma ining’anyie, kendo nia e bwo lochne.”

⁴¹Esau nomako sadha gi Jakobo nikech gueth mane wuon-gi oseguedhego. Omiyo noparo niya, “Wuora tinde chiegni tho, to kaseloso liende, to abiro nego Jakobo owadwa.”

⁴²To kane Rebeka ong’eyo gima Esau paro, noluongo Jakobo mowachone niya, “Wuoda, winji! Esau owadu dwaro negi mondo ochulni kuor.

⁴³Omiyo adwaro ni mondo itim gima abiro wachoni. Ikri piyopiyo mondo iring idhi Harran ir Laban owadwa,

⁴⁴idag kuno. Ka mirimb owadu oserumo,

⁴⁵kendo wiye osewil gi gima isetimone, eka naor ng’ato mondo oomi. Ere gima omiyo yawuota ariyo ditho odiechieng’ achiel?”

⁴⁶Kuom mano, Rebeka nowacho ni Isaka niya, “Mond Esau ma nyi pinje mokogi ojoga. Ka dipo ni Jakobo bende okendo mana nyar Hiti, to ber katho.”