Read luo 2 Samuel 14 Bible Online

2 Samuel 14 - luo bible

2 Samuel 14

¹Joab wuod Zeruya noneno ni chuny ruoth dwaro Absalom.

²Omiyo nooro jaote Tekoa, moomone dhako moro mariek kuno. Joab nowacho ni dhakono niya, “Rwakri gi lep ywak, mondo iwuondri ka ng’ama ywago ng’ama otho. Kik iwirri gi mo, to chal dhako moseywago ng’ama otho kuom ndalo mang’eny.

³Mi idhi ir ruoth, kendo iwachne weche ma abiro nyisigi.” Eka Joab nopuonje weche modhi wacho.

⁴Kane chi Tekoano obiro ir ruoth, nogoyo chonge piny, nyaka e lowo, komiye duong’ mowacho niya, “Ruoth, konya.”

⁵Ruoth nopenje ni, “Ang’o machandi?” Nodwoke niya, “Ruoth, an chi liel, chwora osetho.

⁶Ne an gi yawuowi ariyo, to ne gigore ka kwath, kuma ne onge ng’ato ma thegogi, mi achiel ogoyo wadgi.

⁷To koro joodwa duto okayona, kawacho niya, ‘Gol jal mane onego owadgi, mondo wanege kar owadgino.’ Kuom mano, diginet jacham mwandu bende. Gidwaro lung’o kara duto pep, mak giweyo nying chwora kata kothe e piny.”

⁸Ruoth nowacho ni dhakono niya, “Dog dala, abiro ng’ado buchi.”

⁹To dhakono nomedo wachone niya, “Yaye, ruoth! Ketho mondo obed kuoma, kendo kuom joodwa, to in kod lochni ibed ma onge ketho.”

¹⁰Omiyo ruoth nowachone niya, “Ka ng’ato omedo wachoni gimoro, to kele ira, mi ok nochak ochandi kendo!”

¹¹Dhakono nomedo wacho niya, “Ruoth, akwayi mondo ikuong’rina e nying Ruoth Nyasaye ma Nyasachi, ni jachul kuor kik med ketho, konego wuoda.” Ruoth nodwoke ni, “Gi nying Ruoth Nyasaye, kata yie wi wuodi achiel ok nolwar piny.”

¹²Eka dhakono nowacho niya, “Asayi ruoth, yie mondo amed wachoni wach achiel kende.” Ruoth nokone ni, “Wachi.”

¹³Dhakono nowacho niya, “King’ado wach wuoda kamano, to imiyo bura loyi in iwuon,, nikech idagi omo jal ma niriembo, mondo oduog dala. Marang’o iseparo wach ma diketh jo-Nyasayeni?

¹⁴Waduto wabiro tho, nikech wachalo gi pi mopukore piny, ma ok nyal twom kendo. Kata kamano, Nyasaye ok dwar mondo ng’ato otho, to oloso wach mondo jal moriemb oduog dala.

¹⁵A ruoth, asebiro mondo awuo kodi nikech ji miya luoro. Naparo ni, ‘Awuo gi ruoth, nimar dipo ka otimo gima odwaro.

¹⁶Ang’eyo ni ruoth biro winjo ywakna, kendo obiro resa e lwet jal ma dwaro tieka kaachiel gi wuoda, ni kik wabed e oganda mar jo-Nyasaye.’

¹⁷ Bende naparo niya, ‘Wach ruoth ema nyalo miya kue, nikech ruoth chalo malaika mar Nyasaye mapogo gima ber gi gima rach.’ Ruoth Nyasaye ma Nyasachi mondo obed kodi.”

¹⁸Ruoth nowacho ni dhakono niya, “Kik ipanda gimoro kuom wach madwaro penjini” Dhakono nodwoke ni, “Ruoth, wachi.”

¹⁹Ruoth nopenje ni, “Joab ni kodi e wachni koso?” Nodwoke niya, “Ruoth, akuong’ora gi nyingi ni onge ng’at ma nyalo mbalore ni weche misewacho. Adier, Joab jatichni ema nonyisa wechego duto mondo awachni.

²⁰Notimo kamano ni mondo gik mosetimore olokre. Malaika mar Nyasaye ming’eyogo gik moko duto matimore e piny.”

²¹Bang’e ruoth nowacho ni Joab niya, “Koro ayie wachni. Dhiyo, iom rawera ma Absalom.”

²²Joab nokulore piny, komiyo ruoth duong’, kendo nodende. Nowacho niya, “Ruoth, tinendeni ang’eyo nii iyie koda, nikech isetimona gima akwayo.”

²³Mi Joab nodhi Geshur omo Absalom, mokele Jerusalem.

²⁴To ruoth nowacho niya, “We mondo odag e ode owuon. Ok adwar mondo obi e nyima.” Mano omiyo Absalom nodak e ode owuon, ka ok odhi e nyim ruoth.

²⁵E Israel duto ne onge ng’at man gi chia miwuoro ka Absalom. Mbala ne onge kuome, a wiye nyaka tiende piny.

²⁶Nolielo wiye higa ka higa, kane yie wiye ohinge. To ka nopimo yie wiyeno, noyudo ni pekne romo kilo ariyo.

²⁷Absalom nonywolo yawuowi adek gi nyako achiel ma nyinge Tamar. Ne en nyako ma jaber ahinya.

²⁸Absalom nodak Jerusalem kuom higni ariyo mangima, ka ok odhi e nyim ruoth.

²⁹Eka noluongo Joab mondo oor irr ruoth, to Joab nodagi biro ire. Noluonge kendo, to Joab ne pod odagi.

³⁰Omiyo Absalom nowacho ni jotichne niya. “Donge ung’eyo puoth Joab mar cham, mokiewo gi puotha? Dhiuru uwang’e gi mach.” Mi ne gidhi mi giwang’o puodhono.

³¹Eka Joab nodhi ir Absalom e ode, mopenje niya, “Marang’o jotichni owang’o puotha?”

³²Absalom nodwoke ni, “Naoroni wach kaluongi mondo aori ir ruoth, ipenje gimomiyo nooma Geshur. Dobedona maber moloyo ka da pod an kuno. Emomiyo koro adwaro neno ruoth, kendo ka oneno rach moro kuoma, to mondo onega.”

³³Kane Joab odhi ir ruoth, monyise wachno, ruoth noluongo Absalom, mobiro ire. Absalom nokulore piny e nyime, mi ruoth nomose ka nyodhe.