Read luo 2 Samuel 13 Bible Online

2 Samuel 13 - luo bible

2 Samuel 13

¹Absalom wuod Daudi ne nigi nyamin mare moro ma jaber, ma nyinge Tamar, to Amnon wuod Daudi nohere.

²Chuny Amnon ne chande ahinya, nyaka nobedo matuo, mana nikech Tamar nyamin mare. To ne tekne timo kode gimoro, nikech ne en nyako ma pok ong’eyo chwo.

³To Amnon ne nigi osiepne moro ma rieke ng’eny ahinya, ma nyinge Jonadab, wuod Shimea owadgi Daudi.

⁴Nopenjo Amnon niya, “Wuod ruoth, idhero nadi ndalogi? Dak inyisa gimomiyo?” Amnon nodwoke niya, “Ahero Tamar ma nyamin Absalom owadwa.”

⁵Mi Jonadab nowachone niya, “Dhi inind e kitandani, kiwuondori ni ituo. To ka wuoru obiro mondo oneni, to ikwaye niya, ‘Yie mondo Tamar nyamera obi, omiya chiemo. To iyiene mondo olos chiemono e nyima ka, kaneno, kendo achiem koting’ona chiemo e lwete.’ ”

⁶Kamano Amnon nonindo kawuondore ni otuo. Kane ruoth obiro mondo onene, Amnon nokwaye niya, “Yie mondo Tamar nyamera obi, olosna kek moko e nyima ka, mondo acham koting’ona e lwete.”

⁷Mi Daudi nooro jaote ir Tamar dala, kowacho niya, “Dhiyo e od Amnon owadu, illosne chiemo.”

⁸Omiyo Tamar nodhi e od Amnon owadgi, moyude konindo. Nokawo mogo modwalo, kendo otedogo kek e nyime kanyo.

⁹Eka nokawo nyalaro, motokoe e nyime, to Amnon nodagi chiemo. Nogolo chik ni mondo ji duto owuog oko, mi ne giwuok.

¹⁰Eka nowacho ni Tamar niya, “Kel chiemo e od nindo koni, mondo acham kiting’ona e lweti.” Tamar nokawo kek ma noseloso, mokelo ni Amnon owadgi e od nindo.

¹¹To ka nosekelone mondo ocham, Amnon nomake, kawachone niya, “Yie anind kodi nyamera!”

¹²En to nokwere ni, “Ooyo owadwa, kik ikuod wiya. Jo-Israel ok tim gima kamano. Kik itim gima ofuwoni.

¹³Ere kuma dadhi apondie gi wichkuot ma kama? To in bende, dikwani kaka achiel kuom joma ofuwo e Israel. Asayi, dhi ilos gi ruoth, nikech ok nodagi ni kik ikenda.”

¹⁴To kata kamano Amnon nodagi winje. Nomake moterore kode gi thwon.

¹⁵To bang’ mano, Amnon nojok kode ahinya, kendo jok mane ojokgo ne duong’ moloyo hera ma noherego mokwongo. Nowachone niya, “A malo idhiyo!”

¹⁶En to nodwoke ni, “Ooyo owadwa, riemb miriembagoni rach moloyo gima isetimona.” To Amnon ne ok odewo wechene.

¹⁷Noluongo wuowi mane tiyone, mowachone niya, “Gol nyakoni oko, mondo ilor dhoot.”

¹⁸Mi wuowino nogole oko, moloro dhoot. Noyudo nyakono orwako law ma bade boyo ma nyi ruodhi ma pok okendi ne rwako e ndalogo.

¹⁹Tamar nobuko wiye gi buru, moyiecho lawe ma bade boyo ma norwako, kendo nodhi koywak, komako wiye.

²⁰Absalom owadgi nopenje niya, “Amnon owadu osetimoni gimoro koso? Bed gi kue nyamera, nikech en owadu. Wachno kik chand chunyi.” To Tamar nodak e od Absalom owadgi, kotamore hore.

²¹Kane ruoth Daudi owinjo wechego duto, iye nowang’ ahinya, to ne ok otimo ni Amnon gimoro, nikech ne en wuode makayo, kendo mohero.

²²Absalom bende ne ok owacho ni Amnon kata wach achiel, nimar nosin kode kuom kuodo wi Tamar nyamin mare.

²³Bang’ higni ariyo, Absalom noluongo yawuot ruoth duto Baal-hazor, man but Efron, kuma noyudo ong’adoe yie rombe.

²⁴Nodhi ir ruoth mowachone niya, “Ruoth, ing’eyo ni tinde ang’ado yie rombe. Akwayi ni mondo ibi kaachiel gi jogi.”

²⁵To ruoth nodwoke niya, “Ooyo wuoda, ok onego wabi waduto, dipo ka wamiyi ting’ mapek.” Absalom nosaye, to kata kamano ne ok oyie dhi, to nogoyone mana oriti.

²⁶Eka Absalom nowachone niya, “Ka ok iyie biro, to we mondo wadhi gi Amnon owadwa.” Ruoth nodwoke niya, “Ere gimomiyo dodhi kodu?”

²⁷To Absalom nomienore nyaka oyie ni mondo Amnon gi owetene duto odhi.

²⁸Absalom noloso chiemo mathoth, to noyudo osewacho ni jotichne niya, “Ka Amnon osemer, mi awachonu ni, ‘Negeuru,’ to unege. Kik uluor, nikech an awuon ema achikou. Beduru gi chir, kuikoru.”

²⁹Mi jotich Absalom notimo ni Amnon mana kaka Absalom nochikogi. To yawuot ruoth moko duto noidho kenjegi piyopiyo, moringo.

³⁰Kane pod gin e yo, wach nochopo ni Daudi niya, “Absalom osenego yawuoti duto, ma onge kata achiel modong’.”

³¹Ruoth noa malo, moyiecho lepe, kendo norudhore piny e lowo. Joge duto ma nochung’ bute bende noyiecho lepgi.

³²To Jonadab, wuod Shimea ma owadgi Daudi, nowacho niya, “Ruoth, kik ipar ni gisenego yawuoti duto, Amnon kende ema osetho. Absalom nochako ochano wachni chakre chieng’ mane Amnon okuodoe wi Tamar nyamin mare.

³³Omiyo kik igen wachni, kiparo ni mita yawuoti duto osetho. Amnon kende ema osetho,

³⁴to Absalom oseringo.” Wuowi ma jarit noting’o wang’e moneno ji mang’eny ka lor e kor got, koluwo yo moa Horonaim.

³⁵Jonadab nowacho ni ruoth niya, “Ne! Yawuoti biro. Ero, en mana kaka awachoni.”

³⁶Gikanyono kotieko wuoyo, yawuot ruoth nochopo, kendo ne giywak matek. Eka ruoth, kaachiel gi joge duto, bende noywak malit ahinya. Daudi noywago wuode kuom ndalo mang’eny.

³⁷ To Absalom noringo, modhi ir Talmai wuod Amihud, ma ruodh Geshur,

³⁸mobet kuno kuom higni adek.

³⁹Bang’e ruoth ne gombo neno Absalom, nikech chunye nosea kuom wach tho Amnon.