Read luo 2 Samuel 11 Bible Online

2 Samuel 11 - luo bible

2 Samuel 11

¹ E ndalo chakruok oro, mane ruodhi thoro wuokie kadhi kedo, Daudi nooro Joab kod askechene owuon, kaachiel gi jolwenj Israel duto, mogoyo jo-Amon asasa kendo ne giluoro dala Raba. To Daudi nodong’ Jerusalem.

²Chieng’ moro kar sa ma dhok donjoe, Daudi noa e kitandane, ma noyudo oyueyoe, mowuotho ewi tat ode, mi nopo koneno dhako moro ka lwokore. Ne en dhako ma jaber ahinya.

³Daudi nopenjo wach dhakono, mi nodwoke ni en Bathsheba nyar Elam, ma chi Uria ja-Hiti.

⁴Eka Daudi nooro joote mondo oome, to ka nobiro noterore kode. Bang’e nodok e ode.

⁵Dhakono nomako ich, mi nooro ni Daudi wach, konyise ni en gi ich.

⁶Daudi nooro ni Joab wach niya, “Orna Uria ja-Hiti.” Mi Joab nooro Uria ir Daudi.

⁷To kane Uria obiro, Daudi nopenje ka Joab gi jolweny jongima, kendo ni lweny dhi nadi.

⁸Bang’e Daudi nowachone niya, “Dhiyo e odi mondo iyue.” Kane Uria owuok e od ruoth, ruoth noorone chiemo moa e mesane owuon.

⁹To Uria ne ok odhi e ode, to nonindo mana but ranga dala ruoth, kaachiel gi jorit ruoth.

¹⁰Kane onyis ruoth ni Uria nyoro ok odhi e ode, nopenjo Uria niya, “Donge nyoro ia wuoth? Ang’o momiyo ok idhi e odi?”

¹¹To Uria nodwoke niya, “Sandug Muma kod jo-Israel gi jo-Juda odak mana e hembe, kendo Joab ma jatendwa gi jodongi mag lweny bende jojot oko e pap. Koro ere kaka an dadonj e oda machiem kendo amethi, kendo anind gi chiega? Akuong’ora gi nyingi, ni ok natim kamano!”

¹²Daudi nowacho ni Uria niya, “Ri kawuono bende, to kiny nawe mondo idhi.” Kamano Uria noriyo Jerusalem chieng’no. Kinyne,

¹³Daudi noluonge mondo gichiem, mi nohoye mometho nyaka omer. To kane piny ochido, Uria nowuok, modhi onindo mana kama jorit ruoth ne nitie, to ne ok odhi e ode.

¹⁴Kinyne gokinyi, Daudi nondiko ni Joab barua, moorogo Uria.

¹⁵Baruano nondikoe niya, “Ket Uria yo ka nyime, koma lweny gerie moloyo, to un udong’ chien uweye mondo onege.”

¹⁶Omiyo Joab, ma noyudo lworo dala moro, noketo Uria kama nong’eyo ni wasigu mager nitie.

¹⁷Jodalano nowuok mondo oked gi Joab, mi ne ginego jolweny moko, ma kuomgi ne nitie askeche moko ma jorit Daudi. Uria bende notho.

¹⁸Joab nooro ni Daudi jaote mondo onyise weche duto ma kuom lweny.

¹⁹Nochiko jaoteno niya, “Ang’eyo ni kisetieko nyiso ruoth weche duto ma kuom lweny,

²⁰kamoro mirima dipo komake, mowacho niya, ‘Marang’o nusudo machiegni gi dalano kukedo? Donge nung’eyo ni joma ni ewi ohinga dichielu gi asere?

²¹ Paruru ane ng’ama nonego Abimelek wuod Jerubaal. Ok mana dhako ema nodiro pong’ rego kuome, gi ewi ohinga mar Thebez, monege? Ka ung’eyo kamano to ere gimomiyo nusudo machiegni gi ohinga?’ Kapo ni openji kamano, to iwachne ni Uria ja-Hiti bende otho.”

²²Jaoteno nodhi monyiso Daudi weche duto mane Joab ochike. Mi mirima nomako Daudi gi Joab, mowacho niya, “Marang’o nusudo machiegni gi dalano kukedo? Donge nung’eyo ni joma ni ewi ohinga dichielu gi asere? Paruru ane ng’ama nonego Abimelek wuod Jerubaal. Ok mana dhako ema nodiro pong’ rego kuome, gi ewi ohinga mar Thebez, monege? Ka ung’eyo kamano to ere gimomiyo nusudo machiegni gi ohinga?”

²³Jaote nodwoko Daudi niya, “Jogo nochako loyowa, ni ne giwuoknwa e pap, to ne wariembogi, kwadwokogi chien nyaka dhorangagi.

²⁴To jo-asere mane ni ewi ohinga nochielo jolwenji, kendo jomoko kuom thuondi magi notho. Uria bende osetho.”

²⁵Kane Daudi owinjo kamano, nodwoko jaote niya, “Wach ni Joab ni kik wachno chande, nikech mano e kaka lweny obet. Kawuono ng’ato tho, kendo kiny en mar ng’ama chielo. Dhiyo ijiwe kamano, mondo omed mana kedo matek gi dalano nyaka olo.”

²⁶Kane chi Uria owinjo ni Uria osetho, noywage.

²⁷To kane ndalo ywakne orumo, Daudi nooro joote moome, kendo nobedo chiege, monywolone wuowi. To gima ne Daudi otimono ne ok long’o ni Ruoth Nyasaye.