Read luo Chakruok 41 Bible Online

Chakruok 41 - luo bible

Chakruok 41

¹Bang’ higni ma dirom ariyo, Farao noleko ni ochung’ e dho aora Nael,

²mi dhok abiriyo mabeyo kendo machwe nowuok e aora, ka kwayo e odundu.

³Bang’ mano dhok moko abiriyo maricho kendo modhero nowuok e aorano, mochung’ but dhok mokwongogo e dho aora.

⁴Dhok maricho kendo modherogo nomwonyo dhok mabeyo kendo machwe kande. Gikanyono Farao nochiew.

⁵Eka nindo nochako otere, moleko kendo, mi oneno wi ngano abiriyo mochiek machwe e tiang’ achiel.

⁶To bang’ mano wi ngano abiriyo moko motho kendo ma yamb oro otwoyo nowuok e tiang’no.

⁷Wi ngano mothogo nomwonyo wi ngano mochiek machwe kande. Bang’ mano Farao nochiew, mong’eyo ni en mana lek.

⁸ Kinyne gokinyi chunye nochandore ahinya, omiyo noluongo ajuoke kod joma riek duto mane piny Misri. Nonyisogi lekne, to onge ng’ama ne nyalo lokone tiendgi.

⁹Eka jaduong’ jogam divai nowacho ni Farao niya, “Nyaka ahul gima rach ma asetimo.

¹⁰Kane ikecho gi jotichni, nitueyowa kaachiel gi jaduong’ joted makati e od jaduong’ askeche.

¹¹Eka chieng’ moro gotieno ne waleko lek waduto, kendo lek ka lek ne nigi tiende.

¹²To ja-Hibrania moro ma wuowi mane misumba jaduong’ askeche ne ni kodwa kanyo, mi ne wanyise lekwa. Nolokonwagi konyisowa tiend moro kamoro,

¹³mi gik moko notimore mana kaka noselokonwa tiend lekno. An ne odwoka e tija, to jaduong’ joted makati ne onegi.”

¹⁴Kane Farao owinjo kamano, nooro wach mondo okelne Josef, mi ne gikele piyopiyo ka gigole e od twech. Noliedo, moloko lepe, eka nobiro ir Farao.

¹⁵Farao nowachone niya, “Nende aleko lek, to onge ng’ama nyalo lokona tiende. Osewachna ni inyalo loko tiend lek moro amora.”

¹⁶To Josef nodwoke niya, “Ngang’! An ok anyal to Nyasaye biro dwoki maber.”

¹⁷Farao nonyise niya, “Nende aleko ni achung’ e dho aora Nael,

¹⁸mi dhok abiriyo mabeyo kendo machwe owuok e aora ka kwayo e odundu.

¹⁹Eka dhok moko abiriyo nowuok e aorano to gin ne gin dhok maricho kendo modhero. Pok anenoe dhok maricho kamano e piny Misri mangima.

²⁰Dhok maricho modherogo nomwonyo dhok machwe abiriyo mokwongo kande.

²¹To kane gisechamogi kamano, ng’ato ne ok nyal ng’eyo ni gisechamogi, nikech ne pod ginenore mana modhero kaka chon. Bang’e nende achiew.

²²Eka nindo nochako otera, maleko kendo, ni aneno wi ngano abiriyo mochiek machwe e tiang’ achiel.

²³To wi ngano abiriyo moko motho, kendo ma yamb oro otwoyo, nowuok bang’gi.

²⁴Mi wi ngano modherogo nomwonyo wi ngano abiriyo mochiek machwe kande. Asenyiso ajuoke lekgo duto, to onge ng’ama nyalo lokona tiendgi.”

²⁵Josef nowacho ni Farao niya, “Leknigo tiendgi achiel. Nyasaye osenyisi gima obiro timo.

²⁶Dhok abiriyo machwego gin higni abiriyo, kendo wiye ngano abiriyo machwego bende gin higni abiriyo. Giduto ginyiso tiend wach achiel.

²⁷To dhok moko abiriyo modhero mane owuok achien-go, kod wiye ngano motho kendo ma yamb oro otwoyogo nyiso higni abiriyo mag kech.

²⁸En mana kaka awachoni ni Nyasaye osenyisi gima obiro timo.

²⁹Higni abiriyo biro betie ma piny Misri mangima nobedie gi yieng’o ahinya.

³⁰Bang’ mano, higni abiriyo moko nobedie mag kech, kendo wi ji nowil gi higni abiriyo mosebet mag yieng’ogo, mi kech noketh piny.

³¹Ji ok nopar higni abiriyo mag yieng’ogo, nikech kech maluweno nobed mager miwuoro.

³²Lek ma iseleko diriyono nyiso ratiro ni Nyasaye osechano mar timo kamano, kendo obiro timogo piyopiyo.

³³Omiyo koro yier ng’at mariek kendo mong’eyo gik moko mondo iket jatelo mar Misri.

³⁴Bende nyaka iket jotelo moko e piny, mondo okanni achiel kuom abich mar chamb Misri duto. Ginitim kamano kuom higni abiriyo ma piny biro yieng’ie.

³⁵Nyaka giti gi chikni, ka gichoko cham moyud e kinde mag yieng’o mabirogo, mondo gikan-gi e dere manie mier madongo, kendo nyaka giritgi.

³⁶Chamgo nokan mondo okony piny e kinde mag higni abiriyo ma kech nobedie ka chamo piny Misri. Kamano kech ok noketh piny Misri.”

³⁷Farao gi jodonge ne mor gi wachno,

³⁸mi nopenjogi niya, “Ere kuma wanyalo yudoe ng’at moro machielo, man gi Roho mar Nyasaye machal gi jali?”

³⁹Omiyo Farao nowacho ni Josef niya, “Kaka Nyasaye osenyisi wechegi duto, onge ng’at moro mariek kendo mong’eyo gik moko moloyi.

⁴⁰ Abiro keti jatend pinya kendo joga duto biro winjo chikni. An kende ema naloyi gi duong’ nikech an ruoth.”

⁴¹Eka nomedo wachone niya, “Ne! Koro aseketi ruodh Misri duto.”

⁴² Mi nogolo tere mar loch e lwete, moketo e lwet Josef. Nomiye lewni mag bafta mayom morwako, mi olierone thiwni mag dhahabu e ng’ute.

⁴³Nomiyo oidho gach ruoth mar ariyo, kendo joritne ne goyo koko e nyime, ka wacho niya, “Yawneuru e yo!” Kamano Josef noket ruodh Misri duto.

⁴⁴Farao nowachone niya, “An e ruoth, to onge ng’ato ma notim gimoro amora e Misri ma ok in ema iyiene.”

⁴⁵Nochako Josef ni Zefenath-panea. Nonywomone nyako ma nyinge Asenath nyar Potifera, jadolo mar dala On. Kamano Josef nobedo gi teko e piny Misri duto.

⁴⁶Josef ne jahigni piero adek ka nochako tij Farao ruodh Misri. Noa ir Farao, mowuotho e piny Misri duto.

⁴⁷E kinde mar higni abiriyo mag yieng’ogo, ji nokayo cham mogundho.

⁴⁸Josef nochoko cham duto kuom higni abiriyo ma piny Misri ne nie gi yieng’o, mi nokanogi e mier madongo. E dala ka dala nokanoe cham moa e puothe machiegni kode.

⁴⁹Nokano cham mang’eny ka kuoyo ma e dho nam. Chamgo nodoko mathoth mokadho apima.

⁵⁰Kane pok higni mag kech obiro, Josef nosenywolo yawuowi ariyo gi Asenath nyar Potifera, jadolo mar On.

⁵¹Josef nowacho niya, “Nyasaye osemiyo wiya owil gi chandruokna duto.” Omiyo nochako wuode makayo ni Manase (tiende ni wich wil).

⁵²Nowacho bende niya, “Nyasaye osemiya nyithindo e piny ma nachandorae.” Omiyo nochako wuode mar ariyo ni Efraim, (tiende ni, omiya nyithindo).

⁵³Kane higni abiriyo mag yieng’o e Misri orumo,

⁵⁴ higni abiriyo mag kech nochakore mana kaka Josef nosewacho. Kejno nomako pinje moko duto, to mak mana Misri ema cham ne yudoree.

⁵⁵ Kamano ka ne kech omako piny Misri duto, jopiny noywak ni Farao mondo omigi chiemo. To nowachonigi niya, “Dhiuru ir Josef, kendo utim kaka owachonu.”

⁵⁶Kech koro nokwako piny Misri, omiyo Josef noyawo dere duto, mong’iewo cham gi jo-Misri, nimar kech ne lich ahinya.

⁵⁷Ji moa e pinje moko duto bende nobiro Misri mondo ong’iew cham kuom Josef nimar kech ne ger e piny ngima.