Read luo 2 Samuel 12 Bible Online

2 Samuel 12 - luo bible

2 Samuel 12

¹ Ruoth Nyasaye nooro Nathan ir Daudi, kendo ka nobiro ire, nokone niya, “Ji ariyo nodak e dala moro, achiel ne japith, to machielo ne jachan.

²Japith ne nigi jamni gi dhok mogundho,

³to jachan ne onge gi gimoro, mak mana nyarombo achiel kende, ma noseng’iewo. Nopidhe kendo nodongo e ode kaachiel gi nyithinde, kochamo mana chiembe. Nometho e kikombene, kendo nonindo e kore, mobedone kaka nyare.

⁴Chieng’ moro ng’ato nobworo e dala japithno, to japithno ne ok oyie kawo chiayo moro kuom jambe owuon mondo oyang’ ni wendono, to nokawo mana nyarombo ng’at ma jachan cha, ema noyang’o ni wendone.”

⁵Kane Daudi owinjo wachno, mirima nomake ahinya gi japithno. Nowacho ni Nathan niya, “Gi nying Ruoth Nyasaye, ng’at mosetimo kamano owinjore gi tho!

⁶Onego ochul nyading’wen kar nyarombono, nikech notimo kamano koonge gi chunye.”

⁷Eka Nathan nowacho ni Daudi niya, “In e ng’atno! Ruoth Nyasaye ma Nyasach Israel owacho kama: ‘Ne ayieri mondo ibed ruodh Israel, kendo naresi e lwet Saulo.

⁸Ne amiyi od ruodhi, kod monde bende obed magi, kendo namiyi dhood Israel gi dhood Juda. Kata da ni mano pod tin, to da amedi gik moko moloyo mago.

⁹Marang’o nichayo wach Ruoth Nyasaye, mitimo gima ok long’one? Isenego Uria ja-Hiti kuom golo chik otho e lwet jo-Amon, kendo isekawo chiege mi obedo chiegi.

¹⁰Emomiyo koro lweny ok norum e dhoodi, nikech isechaya, kendo isekawo chi Uria ja-Hiti obedo chiegi.’

¹¹ “Ruoth Nyasaye omedo wacho niya, ‘Abiro keloni thagruok mowuok mana e odi iwuon. Nakaw mondi, kendo namigi ng’at moro mana kineno, mi noterre kodgi e lela, godiechieng’.

¹²Gima nitimo, nitimo ling’ling’, an to anatim gini e nyim jo-Isarel duto, odiechieng’ alanga.’ ”

¹³Daudi nowacho ni Nathan niya, “Aseketho e nyim Ruoth Nyasaye.” Eka Nathan nomedo wachone niya, “Ruoth Nyasaye bende oseweyoni richoni; koro ok nitho.

¹⁴To kata kamano nyathi monywolni biro tho, nikech isechayo Ruoth Nyasaye.”

¹⁵Nathan nodok e dalane. Bang’e Ruoth Nyasaye nomiyo tuo ogoyo nyathi mane chi Uria onywolo ni Daudi, mi nohewore ahinya.

¹⁶Daudi nosayo Nyasaye mondo kik nyathi tho, koriyo kech, kendo konindo piny e lowo otieno duto.

¹⁷Jodong ode ne biro, kendo chung’ bute, ka dwaro chunge oa e lowo. To notamore kendo ne ok oyie mondo ochiem kodgi.

¹⁸Chieng’ mar abiriyo, nyathi notho, to jodong od Daudi noluoro nyise ni nyathi osetho. Ne giwacho niya, “Kane nyathi pod ngima, ne wawuoyo gi ruoth, to ne ok owinjwa. To koro obiro timore nadi ka wanyise ni nyathi osetho?”

¹⁹To kane Daudi oneno jotichne ka kuodho wach kendgi, nofwenyoo ni kara nyathi osetho. Omiyo nopenjogi niya, “Kara nyathi osetho?” Ne gidwoke ni, “Ee, osetho.”

²⁰To Daudi noa malo mi olwokore, kendo owirore gi mo, moloko lepe. Eka nodonjo e Od Ruoth Nyasaye, molemo. Bang’e nodok e ode, mokwayo mondo okelne chiemo.

²¹Jotichne nopenje niya, “En ang’o mitimoni? Kane nyathi pod ngima, nitueyo chiemo, kendo niywak. To ka koro nyathi osetho, to ia malo, michiemo!”

²²Nodwokogi niya, “Kane nyathi pod ngima, natueyo chiemo kaywak, nikech naparo niya, ‘Ng’ama ong’eyo kata ka Ruoth Nyasaye biro ng’wonona mondo nyathi obed mangima?’

²³To koro osetho, ere gima datuene chiemo? Anyalo duoge koso? An ema nadhi ire, to en ok noduog ira.”

²⁴Daudi nohoyo Bathsheba chiege, modhi ire, kendo noriwore kode, mi Bathsheba nonywolo wuowi, mochako ni Solomon. Ruoth Nyasaye nohero nyathino.

²⁵Kuom mano, nomiyo Nathan janabi owacho ni mondo ochake ni Jedidia, nikech mano e dwaro mar Ruoth Nyasaye. Tiend nying’no en ni, ‘Ng’ama ohero Ruoth Nyasaye’.

²⁶Joab nokedo gi Raba, dala jo-Amon, mokawo Yap Ruoth.

²⁷Eka nooro joote ir Daudi, kowacho niya, “Asekedo gi Raba, kendo asekawo Yap Ruoth.

²⁸Omiyo koro chok joma odong’ duto, ibi ilwor dalano, kendo ikaw, nikech ka ok itimo kamano to dipo ka an ema akawe, mi ji diluonge gi nyinga.”

²⁹Kuom mano Daudi nochoko oganda lweny duto, modhi Raba. Nokedo gi dalano, mokawo.

³⁰Nogolo osimbo ewi Milkom ma nyasach jo-Amon, moyudo ni pek mar dhahabu molosego oromo kilo piero ang’wen, kendo kidi ma nengone tek ochom kuome, mi nosidho osimbono e wiye owuon. Noyako bende gik mathoth e dalano,

³¹kendo nodaro joma nodakie, moketogi e tich ng’ado bao, kod kunyo kite, gi tong’o yien, kod wang’o matafari. Kamano e kaka Daudi notimo e miech jo-Amon duto. Bang’e nodok Jerusalem gi jogo duto.