Read luo Chakruok 47 Bible Online

Chakruok 47 - luo bible

Chakruok 47

¹Josef nodhi ir Farao, mowachone niya, “Wuora kod owetena josea Kanaan gi jambgi kod mwandugi duto, kendo koro gin e piny Goshen.”

²To noyudo Josef osekelo ji abich kuom owetene ir Farao mondo ong’egi,

³mi Farao nopenjogi niya, “Tiju en ang’o?” Ne gidwoke ni, “Ruoth, wan jokwath, mana kaka kwerewa.

⁴To wasebiro mondo wadag e pinyni, nimar kech ger e piny Kanaan, ma kata lek ma jambwa dikwaye onge. Koro, ruoth, yie mondo wadag e piny Goshen.”

⁵Farao nowacho ni Josef niya, “Kaka koro wuoru gi oweteni josebiro iri,

⁶piny Misri duto ni e lweti. Ketgi gidag kama berie moloyo. Ginyalo dak e piny Goshen, kendo king’eyo ni jomoko kuomgi gin jokwath molony, to ketgi mondo girit jamba.”

⁷Bang’ mano, Josef nokelo Jakobo wuon mare e nyim Farao, mi Jakobo nogwedho Farao.

⁸Eka Farao nopenje niya, “In jahigni adi?”

⁹Jakobo nodwoke ni, “Higni ma asewuotho e piny, gin mana mia achiel gi piero adek. Hignigo osebedo manok kendo maricho, kendo ok girom gi higni ma kwerewa nowuothogo e piny.”

¹⁰Eka Jakobo nogoyo ni Farao oriti modhi.

¹¹Bang’e Josef nomiyo wuon mare gi owetene puothe kuonde mabeyo e Misri e gweng’ Rameses, kaka Farao nochiko.

¹²Bang’e nomiyo wuon mare gi owetene kod jood wuon duto, chiemo duto mane gidwaro.

¹³Kech ne ger, ma piny ngima ne onge gi chiemo, mi jo-Misri gi jo-Kanaan nodoko meyomno.

¹⁴Josef nochoko pesa duto mane jo-Misri gi jo-Kanaan ong’iewogo cham, kendo noterogi e od keno mar Farao.

¹⁵Kane jo-Misri gi jo-Kanaan osetieko pesagi duto, jo-Misri nobiro ir Josef, mi giwachone niya, “Miwa chiemo, dipo ka watho e nyimi, nikech pesawa oserumo.”

¹⁶Josef nodwokogi niya, “Ka pesau oserumo, to kara miyauru jambu, eka amiu cham.”

¹⁷Omiyo ne gitero jambgi ni Josef, mi nomiyogi cham kar farese gi jamni kod kenje. Kamano e higano nomiyogi cham, to nokawo jambgi duto.

¹⁸Higa moluwe, ne gidok ire, mi giwachone niya, “Ruoth, ok wadwar wuondi, to pesawa duto orumo, kendo jambwa bende koro osedoko meki. Omiyo koro waonge gi gima wanyalo miyi, to mak mana dendwa gi lopwa.

¹⁹Ang’o momiyo watho e nyimi, to ineno, kendo lopwa bende kethore? Ng’iewwa kaachiel gi puothewa kuom chiemo mondo wabed wasumb Farao, kendo puothewa odok mage, miwa kodhi mondo kik kech negwa, mondo pwothewa kik kethre.”

²⁰Kuom mano Josef nong’iewo ni Farao puothe duto mag Misri, nikech jo-Misri duto nong’iewo puothegi nimar kejno ne ger. Kamano puothe duto nodoko mag Farao.

²¹Josef noloko jo-Misri wasumbini, chakre bath Misri konchiel nyaka komachielo.

²²Puothe jodolo kende ema ne ok ong’iewo, nimar jodolo ne nigi pokgi ma gikonyorego maa kuom Farao. Omiyo onge gima nochuno jodolo mondo ong’iew puothegi.

²³Josef nowacho ni jo-Misri niya, “Winjuru! Kawuononi aseng’iewou ni Farao, kaachiel gi puotheu bende. Kodhi eriuru, mondo ukom e puotheu.

²⁴To e kinde mag keyo, nyaka umi Farao achiel kuom abich mag cham. To mago modong’ ema nobednu kodhi, kod cham munyalo chamo gi joodu kod nyithindu.”

²⁵Ne gidwoke niya, “Ruoth, isekonyowa, omiyo kineno ni mano ber, to wabiro bedo wasumb Farao.”

²⁶Kuom mano, Josef noketo chik ni achiel kuom abich mag chamb Misri nyaka bed mag Farao. Chikni pod dhi nyime nyaka chil kawuono. Puothe jadolo kende ema ne ok Farao okawo.

²⁷Jo-Israel nodak Misri e piny Goshen. Ne giyudo lowo, mi gimew, kendo ne ginya ahinya.

²⁸Jakobo nodak Misri kuom higni apar gabiriyo, nyaka nodoko jahigni mia achiel gi piero ang’wen gabiriyo.

²⁹ Kane kinde mar thone ochopo machiegni, noluongo Josef wuode, nowachone niya, “Yie iket lweti e kind ema, kikong’orina ni inibedna jaadiera, kendo ni initimna maber, mi ok niyika Misri.

³⁰Kasetho, maluwo kwerena, to mondo igola Misri, kendo idhi iyika kama oyikie kwerena.” Josef nodwoke niya, “Abiro timo kaka iwacho.”

³¹To Israel nowachone niya, “Kuong’rina ni initim kamano.” Mi Josef nokuong’orene. Eka Israel nokulore gi yo ka wi kitandane.