Read luo Chakruok 6 Bible Online

Chakruok 6 - luo bible

Chakruok 6

¹ Kane ji ochako medore e piny, kendo nywolo nyiri,

²yawuot Nyasaye noneno ni nyi dhano beyo, omiyo ng’ato ka ng’ato nokendo nyako mohero kuomgi.

³Eka Ruoth Nyasaye nowacho niya, “Mucha ma chiwo ngima ok nodag e chuny dhano nyaka chieng’, nikech dhano en mana ringruok matow. Chakre tinendeni, onge ng’ama nodag moloyo higni mia achiel gi piero ariyo.”

⁴ E ndalogo kod ndalo moluwo mano, na nitie joma rabede miwuoro e piny, mane nyi dhano kod yawuot Nyasaye onywolo. Jogo ne thuondi kendo ne joma nigi huma e ndalo machon-go.

⁵ Kane Ruoth Nyasaye oneno ni dhano osetimo richo mang’eny e piny, kendo chunye gombo mana timo richo pile,

⁶noparo ni kara ne ok owinjore ochue dhano, kendo kete e piny. Omiyo chunye nodoko malit ahinya,

⁷mowacho niya, “Abiro nego ji duto ma asechueyo kamoro amora ma gintie, kaachiel gi le kod winy bende, nikech daber ka dine ok achueyogi.”

⁸To Nowa e mane Ruoth Nyasaye morgo.

⁹ Ma e sigand Nowa: Nowa ne en ng’at makare. En kende ema ne oonge gi ketho e ndalogo, kendo nowuotho gi Nyasaye.

¹⁰Ne en kod yawuowi adek ma nyinggi Shem gi Ham kod Jafeth.

¹¹Nyasaye noneno ni piny duto osekethore, kendo opong’ gi timbe mahundu.

¹²Noneno ni piny duto osenjawni, nikech ji duto nodak e richo.

¹³Eka nowacho ni Nowa niya, “Asechano ni mondo atiek dhano. Abiro negogi duto, nikech piny opong’ gi timbegi maricho.

¹⁴Omiyo los yie gi yien mabeyo, kipogo iye udi, kendo imwone gi odok oko gi iye.

¹⁵Borne mondo obed mita mia ariyo, to lachne mita piero adek, tutne to mita piero ariyo.

¹⁶Ketne tado, kiweyo thuolo moromo nus mita e kind tado kod kore. Bende ketne dhoot, kendo ipog iye gorofa adek.

¹⁷“Abiro kelo pi e piny mondo oneg gik mangima duto. Gimoro amora manie piny biro tho,

¹⁸to mak mana in ema natim kodi singruok. Inidonj e yieno gi chiegi kod yawuoti gi mondgi,

¹⁹kendo inikaw le ma dichwo gi madhako kuom kit le duto, mondo ires ngimagi.

²⁰Kuom kido duto mag winy gi mag le kod gik mamol, ariyo ariyo nodonj kodi e yie, mondo ores ngimagi.

²¹Kaw kit chiemo duto, ikan mondo obed chiembu kod chiemb gik man obed kodigo.”

²² Nowa notimo gik moko duto mane Nyasaye ochike.