Read luo Chakruok 34 Bible Online

Chakruok 34 - luo bible

Chakruok 34

¹Chieng’ moro Dina nyar Jakobo mane Lea onywolo, nodhi limo nyi pinyno.

²Shekem wuod Hamor ma ja-Hivi mane ruodh pinyno nonene, mokawe kendo noriwore kode, mokethe.

³To nohero Dina ahinya, omiyo notemo hoyo chunye,

⁴mi nowacho ni wuon mare niya, “Nywomna nyakoni.”

⁵Kane Jakobo owinjo ni Shekem oseketho Dina nyare, ne ok otimo gimoro nikech noyudo ka yawuote odhi kwath.

⁶Gikanyono mane yawuot Jakobo odwogoe koa kwath, ema Hamor wuon Shekem bende nobiroe ir Jakobo mondo olos kode. Yawuot Jakobo nobwok kendo ne gikecho ahinya ka ne giwinjo ni Shekem oseketho nyamin-gi, nikech jo-Israel kwano gima kamano ka gima rach ahinya.

⁸Hamor nowachonigi niya, “Shekem wuoda ohero nyani ahinya, omiyo yieuru mondo okende.

⁹Wanywom nyiu, to un bende ukend mawa, mondo wabed wede.

¹⁰Daguru kodwa, mondo uwuoth e pinywa duto kaka udwaro, kendo uyud lopu uwegi.”

¹¹Bang’e Shekem nowacho ni wuon Dina kod owete Dina niya, “Yie utimna gima akwayou, mondo anywomnu gimoro amora mudwaro.

¹²Nyisauru kar gik monego anywomnu kod chiwo monego amiu. Ayie chiwo gimoro amora mudwaro, kuyie ni mondo akend nyani.”

¹³To yawuot Jakobo nowuondo Shekem gi Hamor wuon mare nikech Shekem nosekuodo wi Dina nyamin-gi.

¹⁴Ne giwachonigi niya, “Ok wanyal yie mondo ng’ama ok oter nyangu mondo okend nyaminwa, nikech mano dibed wichkuot kuomwa.

¹⁵To mak mana ka uyie chalo kodwa, mi utero jou machwo duto nyangu,

¹⁶eka wanyalo yie mondo ukend nyiwa, kendo wan bende wanyalo kendo mau, mondo wadag kaachiel kodu, kendo wabed oganda achiel.

¹⁷To ka ok uyie mondo oteru nyangu, to wabiro kawo nyarwa, wadhigo.”

¹⁸Wechego ne beyo ne Hamor kod Shekem wuode,

¹⁹omiyo Shekem, mane omi duong’ ahinya moloyo jomoko duto e dalagi, notimo kaka osewachne piyopiyo, nikech nohero nyar jakobono ahinya.

²⁰Kamano Hamor gi Shekem nodok kar bura e dhoranga dalagi, mi ne giwuoyo gi jo thurgi,

²¹ka giwachonigi niya, “Jogi gin osiepewa. Wawegiuru mondo gidag e pinywa ka, kendo giwuothie kaka gidwaro. Piny lach moromowa duto kodgi. Weuru wakend nyigi, kendo wamigi nyiwa gikendi.

²²To ok ginyal yie dak kodwa mondo wabed oganda achiel kodgi mak mana ka jowa machwo duto oter nyangu kaka gin.

²³To kwayie timo kamano, eka ginidag kodwa, kendo jambgi gi mwandugi kod dhogi biro bedo mawa.”

²⁴Jo dalano duto noyie gi gima Hamor gi Shekem nowachonigi, mi joma chwo duto noter nyangu.

²⁵To bang’ ndalo ariyo, kane pod jo-Shekem nigi rem malit, yawuot Jakobo ma Simeon kod Lawi, owete Dina mahie, nokawo gigi mag lweny, mi gidonjo e dala jogo apoya, kendo ne ginego joma chwo duto.

²⁶Ne ginego Hamor gi Shekem wuode, eka ne gigolo Dina e od Shekem, mi giago.

²⁷Yawuot Jakobo mamoko nomonjo joma ne owetegi osehinyogo, mi giyako dalano nikech jogo nosekuodo wi nyamin-gi.

²⁸Ne gipeyo jambgi gi kenjegi kod gik moko duto mane giyudo e dala kod oko e lek.

²⁹Bende ne giyako mwandugi duto, kendo ne gikawo mon gi nyithindo kod gik moko duto mane giyudo e udi.

³⁰Jakobo nowacho ni Simeon gi Lawi niya, “Usekelona chandruok, kendo usemiyo jo-Kanaan gi jo-Perizi ma weg pinyni mon koda. An mana gi ji manok kende, omiyo ka jo-pinyni oriwona, to ginyalo tieka kaachiel gi jooda duto.”

³¹To ne gidwoke niya, “Ok wanyal yie mondo otimni nyaminwa ka nyako ma jachode kamano!”