Read luo Chakruok 9 Bible Online

Chakruok 9 - luo bible

Chakruok 9

¹ Nyasaye noguedho Nowa gi yawuote, mowacho nigi niya, “Medreuru mondo upong’ piny.

²Le duto mae piny, kod winy duto mae polo, gi gik moko duto mamol e lowo, kaachiel gi rech mae nam, noluoru, kendo aketogi e luetu.

³Gimoro amora man gi ngima, kendo mawuotho, nobed chiembu. Kaka ne amiyou alote, e kaka koro amiyou gigo duto.

⁴ To mak mana ni kik ucham gimoro mapok rembe ochuer piny, nikech remo e ngima.

⁵Ka remb dhano ochuer, to nachul kuor, bed le, kata dhano wadgi, ema onege.”

⁶ “Ng’at monego dhano, en bende nyaka nege, nikech Nyasaye nochueyo dhano e kite owuon.

⁷ To un, medreuru mondo upong’ piny duto kendo uriti.”

⁸Nyasaye nomedo wacho ni Nowa gi yawuote niya,

⁹“Koro atimo kodu singruok, kaachiel gi nyikwau,

¹⁰kod gik mangima duto man kodu bende, kaka winy gi jamni gi le kod gimoro amora mosewuok e yie.

¹¹Singruok matimo kodu e ma: Onge chieng’ moro kendo, ma pi nokethie piny gi gik mangima mantie.”

¹²Eka Nyasaye nowacho kendo niya, “Koro aketo lihudu mara e boche polo, mondo obed ranyisi mar singruok ma asetimo kodu kaachiel gi gik moko duto mangima.

¹³Enobed ranyisi mar singruok masetimo ni piny duto.

¹⁴Kinde moro amora ma amiyoe piny odudo, mi lihudu ochung’ e boche polo,

¹⁵to anapar singruok masetimo kodu kaachiel gi le duto ni pi ok nochak oketh gik mangima duto.

¹⁶Ka lihudu ochung’ e boche polo, to anane, kendo anapar singruokna mosiko e kinda kod gik mangima duto manie piny.”

¹⁷Nowacho ni Nowa niya, “Mano e ranyisi mar singruok matimo ni gik mangima duto manie piny.”

¹⁸Yawuot Nowa manowuok e yiego ne gin Shem gi Ham kod Jafeth. Ham ne wuon Kanaan,

¹⁹Yawuot Nowa adekgi ema nobedo kwere ji duto manie piny ngima.

²⁰Nowa ne en japur, kendo en ema nokwongo pidho mzabibu, mi olosogo divai.

²¹Nomadho divai momer, monindo duk e hembe.

²²To Ham wuon Kanaan noneno dug wuon, mi nodhi onyiso owetene ariyo mane ni oko.

²³Kane Shem gi Jafeth owinjo wachno, ne gikawo nanga, mi giketo e gokgi, kendo ne giwuotho gi kang’egi, mi giumo dug wuon-gi. Ne giloko wigi mondo kik gine duge.

²⁴Kane Nowa ochiew bang’ mer, kendo ne ofwenyo gima ne wuode matin otimone,

²⁵nowacho niya, “Okwong’ Kanaan, kendo obed misumba owetene.”

²⁶Eka nomedo wacho niya “Ruoth Nyasaye oguedh hemb Shem, to Kanaan obed misumba Shem

²⁷Nyasaye mondo omed Jafeth, kendo nyikwaye mondo odag gi joka Shem. To Kanaan obed misumba Jafeth.”

²⁸Kane pi oseketho piny, Nowa nochako odak kendo kuom higni mia adek,

²⁹eka notho kane en jahigni mia ochiko gi piero abich.