Read luo Chakruok 43 Bible Online

Chakruok 43 - luo bible

Chakruok 43

¹Kech ne pod ger ahinya e piny Kanaan,

²omiyo kane jood Jakobo osetieko cham duto mane girundo Misri, Jakobo nowacho ni yawuote niya, “Doguru Misri mondo urundie cham moko matin, wakonyrego.”

³To Juda nodwoke niya, “Ng’atcha nosiemowa matek ni kik wadog ire ka ok wadhi gi owadwa machogo.

⁴Omiyo kiyie ni mondo wadhi kode, to eka wanyalo dhi rundo cham.

⁵To ka ok iyie mondo odhi kodwa, to ok wanyal dhi, nimar ng’atcha nowacho ni kik wadog ire ka ok wadhi gi owadwa machogo.”

⁶Israel nowacho niya, “Ang’o momiyo usetimona kamano, kunyiso ng’atno ni un gi owadu moro modong?”

⁷Ne gidwoke niya, “Nopenjowa matek weche ma kuomwa kod ma kuom joodwa, kowacho niya, ‘Wuonu pod ngima? Donge un gi owadu moro?’ Omiyo nyaka ne waduok penjonego. To ne ok wang’eyo ni onyalo wachonwa mondo water owadwa ire.”

⁸Juda nowacho ni Israel wuon mare niya, “We waikre mondo adhi gi rawerani. Eka wan duto, kod in kaachiel gi nyithindwa dwakuo e kech.

⁹Asingora ni nobed wachna ka ok adwokonigo ka ongima, kendo anabed jaketho e nyimi nyaka chop thona.

¹⁰Ka dabed ni ok waseketho kindegi duto, di koro wasechopo kuno, kendo duogo nyadiriyo.”

¹¹Israel wuon-gi nowachonigi niya, “Ka ochuno ni nyaka bed mana kamano, to ara timuru. To kawuru gik moko mabeyo mag pinyni, machalo duogo gi mor kich gi gik mang’ue ng’ar, gi manemane, kod olembe moko, mondo uting’ e oguindeu, uter ni ng’atmo kaka chiwo.

¹²Bende kawuru pesa moromo rundo diriyo, nimar nyaka udwok pesa mane uyudo kodwoknu e ogundeu, nikech nyalo bet ni ne jogo oboth.

¹³Eka ukaw owadu, udhigo ir ng’atno.

¹⁴Nyasaye Manyalo Gik Moko Duto mondo omi chuny ng’atno obed maler kodu, mi odwoknu owadu mane uweyo kuno, kaachiel gi Benjamin bende. To ka ochunore ni nyithinda nyaka tho, to kara ginitho!”

¹⁵Kamano ne gikawo pesa moromo rundo diriyo, kaachiel gi chiwo, mi ne gidok Misri ir Josef, ka gidhi gi Benjamin.

¹⁶Kane Josef oneno Benjamin ka ni kodgi, nowacho ni jaduong’ ode niya, “Rwak jogo e ot, kendo ineg chiayo mondo itedi, nikech gibiro chiemo koda sa auchiel.”

¹⁷Notimo kaka Josef nochike, mi norwako jogo e ot.

¹⁸Kane itero gi e ot, luoro nomakogi, ni mar ne giparo niya, “Okelwa ka mana nikech pesa mane odwok e gundewa chieng mokwongo cha. Omiyo nyaka bed ni gibiro monjowa kendo lokowa wasumbini, mi gikaw kenjewa.”

¹⁹Kuom mano ne gidhi ir jaduong’ od Josef e dhoot, mi giwachone niya,

²⁰“Ruoth, kiyie to winjwae. Yande wabiro ka mondo warund cham,

²¹to kane wadok, mwachopo kuma ne onego wabworie, ne wagonyo gundewa, mi ng’ato ka ng’ato noyudo pesane duto kodwokne e wi ogunde. To koro waduoko pesago,

²²kendo wakelo pesa moko mondo wamed rundogo cham. To ok wang’eyo ng’at mane osoyo pesago ee ogundewa.”

²³Ng’atno nodwokogi niya, “Mano kik thagu, kendo kik ubed maluor. Nyasachu ma Nyasach wuora ema noketonu pesago, nimar an to nayudo pesa mane uchulo.” Bang’ mano nokelo Simeon irgi.

²⁴Kane jaduong’ od Josef oserwakogi e ot, nomiyogi pi mondo gilwokgo tiendegi, kendo momiyo kenjegi chiemo.

²⁵Ne gigolo chiwo mane gikelo, mi giritogo biro Josef sa auchiel, nimar ne giwinjo ni gibiro chiemo kode.

²⁶Kane Josef oduogo e ode, ne gimiye chiwo mane gisekelonego, kendo ne gikulore piny e nyime.

²⁷Nopenjogi ngimagi, eka nopenjogi kendo niya, “To jaduong’ ma wuonu mane uwachona wachne ni nade? Donge pod ongima?”

²⁸Ne gidwoke niya, “Ee, ruoth, wuonwa pod ngima.” Eka ne gigoyo chonggi piny, mi gikulore e nyime nyaka e lowo.

²⁹Kane Josef oneno Benjamin ma owadgi mahie, nopenjogi niya, “Ma e owadu machogo mane uwachona?” Mi nowacho ni Benjamin niya, “Nyasaye mondo oguedhi, wuoda.”

³⁰Eka Josef noa kanyo piyopiyo nikech siwuori mar hera nomake gi owadgino. Pi wang’e ne chiegni ton, omiyo nodhi e ode ma iye, moywak kuno.

³¹Bang’e nolwoko wang’e, mowuok oko. Nosiro mirima manoyudo omake, mi nogolo chik mondo otok chiemo.

³²Josef nochiemo yore, kendo owetene bende nochiemo e mesa machielo. Jo-Misri mane chiemo kode bende nochiemo yore, nikech en wichkuot maduong’ kuom jo-Misri riwo tawo gi jo-Hibrania.

³³Owete Josef noket e mesa mane ni e nyim Josef, ka giluwore kaka nywolgi obet, chakre wuowi maduong’ nyaka wuowi matin. Kane gineno kochan-gi kamano, ne ging’iyore ka chunygi parore.

³⁴Josef nopogonigi chiemo moa e mesane, to Benjamin nopogne nyadibich moloyo owetene mamoko. Kamano ne gichiemo, kendo gimetho kode nyaka ne gibet mamor giduto.