Read luo Chakruok 46 Bible Online

Chakruok 46 - luo bible

Chakruok 46

¹Israel nokawo gige duto, mochako wuoth, ka ne ochopo Beer-sheba, notimo misango ni Nyasach Isaka wuon mare kuno.

²Nyasaye nofwenyorene gotieno, kaluonge niya, “Jakobo, Jakobo.” Nodwoke ni, “An ka.”

³Eka Nyasaye nowachone niya, “An Nyasaye ma Nyasach wuoru. Kik iluor dhi Misri, nikech anatimi oganda maduong’ kuno.

⁴Abiro dhi kodi Misri, kendo an ema nadwok nyikwayi ka. Bende Josef noyuo wang’i sa thoni.”

⁵Kuom mano Jakobo noa Beer-sheba. Yawuot Israel noketo Jakobo wuon-gi kaachiel gi nyithindgi kod mondgi e geche mane Farao oseoro mondo oting’gi.

⁶ Ne gikawo jambgi kod mwandugi duto mane gin go Kanaan, mi gidhigo Misri. Jakobo nokawo joode duto, ma onge achiel modong’.

⁷Nodhi gi yawuote gi nyige kod nyikwaye ma yawuowi gi manyiri.

⁸Magi e nying jo-Israel ma nodhi Misri: Jakobo gi yawuote: Reuben wuod Jakobo maduong’,

⁹kaachiel gi yawuote ma Hanok gi Palu gi Hezron kod Karmi.

¹⁰To yawuot Simeon ne gin Jemuel gi Jamin gi Ohad, ji Jakin gi Zohar kod Shaul, mane wuod dhako ma nyar Kanaan.

¹¹Yawuot Lawi ne gin Gershon gi Kohath kod Merari.

¹²To yawuot Juda ne gin Er gi Onan, gi Shela gi Perez kod Zera. (To Er gi Onan ne jotho Kanaan.) Yawuot Perez ne gin Hezron gi Hamul.

¹³Yawuot Isakar to ne gin Tola gi Puva gi Iob kod Shimron.

¹⁴To yawuot Zebulun ne gin Zered gi Elon kod Jaleel.

¹⁵Mago e yawuowi mane Jakobo onywolo gi Lea Mesopotamia, ka ok okwan Dina nyare. Kamano giduto ne gin ji piero adek gadek.

¹⁶Yawuot Gad ne gin Zifion gi Hagi gi Shuni, gi Ezbon gi Eri gi Arodi kod Areli.

¹⁷Yawuot Asher ne gin Imna gi Ishva gi Ishvi kod Beria, gi nyako ma nyinge Sera. Yawuot Beria to ne gin Heber kod Malkiel.

¹⁸Ji apar gauchielgo e joka Jakobo ma od Zilpa mane Laban omiyo Lea nyare.

¹⁹Rahel nonywolo Josef kod Benjamin.

²⁰ To Asenath nyar Potifera jadolo mar On nonywolo ni Josef Manase gi Efraim e piny Misri.

²¹Yawuot Benjamin to ne gi Bela gi Beker gi Ashbel. Yawuot Bela ne gin Gera gi Namaan gi Ehi gi Rosh gi Mupim gi Hupim kod Ard.

²²Ji apar gang’wen-go e joka Jakobo ma od Rahel.

²³Wuod Dan ne Hushim.

²⁴To yawuot Naftali ne gin Jazeel gi Guni gi Jezeel kod Shilem.

²⁵Ji abiriyogo e joka jakobo ma od Bilha, mane Laban omiyo Rahel nyare.

²⁶Kamano joka Jakobo ma nodhi Misri ne gin ji piero auchiel, ka ok okwan mond yawuote.

²⁷ To Josef nonywolo yawuowi ariyo Misri, omiyo joka Jakobo duto ma nodhi Misri noromo piero abiriyo.

²⁸Isreal nooro Juda motelo ir Josef mondo onyise oromne Goshen. Kamano, ka ne gichopo e piny Goshen,

²⁹Josef nokawo gache modhi kuno, romo ni Israel wuon mare. Kane oneno wuon mare, nokwake moywak aming’a.

³⁰Israel nowacho ni Josef niya, “Koro kata katho to onge wach, nikech koro aseneni, kendo ang’eyo ni pod ingima.”

³¹Bang’e Josef nowacho ni owetene gi jood wuon mare niya, “Adhi nyiso Farao ni owetena kod joodwa ma yande odak Kanaan koro osebiro ira,

³²to gin jokwath, kendo gisekelo jambgi kod mwandugi duto.

³³Emomiyo ka Farao oluongou, mopenjou ni tiju en ang’o,

³⁴to nyaka uwachne ni, chakre tindou, usebedo jokwath mana kaka kwereu. Kuwacho kamano, to unuyud thuolo mar dak e piny Goshen ka, nikech jo-Misri ok ohero jokwath.”