Read luo Chakruok 37 Bible Online

Chakruok 37 - luo bible

Chakruok 37

¹Jakobo nomedo dak e piny Kanaan kuma ne wuon mare odakie.

²Koro ma e wach joka Jakobo. Josef ne en rawera ma jahigni apar gabiriyo, kendo nokonyo owetene ma yawuot Bilha gi Zilpa mond wuon mare kwayo rombe gi diek, to nonyiso wuon mare gik maricho mane owetenego timo.

³Jakobo nohero Josef moloyo yawuote duto, nikech nonywole koseti, omiyo notwang’one kandho ma bade boyo.

⁴To kane owetene mamoko oneno ni wuon-gi ohero Josef moloyogi duto, ne gidoko mamon kode, kendo na gidagi wuoyo kode maber.

⁵Chieng’ moro Josef noleko lek, to ka nonyiso owetene, ne gimedo mana mon kode.

⁶Nowachonigi niya, “Winjieuru kaka nende aleko.

⁷Naleko ni wan e puodho waduto kwatueyo ngano, mi wich mane atueyo noa malo mochung’ tir. Eka wiyeu nolworo wiyano mokulorene.”

⁸Owetene nodwoke ka penje niya, “Iparo ni chieng’ moro inibed ruodhwa mondo itiwa?” Mi ne gimedo doko mamon kode ahinya, nikech lek mane owacho ni olekono.

⁹Bang’e Josef nochako oleko lek machielo, mowacho ni owetene niya, “Nende aleko lek moro ni aneno wang’ chieng’ gi due kod sulue apar gachiel ka kulorena.”

¹⁰Ka ne onyiso wuon mare kod owetene wachno, wuon nokwere kapenje niya, “Lek ni no en lek manade? Iparo ni wan gi meru kod oweteni wabiro kuloreni?”

¹¹ Nyiego nomako owete Josef kode, to wuon mare nosiko kaparo wachno.

¹²Owete Josef nodhi Shekem kwayo jamb wuon-gi.

¹³Bang’e Israel nowacho ni Josef niya, “Oweteni kwayo jamni Shekem. Bi, adwaro ori irgi.” Josef nodwoke ni, “Ayie dhi.”

¹⁴Wuon mare nowachone niya, “Dhiyo ine ane ka oweteni ngima, kendo kwayo jamni maber, mondo idwokna wach.” Kamano nooro Josef Shekem, mi Josef nochako wuoth koa e holo mar Hebron kuma ne gidakie.

¹⁵Ng’at moro noromo gi Josef ka wuotho e thim, mopenje niya, “Idwaro ang’o?”

¹⁶Nodwoke ni, “Adwaro owetena. Yie inyisa kama gikwayoe.”

¹⁷Ng’atno nowachone niya, “Gisea ka, to nawinjo ka giwacho ni gidhi Dothan.” Omiyo Josef noluwo owetene moyudogi Dothan.

¹⁸Ne ginene kobiro ka pod en gichien, mi ne giparo mondo ginege.

¹⁹Ka giwacho e kindgi giwegi niya, “Neuru! Jalek lek cha biro.

²⁰Wanegeuru, kendo wawite e bugo moro ka, to wadhi wawachi ni ondiek onege. Mi wanane ane gima lekne timone!”

²¹Reuben nowinjo ka giwacho kamano, mi notemo reso Josef e lwetgi, nowachonigi niya, “Kik wanege.

²²Witeuru mana e bugo manie thim ka ni, to kik uhinye.” Nowachonigi kamano nikech nodwaro kawe achien mondo odwoke ni wuon mare.

²³Omiyo kane Josef ochopo ir owetene, ne gilonyo kandhone ma bade boyo, mi gibole e bugo

²⁴motuo maonge pi.

²⁵Eka ne gibet piny mondo gichiem, to kane gichiemo, ne gipo ka gineno oganda mar jo-Ishmael koa Gilead dhi Misr., Ne gin gi ngamia moting’o gik mang’ue ng’ar gi manemane kod yien moko.

²⁶Eka Juda nowacho ni owetene niya, “Ere ohala ma wabiro yudo kuom nego owadwa, kendo pando thone?

²⁷Wang’ieweuru gi jo-Ishmaelgi, to kik wahinye, nikech en owadwa, kendo en rembwa.” Mi owetene noyie kode,

²⁸ omiyo kane jo-ohala ma jo-Midian kadho kanyo, ne gigolo Josef oko e bugo. Eka ne ging’iewe gi jo-Ishmaelgo kuom fedha piero ariyo, mi jogo notere Misri.

²⁹Kane reuben odok limo bugono, ma ok oyudo Josef, noyiecho lepe.

³⁰Nodok ir owetene, mopenjogi niya, “Nyathi cha onge kacha! Koro anyalo timo ang’o?”

³¹Owete Josef nonego diel, mi onyumo kandhu Josef e remb diendno.

³²Ne giyiecho kandhuno mi gitero ni wuon-gi, kendo ne giwachone niya, “Neye gima wasekwanyo. Range ane ka en mar wuodi.”

³³Jakobo nong’eyo lawno, mowacho niya, “Ee, en law Josef nyaka bed ni ondiek osenege, mokidhe matindotindo!”

³⁴Noyiecho lepe, morwako pien gugru, kendo noywago wuode kuom ndalo mang’eny.

³⁵Yawuote gi nyige duto notemo hoyo chunye, to nodagi hore. Nowacho niya, “Abiro ywago wuoda nyaka atho alu bang’e.” Kamano e kaka Jakobo noywago Josef wuode.

³⁶To jo-Midian notero Josef Misri mong’iewe gi Potifar mane achiel kuom jotend Farao, kendo mane jaduong’ jorit od ruoth.