Read luo Chakruok 31 Bible Online

Chakruok 31 - luo bible

Chakruok 31

¹Jakobo nowinjo ni yawuot Laban wacho niya, “Jakobo osekawo gik wuonwa duto, kendo mwandu ma en go oseyudo mana kuom wuonwa.”

²Noneno bende ka Laban koro ok ohere kaka chon.

³Bang’e Ruoth Nyasaye nowacho ni Jakobo niya, “Dogi e pinyu ir oweteni, abiro bet kodi kuno.”

⁴Omiyo Jakobo noluongo Rahel gi Lea kuma nokwayoe jambe,

⁵mowachonigi niya, “Aseneno ka wuonu tinde ok ohera kaka nohera e kinde mokwongo, to kata kamano Nyasach wuora osebedo ka ni koda.

⁶Uduto ung’eyo kaka asetiyo ni wuonu gi tekra duto.

⁷En to, osewuonda, moloko pokna nyadipar. To kata kamano, Nyasaye ne ok oweyo ohinya.

⁸Kane Laban owachona ni diek marang’eye ema nobed pokna, to diek duto ne nywolo mana nyithindo marang’eye, kendo ka nowacho ni jamni ma kitgi rapora ema nobed pokna, to diek duto ne nywolo mana nyithindo ma kitgi rapora.

⁹Kamano Nyasaye osegolo jamni kuom wuonu, momiya.

¹⁰E kinde mane thuondi dwaro luwo jamni, naleko maneno ni nyuogi duto malupo, gin rang’eye gi raponde kod ma kitgi okiko okiko.

¹¹Malaika mar Nyasaye nowuoyo koda ka aleko, moluonga niya, ‘Jakobo’. Mi nadwoke ni, ‘Antie’

¹²Nowachona niya, ‘Neye kaka nyuogi duto ma luwo diek gin rang’eye gi raponda kod ma kitgi okiko okiko. Mano timore nikech aseneno gik moko duto ma Laban timoni.

¹³ An e Nyasaye ma nofwenyoreni Bethel kuma niwiroe siro gi mo, kichiwena, kendo ikuong’ori. Koro wuogi ia e pinyni mondo idog thuru.’ ”

¹⁴Rahel gi Lea ne jodwoke niya, “Onge mwandu ma wabiro chamo kuom wuonwa.

¹⁵Donge tinde okwanowa ka jomoko nono, nikech oseng’iewowa kendo osechamo mwandu duto mane onywomwa.

¹⁶Mwandu duto ma Nyasaye osegolo kuom wuonwa gin mawa kod nyithindwa, omiyo tim mana kaka Nyasaye osewachoni.”

¹⁷Kamano Jakobo noikore mondo odog ir wuon mare e piny Kanaan. Noketo nyithinde gi monde e ngamia, mi nosembo jambe duto, kendo nokawo gimoro amora ma noseyudo Mesopotamia.

¹⁸

¹⁹E kindeno, noyudo ka Laban odhi ng’ado yie rombe, kendo kane pod en kuro, Rahel nokwalo nyisechene,

²⁰to Jakobo bende nowuonde moa ling’ling’ ma ok onyise.

²¹Nokawo gige owuon moringo oa. Nong’ado aora Yufrate, momako yo madhi e piny gode mag Gilead.

²²Bang’ ndalo adek, Laban nowinjo ni Jakobo osea,

²³omiyo nokawo joge, kendo ne gilawe kuom ndalo abiriyo, mi gijuke e got Gilead.

²⁴To Nyasaye nofwenyore ni Laban ja-Aram e lek gotieno, mowachone niya, “Kik iwach ni Jakobo gimoro amora.”

²⁵Laban noyudo ka Jakobo oguro hembe e got Gilead, mi en bende noguro mare kanyo gi joge.

²⁶Laban nopenjo Jakobo niya, “Ang’o momiyo niwuonda, mikawo nyiga iringogo ka joma omak e lweny?

²⁷Ere gimomiyo nia ling’ling’ ka akia? Dine inyisa ni idwaro dhi, dine akowi gi mor, kiwerni kendo igoyoni thum.

²⁸Bende ne ok iweyo agoyo oriti ni nyiga gi nyikwaya. Kuom mano isetimo gima ofuwo.

²⁹An gi teko mar hinyi, to Nyasach wuoru nyoro owuoyo koda, ka kwera ni kik awachni gimoro amora.

³⁰Ang’eyo ni ne ia nikech siso ne oloyi gi joodu, to ang’o momiyo nikwalo nyisechena”?

³¹Jakobo nodwoke niya, “Naringo aa nikech naluor ni dipo ka imaya nyigi.

³²To ng’ato ang’ata moyud gi nyisecheni nyaka negi! Rang gimoro amora ma mari mondo ikaw ka jowagi neno.” To Jakobo ne ok ong’eyo ni Rahel ema nosekwalo nyisechego.

³³Laban nodhi e hemb Jakobo gi hemb Lea gi hemb nyiri ariyo ma jotich, to ne ok oyudo gimoro. Kane owuok e hemb Lea nodhi e mar Rahel.

³⁴To kata kamano Rahel nosepando nyisechego e bwo kom ngamia, mi obetie. Laban nodwaro kuonde duto e hema, to ne ok oyudo nyisechego.

³⁵Rahel nowacho ni wuon mare niya, “Wuora, kik ikech koda, ni ok anyal chung’e nyimi, nikech atuo tuo mon.” To kata Laban nodwero kamano, ne ok onyal yudogi.

³⁶Eka mirima nomako Jakobo, modhaw gi Laban kowachone niya, “Ere gima aseketho momiyo iselawa matek,

³⁷kendo seto giga duto? Ka iseyudo gimoro ma mari, to gole oko e nyim jowa gi jou, mondo gipog kindwa kodi.

³⁸Asedak kodi koro kuom higni piero ariyo, to rombi kata dieki pok obuogo, bende pok achamo imi kata achiel.

³⁹Kane ondiek onego romboni moro, ne ok adewo keloni ringe ma dinyisi gima osetimore, to nachulo achula. Ne iketo chik ni nyaka achul chiayo moro amora mokwal, bed ni okwale godiechieng’ kata gotieno.

⁴⁰E kindego duto chieng’ ne chama godiechieng’, to koyo chama gotieno, kendo nindo ne ok tera.

⁴¹Kamano e kaka asetiyoni kuom higni piero ariyogi. Natiyoni kuom higni apar gang’wen mondo imiya nyigi ariyo, kendo namedo tiyoni kuom higni auchiel mondo ayud jamni kaka pokna, to niloko pokna nyadipar.

⁴²Ka dine Nyasach Ibrahim kwara mane Isaka bende lamo, ok ni koda, to dine iseriemba gi lweta nono. To Nyasaye noneno kaka natiyo matek, kendo kaka nachandora, omiyo nyoro okweri gotieno ni kik itimna gomoro marach.”

⁴³Laban nodwoko Jakobo niya, “Nyigo gin nyiga, kendo nyithindogo gin nyithinda; jamnigo bende maga. Gik moko duto ma in go gin maga. To koro datim nyiga gi nyithindgi nadi?

⁴⁴Watim winjruok, kendo wachok kite mondo obed rapar e kindwa kodi.”

⁴⁵Omiyo Jakobo noyiero kidi mang’ongo, mochungo tir ka siro mar rapar,

⁴⁶kendo nowacho ni joge mondo okwany kite moko, mi ne gichokogi kaachiel. Eka ne gichiemo but kitego.

⁴⁷Laban nochako nying kanyo ni Jegar-sahadutha, to Jakobo nochake ni Galeed. (Jegar-sahadutha en dho Aram, to Galeed en dho Hibrania. Tiend nying ariyogo en pidh kite mobedo ka janeno.)

⁴⁸Laban nowacho niya, “Chakre kawuono, pidh kiteni biro bedo ka janeno e kindwa kodi”. Mano emomiyo nochak kanyo ni Galeed.

⁴⁹Laban nowacho kendo niya, “Kwasepogore, to Ruoth Nyasaye mondo ong’i timbewa.” Mano emomiyo nochak kanyo bende ni Mizpa (tiende ni kar ng’icho).

⁵⁰Laban nomedo wacho niya, “Kapo ni ithago nyiga, kata ka ikendo mon moko ka onge janeno, to ng’e ni Nyasaye e janeno e kindwa kodi.”

⁵¹Eka nodhi nyime kowacho ni Jakobo niya, “Ne pidh kite ma asechoko, kod siro ma asechungo e kindwa.

⁵²Pidhni kod sironi mondo obed ka janeno ni ok nakadh pidhni mondo amonji, to in bende ok nikadh pidhni kata sironi mondo imonja.

⁵³Nyasach Ibrahim gi Nyasach Nahor nopog kindwa kodi kwatimo kamano.” Bang’e Jakobo nokuong’ore e nying Nyasaye mane Isaka wuon mare lamo.

⁵⁴Noyang’o chiayo moro, motimogo misango e godno, kendo noluongo wedene mondo obi ochiem. Kamano ne gichiemo kaachiel, kendo ne ginindo kanyo.

⁵⁵Kinyne Laban nogoyo ni nyige gi nyikwaye oriti, mi noa modok dala.