Read luo Chakruok 5 Bible Online

Chakruok 5 - luo bible

Chakruok 5

¹ Ma e kaka ochan tienge mag nyikwa Adam: Kane Nyasaye ochueyo dhano machal kode owuon.

² Nochueyogi dichwo gi dhako, kendo chieng’no ema noguedhogie, mochakogi ni, ‘Dhano’.

³Adam ne jahigni mia achiel gi piero adek kane onywolo wuowi machal kode, mochako ni Seth.

⁴Bang’ mano, Adam nochako odak kuom higni mia aboro, kendo nomedo nywolo nyithindo moko.

⁵Notho ka en jahigni mia ochiko gi piero adek.

⁶Seth ne jahigni mia achiel gabich kane onywolo Enos wuode.

⁷Bang’e nochako odak kuom higni mia aboro gi apar gabich, kendo nomedo nywolo nyithindo moko.

⁸Notho ka en jahigni mia ochiko gi apar gariyo.

⁹Enos ne jahigni piero ochiko kane onywolo Kenan wuode.

¹⁰Bang’e nochako odak kuom higni mia aboro gi apar gabich, kendo nomedo nywolo nyithindo moko.

¹¹Notho ka en jahigni mia ochiko gabich.

¹²Kenan ne jahigni piero abiriyo kane onywolo Mahalalel wuode.

¹³Bang’e nochako odak kuom higni mia aboro, kendo nomedo nywolo nyithindo moko.

¹⁴Notho ka ne en jahigni mia ochiko gi apar.

¹⁵Mahalalel ne jahigni piero auchiel gabich kane onywolo Jared wuode.

¹⁶Bang’e nochako odak kuom higni mia aboro, kendo nomedo nywolo nyithindo moko.

¹⁷Notho ka en jahigni mia aboro gi piero ochiko gabich.

¹⁸Jared ne jahigni mia achiel gi piero auchiel gariyo kane onywolo Enoka wuode.

¹⁹Bang’e nochako odak kuom higni mia aboro, kendo nomedo nywolo nyithindo moko,

²⁰nyaka nodoko jahigni mia ochiko gi piero auchiel gariyo.

²¹Enoka ne jahigni piero auchiel gabich kane onywolo Methusela wuode.

²²Bang’e nowuotho gi Nyasaye kuom higni mia adek, kendo nomedo nywolo nyithindo moko,

²³nyaka nodoko jahigni mia adek gi piero auchiel gabich.

²⁴ Bang’ wuotho gi Nyasaye kamano, ne ok ochak onene kendo, nikech Nyasaye nokawe.

²⁵Methusela ne jahigni mia achiel gi piero aboro gabiriyo kane onywolo Lameck wuode.

²⁶Bang’e nochako odak kuom higni mia abiriyo gi piero aboro gariyo, kendo nomedo nywolo nyithindo moko.

²⁷Notho ka ne en jahigni mia ochiko gi piero auchiel gochiko.

²⁸Lameck ne jahigni mia achiel gi piero aboro gariyo kane onywolo wuowi.

²⁹Nowacho niya, “Wuowini nodwog chunywa kuom tich matek moseket kuomwa nikech kuong’ ma Ruoth Nyasaye osekuong’ogo lowo.” Kuom mano nochake ni Nowa.

³⁰Bang’e nochako odak kuom higni mia abich gi piero ochiko gabich.

³¹Notho ka en jahigni mia abiriyo gi piero abiriyo gabiriyo.

³²Kane Nowa osedoko jahigni mia abich, nonywolo yawuote adek, ma nyinggi Shem gi Ham kod Jafeth.