Read luo Chakruok 32 Bible Online

Chakruok 32 - luo bible

Chakruok 32

¹Jakobo to nodhi nyime gi wuodhe, kendo nopo ka malaika mag Nyasaye oromo kode.

²Kane onenogi, nowacho niya, “Ma en oganda mar Nyasaye!” Mi nochako kanyo ni Mahanaim (tiende ni, ogendini ariyo).

³Jakobo nooro joote mondo otel nyime ir Esau owadgi mane nie gweng’ Seir, e piny Edom.

⁴Nochikogi mondo giwach ni Esau ni jatichne Jakobo owacho kama: “Asebedo kadak gi Laban nyaka koroni.

⁵An gi dhok kod kenje gi rombe gi diek, kaachiel kod wasumbini machwo gi mamon. Kuom mano aoroni wach mondo iyie irwaka gi ng’wono.”

⁶Joote nodwogo ir Jakobo, mowachone niya, “Ne waromo gi owadu Esau ka biro romoni gi ji mia ang’wen.”

⁷Kane Jakobo owinjo kamano, nobwok, kendo chunye nochandore ahinya. Omiyo nopogo joge gi jambe e migepe ariyo,

⁸koparo ni kapo ni Esau omonjo migawo achiel, to migawo machielo nyalo tony.

⁹Eka nolemo, kowacho niya, “A Ruoth Nyasaye ma Nyasach Ibrahim kwara, kendo Nyasach Isaka wuora, in ema niwachona ni mondo adog thurwa ir joodwa, kendo ni initimna maber.

¹⁰Ok awinjora gi herani maradier kendo mosiko misenyisa. Nang’ado aora Jordan ka aonge gi gimoro mak mana ludha mar wuoth kende, to korom aseduogo gi ogendini ariyogi.

¹¹Omiyo resa e lwet Esau owadwa, nimar aluor ni dipo ka otiekowa duto, ma ok oweyo kata mana mon kata nyithindo.

¹² Par kaka nisesingorina ni iniguedha, kendo nimiya nyikwayo mang’eny ka kwoyo mae dho nam ma ok nyal kwan.”

¹³Jakobo nobuoro kanyo, to kinyne noyiero

¹⁴diek mia ariyo ma nyibuche, gi nyuogi piero ariyo, kod rombe mia ariyo, gi imbe piero ariyo,

¹⁵kod ngamia madhodho piero adek man gi nyithindgi, gi dhok piero ang’wen, gi rwedhi apar, kod kenje piero ariyo mamon, gi apar machwo.

¹⁶Noketo kweth ka kweth e lwet jatichne achiel achiel kawachonigi niya, “Teluru nyima kuweyo thuolo e kind kweth gi kweth.”

¹⁷Eka nochiko jal ma notelo niya, “Ka Esau owadwa oromo kodi, mopenji ni in jatich ng’a, to idhi kanye, kendo jamni misembogi mag ng’a?

¹⁸To mondo idwoke kama: ‘Gin mag Jakobo jatichni, kendo ooronigi kaka chiwo. En owuon to obiro bang’wa.’ ”

¹⁹Jal mar ariyo gi mar adek kod jogo duto mane sembo jamnigo bende Jakobo nochiko kamano,

²⁰monyisogi ni mondo gimed wacho ni Esau niya, “Jakobo jatichni biro bang’e,” Jakobo noparo ni obiro hoyo chuny Esau gi chiwo mane oseorone motelogo, kendo koromo kode bang’e, to dipo ka orwake gi ng’wono.

²¹Kamano chiwogo duto nodhi motelo nyime, to en nodong’ monindo e kambi gotienono.

²²Gotienono Jakobo nochiew mokawo monde ariyo gi jotichne ariyo ma nyiri kod nyithinde apar gachiel, mi ne gikadho kama ing’adogo aora Jabok.

²³Kane osekonyogi ng’ado aora kaachiel gi mwandune duto,

²⁴ nodong’ kende, kendo ng’ato nobuke moi kode kanyo nyaka piny oru.

²⁵To kane ng’atno oneno ni ok onyal nyago Jakobo, nogoyo achiake, mi em Jakobo owil ka pod gii.

²⁶Eka ng’atno nowacho niya, “Weya mondo adhi, nikech piny, dwaro ru.” To Jakobo nodwoke niya, “Ok anyal weyi idhi kapok iguedha.”

²⁷Nopenjo Jakobo niya, “Nyingi ng’a?” Mi nodwoke ni, “Nyinga Jakobo.”

²⁸ Eka ng’atno nowachone niya, “Chakre kawuono nyingi ok nobed Jakobo, to ibiro luongi ni Israel, nikech isei gi Nyasaye, kendo gi ji, miloyo.”

²⁹ Jakobo nokwaye niya, “Yie inyisa nyingi.” To nopenje ni, “Ang’o momiyo ipenja nyinga?” Kata kamano noguedhe.

³⁰Jakobo nowacho niya, “Aseneno Nyasaye wang’ gi wang’, to pod angima!” Omiyo nochako nying kanyo ni Peniel (tiende ni, wang’ Nyasaye).

³¹Jakobo noa Peniel ka chieng’ wuok, kendo nowuotho kofwono, nikech bamne nosewil.

³²Mano emomiyo jo-Isarel ok cham pond bam nyaka chil kawuono, nikech ring’ono ema ng’atno nogoyo e bam Jakobo.