Read luo Chakruok 33 Bible Online

Chakruok 33 - luo bible

Chakruok 33

¹Kane Jakobo oting’o wang’e moneno Esau kabiro gi ji mia ang’wen, nopogo nyithinde ni Lea gi Rahel kod monde ariyo ma jotich.

²Noketo monde ma jotichgo gi nyithindgi mondo otel, eka Lea gi nyithinde noluwogi, to Rahel gi Josef ema noketo chien.

³Eka Jakobo notelo nyimgi, mogoyo chonge piny kokulore nyaka e lowo dibiriyo, kodhi nyime nyaka noromo gi owadgi.

⁴Esau noringo kadhi romone, kendo nokwake monyodhe, mi ne giywak giduto.

⁵Kane Esau oting’o wang’e, moneno mond Jakobo gi nyithindgi nopenjo niya, “Magi ng’a gini man kodigi?” Jakobo nodwoke ni, “Jaduong’, gin nyithindo ma Nyasaye osemiya kuom ng’wonone.”

⁶Eka monde ma jotich nosudo machiegni, moro ka moro gi nyithinde, mi gikulore piny.

⁷Lea gi nyithinde be nosudo machiegni, mokulore. Eka Josef gi Rahel bende ne josudo, mokulore.

⁸Esau nopenjo Jakobo niya, “Oganda maduong’ mane aromogo cha to?” Jakobo nodwoke niya, “Jaduong’, naorogi mondo gibi gikwana ng’wono kuomi.”

⁹To Esau nowachone niya, “An gi giga moroma, owadwa. Omiyo bed abeda gi magi.”

¹⁰Jakobo nowachone niya, “Ooyo; ka iseng’wonona, to yie ikaw mich ma achiwogo. Kaka iserwaka gi ng’wono, biro e nyimi chalna mana gi biro e nyim Nyasaye.

¹¹Omiyo yie ikaw chiwo ma asekeloni, ni mar Nyasaye oseguedha mi ayudo gik moko duto madwaro.” Kamano nochune nyaka nokawo michgo.

¹²Bang’ mano Esau nowacho ni Jakobo niya, “Waikreuru mondo waa, kendo an ema abiro telo.”

¹³To Jakobo nodwoke ni, “Jaduong’, ing’eyo ni nyithindogi pod tindo, to bende nyaka apar jamni madhodho. Kapo ni osemb gi matek kata mana kuom ndalo achiel, to giduto ginyalo tho.

¹⁴Kuom mano, jaduong’, akwayi mondo itel atela nyima, to abiro luwi mos mos gi nyithindo kod jamni, nyaka achop iri Seir.”

¹⁵Esau nowachone ni, “Kara awe joga moko mondo akonyi wuoth.” To Jakobo nodwoko ni, “Erokamano jaduong’; ok onego ithagri kamano.”

¹⁶Omiyo Esau nomako yo, modok Seir.

¹⁷Jakobo to nolokore mochomo Sukoth, mi nogero ot kuno, kendo nolosoe abilni ni jambe. Mano emomiyo nochak nying kanyo ni Sukoth (tiende ni, abilni).

¹⁸Kane Jakobo osea Mesopotamia, nochopo maber e dala Shekem e piny Kanaan. Noguro hembe yo wuok chieng’, machiegni gi dalano.

¹⁹ Lowo mane ogedoe kanyo nong’iewo kuom nyikwa Hamor ma wuon Shekem gi fedha mia achiel.

²⁰Nogero kendo-mar-misango kanyo, mochako ni Elelohe-Israel, (tiende ni, El, ma Nyasach Israel.)