Read luo Chakruok 50 Bible Online

Chakruok 50 - luo bible

Chakruok 50

¹Josef norudhore kuom wuon, koywak kendo konyodhe.

²Eka nochiko jotichne ma jothieth mondo owir ringre wuon mare gi yath, kik tow. Mi ne gitimo kamano,

³kuom ndalo piero ang’wen kaka kit wiro ringre ng’ama otho nobet. Jo-Misri noywago Israel kuom ndalo piero abiriyo.

⁴Kane kinde mar ywago wuon mare oserumo, Josef nowacho ni jodong Farao niya, “Kunyalo yie koda, to nyisnauru Farao kama:

⁵ ‘Kane wuora chiegni tho, nomiyo asingorane ni abiro yike e bur mane osekunyo e piny Kanaan. Kuom mano yie adhi ayike, eka abiro duogo.’ ”

⁶Farao nodwokone wach niya, “Dhiyo, iyik wuoru kaka nomiyo isingorine.”

⁷Kamano Josef nodhi yiko wuon mare. Jodong Farao duto gi jodong ode, kod jodong Misri duto nodhi kode,

⁸kaachiel gi joode gi owetene kod jood wuon mare. Mak mana nyithindgi matindo kende gi jambgi ema ne giweyo e piny Goshen.

⁹Bende nodhi gi geche kod joidh farese. Ne en oganda maduong’ ahinya.

¹⁰Kane gichopo kar dino cham man Atad yo wuok chieng’ mar Jordan, ne giywago wuon-gi malich ahinya kuom ndalo abiriyo.

¹¹Kane jo-Kanaan modak kuno oneno kaka jogo ywak malich Atad, ne giwacho niya, “Jo-Misri ywak malich manade!” Mano emomiyo nochak kanyo ni Abel-mizraim, (tiende ni ywak jo-Misri.) Kanyono ni yo wuok chieng’ mar Jordan.

¹²Kamano yawuot Jakobo notimo gima wuon-gi nochikogi.

¹³ Ne giting’o ringre nyaka Kanaan mi giyike e rogo manie puodho man Makpela, yo wuok chieng’ mar Mamre, mane Ibrahim ong’iewo kuom Efron ja-Hiti mondo obedne kar yiko joge.

¹⁴Kane Josef oseyiko wuon, nodok Misri gi owetene kod ji duto ma nodhi kode e liel.

¹⁵Kane owete Josef oneno ni wuon-gi osetho, ne giwacho niya, “Dipo ka Josef pod nigi sadha kodwa, manyalo miyo ochulnwa kuor kuom gima rach mane watimone.”

¹⁶Omiyo ne gioro ni Josef wach niya, “Kane pok wuoru otho, nowachonwa ni mondo wanyisi kama:

¹⁷‘Asayi, we ni oweteni richogi, kaachiel gi gima mono mane gitimoni’ Kuom mano yie iwenwa kuom tim marach mane watimo, nikech wan jotich Nyasaye wuoru.” To kane Josef owinjo wechego, pi wang’e noton.

¹⁸Bang’e owetene nobiro ire giwegi, mi gigoyo chonggi piny e nyime, ka gikulore nyaka e lowo. Ne giwachone niya, “Eriwa e, wan wasumbi.”

¹⁹Josef to nowachonigi niya, “Kik uluor, an ok anyal kawo kar Nyasaye.

²⁰Ne undhoga mondo utimna gima rach, to Nyasaye noloke gima ber, mondo ores ji mang’eny, ma koro ngima mana nikech wachno.

²¹Omiyo kik uluor. Abiro ritou uduto kod jouteu.” Kamano e kaka nokueyo chunygi gi weche mamit.

²²Josef nomedo dak Misri gi joodgi. Nodak kuom higni mia achiel gapar,

²³moneno nyithi Efraim gi nyikwaye. Noneno bende nyithind Makir wuod Manase, mi nokwanogi ka nyithinde.

²⁴Achien Josef nowacho ni owetene niya, “An koro achiegni tho, to Nyasaye biro ritou, kendo golou e pinyni, moteru e piny mane osingore ni nomi Ibrahim gi Isaka kod Jakobo.”

²⁵ Bang’ mano nomiyo yawuot Israel okuong’ore kowachonigi niya, “Kuong’reuru ni ndalo ma Nyasaye nokonyue, mi ua ka, to nyaka ukaw chokena udhigo.”

²⁶Josef notho ka en ja-higni mia achiel gapar. Ne giwiro ringre gi yath mondo kik otow, mi gikete e sanduk e piny Misri kuno.