Read luo Chakruok 8 Bible Online

Chakruok 8 - luo bible

Chakruok 8

¹Nyasaye noparo Nowa kaachiel gi le kod jamni mane en go e yie omiyo notugo yamo okudho e piny, mi pi nochako duono.

²Sokni moa e nam mang’ongo manie bwo piny nodinore, kendo dirise mag polo nolor, mi koth nochok.

³Pi noduono mos mos, kendo bang’ ndalo mia achiel gi piero abich nodok chien.

⁴Chieng’ due apar gabiriyo, due mar abiriyo, yie nomoko e wi got moro e piny Ararat.

⁵Pi to nomedo mana duono nyaka due mar apar. To chieng’ mokwongo mar due mar aparno, wi gode nochako limbo.

⁶Bang’ ndalo piero angwen, Nowa noyawo dirisa mar yie mane oloso,

⁷kendo nooro agak mondo ong’ego ka pi osedok chien, to agak nohuyo e kor polo nyaka piny notwo.

⁸Bang’ ndalo abiriyo, nooro akuru mondo ong’ego ka koro pi osedok chien.

⁹To ne onge kama akuru nyalo piyoe, nikech pi ne pod oimo piny duto, omiyo noduogo ir Nowa e yie. Kuom mano Nowa norieyo bade oko mogame, kendo odwoke ei yie.

¹⁰Norito kuom ndalo abiriyo eka nochako ooro akuruno.

¹¹Kane akuru oduogo godhiambo, noting’o pot zeituni e dhoge. Mano nonyiso Nowa ni kare pi osemedo dok chien.

¹²Norito kendo kuom ndalo abiriyo moko, eka nochako ooro akuruno, to koro akuru ne ok ochako oduogo e yie kendo.

¹³Chieng’ due achiel, due mokwongo e higa mane Nowa odokoe jahigni mia auchiel gachiel, pi norumo, kendo kane Nowa oelo wi yie, nong’iyo oko, noyudo ka piny otwo.

¹⁴To chieng’ due piero ariyo gabiriyo, due mar ariyo, ema piny duto notwoe chuth.

¹⁵Eka Nyasaye nowacho ni Nowa niya,

¹⁶“Wuog e yie gi chiegi kod yawuoti kod mondgi.

¹⁷Le gi winy kod gik mamol duto bende igol oko, mondo ginywolre, gipong’ piny.”

¹⁸Omiyo Nowa nowuok e yie gi chiege kod yawuote gi mond yawuote.

¹⁹Le duto gi jamni duto kod winy duto, gi gimoro amora mamol e lowo, bende nowuok e yie ka kit gimoro ka gimoro luwore kendgi.

²⁰Eka Nowa nogero ni Ruoth Nyasaye kendo-mar-misango, mi nokawo kit le ka le michamo kod kit winyo ka winyo michamo, motimogo ni Ruoth Nyasaye misango miwang’o pep.

²¹Kane Ruoth Nyasaye owinjo suya mamit, nowacho e chunye niya, “Timbe dhano ok nomi akuong’ piny kendo, nikech aneno ni paro mag dhano richo, chakre nywolne. Bende ok nachak atiek gik mangima kaka asetimoni.”

²²“Chuoyo gi keyo, koyo gi liet, oro gi chwiri, kod odiechieng’ gi otieno, ok nobed maonge nyaka chop giko piny.”