Read luo Chakruok 39 Bible Online

Chakruok 39 - luo bible

Chakruok 39

¹Josef to jo-Ishmael nosekawo motero Misri, kuma Potifar ja-Misri mane achiel kuom jotend Farao, kendo jaduong’ jorit od ruoth, nong’iewee.

² To Ruoth Nyasaye ne ni kod Josef, mi noguedhe e yorene duto. Nodak e od ruodhe ma ja-Misrino.

³Ruodheno noneno ka Ruoth Nyasaye ni kode, kendo guedhe e gik moko duto motimo.

⁴Omiyo nobedo mamor gi Josef, kendo nohero tichne, mokete jarit ode kod mwandune duto.

⁵Chakre kanyo, Ruoth Nyasaye noguedho gik moko duto mane nie od ja-Misrino, kod mago duto mane ni e puothene, mana nikech Josef.

⁶Potifar noketo gik moko duto e lwet Josef, kendo ne ok odewo rango gimoro kata achiel mak mana chiemo mochamo. Josef na nigi chia, kendo ne ojaber.

⁷Bang’ ndalo moko, chi ruodhe norange ka gombe, mowachone niya, “Bi mondo iriwri koda.”

⁸To Josef nodagi, mowachone niya, “Ruodha ok ong’eyo gimoro amora manie ode, kendo oseketo gik moko duto e lweta.

⁹Osemiya teko marom gi mare e ode, kendo ok osetuona gimoro amora mak mana in, to nikech in chiege. Koro, ere kaka danyal timo richo machal kamano, kabedo jaketho e nyim Nyasaye?”

¹⁰Dhakono nosiko kawacho ni Josef wachno, to Josef ne ok dew wachne, kendo notamore riwore kode, kata mana bedo bute ne ok obedo.

¹¹Chieng’ moro Josef nodonjo e ot mondo oti tije kaka pile, to jotich duto mag odno ne onge.

¹²Eka chi ruodhe nomake gi lawe, mowachone niya, “Bi iriwri koda!” To Josef noweyo lawe e lwete, moringo owuok oko.

¹³Kane dhakono oneno ni Josef oweyo lawe e lwete moringo owuok oko,

¹⁴noluongo jotich ode, mowachonigi niya, “Neuru! Chwora nokelo ja-Hibraniani e odwa mondo okuod wiwa! Nodonjo e ot mondo oriwre koda, to nagoyo uwi matek.

¹⁵Kane oneno ka agoyo uwi, kendo aluongou, eka noweyo lawe e lweta, moringo owuok oko.”

¹⁶Nokano lawno nyaka ruodh Josef nodwogo dala,

¹⁷mi nonwoyo mana weche ma nowachogo niya, “Misumba ma ja-Hibrania mane ikelo e odwa cha nende obiro ira mondo omaka.

¹⁸To ka nende agoyo koko, to noweyo lawe e lweta moringo owuok oko.”

¹⁹Kane ruodh Josef owinjo gima chiege nowachone, ni misumbane osetimo, nokecho ahinya.

²⁰Nomako Josef, moketo kama itueyoe mabuse mag ruoth, mi nobet kanyo. To kata Josef nobedo e od twech kamano,

²¹ Ruoth Nyasaye ne ni kode, mokeche, omiyo jaduong’ od twech nohere,

²²mokete jatend joma otwe duto. Kamano Josef norito gik moko duto mane gitimo.

²³Jaduong’ od twech ne ok odewo rango gigo duto mane oseketo e lwet Josef, nimar Ruoth Nyasaye ne ni kod Josef kendo noguedhe e gik moko duto mane otimo.