Read luo 2 Samuel 15 Bible Online

2 Samuel 15 - luo bible

2 Samuel 15

¹Bang’ mano, Absalom nong’iewo gari gi farese, kendo ne en gi ji piero abich mane telo nyime.

²Nothoro chiew gokinyi mang’ich, kendo chung’ e dir yo mochomo dhoranga Jerusalem. Ka noneno ng’at man gi wach moro ka dhi ir ruoth mondo ong’ad buche, to noluongo ng’atno kendo openje kuma oaye. Kane ng’atno onyise dhood Israel moaye,

³to Absalom ne wachone niya, “Aneno ni wecheni beyo, kendo adier, to mak mana ni onge ng’at ma ruoth oseketo mondo oyal buche ma kamagi.”

⁴Bende nomedo wacho niya, “Yaye! Mad keta jang’ad bura e pinyni! Eka ng’ato ka ng’ato man gi wach kata ywak nyalo biro ira, kendo dang’adne bura kare.”

⁵Pile kane ng’ato obiro ire, kendo okulorene ka miye duong’, Absalom ne rieyo lwete ka mose, kendo ka nyodhe.

⁶Notimo kamano ni jo-Israel duto mane biro ni mondo ruoth Daudi ong’adnigi bura. Mano e kaka Absalom noywayo chuny jo-Israel.

⁷Bang’ higni ang’wen, Absalom nowacho ni ruoth niya, “Yiena adhi Hebron, mondo achop singruok mane asingora ni Ruoth Nyasaye,

⁸nikech kane adak Geshur e piny Aram, nasingora ni ka Ruoth Nyasaye oduoga Jerusalem, to nalame Hebron.”

⁹Ruoth noyiene, mi Absalom nodhi Hebron.

¹⁰To Absalom nooro joote ni dhout Israel duto ling’ling’, kowacho niya, “Ka uwinjo tung’, to ukog ni, ‘Absalom e ruodh Hebron’ ”

¹¹Absalom noluongo jo-Israel mia ariyo mondo odhi kode Hebron, mi jogo nodhi ka chunygi ler, kendo ka kiya gima Absalom ochano.

¹²Kane Absalom timo misango, nooro wach Gilo, moluongne Ahitofel ja-Gilo, ma jang’ad rieko ni Daudi. Kamano ji mane ong’anyo ka dok ni Absalom nomedore.

¹³Kane Daudi oyudo wach ni jo-Israel osedok ni Absalom,

¹⁴nowacho ni joge duto mane ni kode Jerusalem niya, “Wuoguru, waringuru, nimar ka ok watimo kamano, to ok wabi tony mak Absalom ojukowa. Wuoguru aruya, dipo kong’ukowa, moloyowa, kendo onego jo dala ka duto.”

¹⁵Jotend lweny nodwoko ruoth niya, “Ruoth waikore timo gimoro amora miwacho.”

¹⁶Omiyo Ruoth nowuok kaachiel gi joode duto, mak mana monde apar moko ema noweyo mondo orit ode.

¹⁷Kamano nowuok kaachiel gi joge duto, mi gichung’ but ot matung’.

¹⁸Eka jolwenje duto kod jo-Kereth gi jo-Peleth duto, kod jo-Giti mia auchiel ma nobiro kode koa Gath, nokadho e nyime.

¹⁹To ruoth nopenjo Itai ja-Giti niya, “Marang’o in bende idhi kodwa? Dogi ibed gi ruoth manyien, nikech in ng’ama wendo ma noriembi, moweyo dalagi.

²⁰Yandi eka ibiro, ere kaka dwawuoth kodi kamoro amora, to an akia kuma adhiye? Emomiyo dogi, kaachiel gi jowadu. Ruoth Nyasaye mondo oguedhi, kendo onyisi herane mosiko.”

²¹To Itai nodwoko ruoth niya, “Gi nying Ruoth Nyasaye, kendo gi nyingi iwuon, kamoro amora midhiye, kanyo ema an bende nabedie, kata e tho, kata e ngima.”

²²Omiyo Daudi nowachone niya, “Ara, dhi nyime.” Mi Itai ja-Giti nokadho, kaachiel gi joge duto.

²³Jopinyno duto noywak ka ji kadho. To ruoth nochung’ e aora Kidron, ka ji duto kadho nyime, kochiko yo thim.

²⁴Abiathar gi Zadok bende nobiro, kaachiel gi jo-Lawi duto koting’o Sandug Muma mar Nyasaye. Ne giyieyo Sanduk mar Nyasaye piny nyaka ji duto mane wuok Jerusalem okadho.

²⁵Eka ruoth nowacho ni Zadok niya, “Dwok Sanduk mar Nyasaye Jerusalem. Kapo ni Ruoth Nyasaye okecha, to enoduoga, mi anane Sanduk kod kar dakne kendo.

²⁶To ka Ruoth Nyasaye owacho ni ok an ng’at malong’o e nyime, to era e, mondo otimna gima ohero.”

²⁷Ruoth nomedo wacho ni Zadok jadolo niya, “Koro doguru dala gi kue, in gi Ahimaaz wuodi, kod Abiathar gi Jonathan wuode.

²⁸To an abiro bet kama iyorogo aora e thim, nyaka ayud wach moa kuomi.”

²⁹Omiyo Zadok gi Abiathar ne jodwoko Sanduk mar Nyasaye Jerusalem, mi gimedo dak kuno.

³⁰To Daudi noidho got Zeituni ka ywak, koumo wiye, kendo ka en gi tiende nono. Ji duto mane ni kode bende noidho got koumo wigi, kendo ka ywak.

³¹Nonyis Daudi ni Ahithofel en achiel kuom joma odok ni Absalom, mi nowacho niya, “A Ruoth Nyasaye, asayi, lok rieko mar Ahithofel mondo obed mana fuwo!”

³²Kane Daudi ochopo ewi got, kama nilamoe Nyasaye, Hushai ja-Arki nobiro romone, koyiecho lawe, kendo obuko wiye buru,

³³Daudi nowachone niya, “Kwadhi kodi, to dimedna mana ting’.

³⁴Omiyo in dog Jerusalem, mondo iwach ni Absalom ni initine kaka nitiyo ni wuon mare e ndalo mokadho. Kitimo kamano to inikethna rieko Ahithofel.

³⁵Un gi Zadok gi Abiathar ma jadolo kuno. Wach moro amora miwinjo e od ruoth to inyis jodologo.

³⁶Ahimaaz wuod Zadok, kod Jonathan wuod Abiathar bende ni kodgi kuno. Gin ema mondo iorgi gikelna weche duto miwinjo.”

³⁷Kuom mano Hushai ma osiep Daudi nodok, modonjo Jerusalem mana e sa mane Absalom bende ochopoe kuno.